12 July 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل – باختر د وږي دمياشتې ١٦
دپنجشير ولايت دترافيکو دمديريت دنوې ودانۍ دبنسټ ډبره نن د دغه ولايت دمرستيال عبدالرحمن کبيري له خوا کيښودل شوه .
دغه ودانۍ دکورنيو چارو وزارت له خوا د اتو مليونو افغانيو په لګښت جوړيږي.
دپنجشيرولايت دترافيکو مديرمحمد هاشم سعادت  باختر آژانس ته وويل :
دغه ودانۍ د يو جريبه ځمکې په ساحه کې په يو کال جوړيږي او ګټې اخستنې ته سپارل کيږي.
دپنجشير ولايت مرستيال عبدالرحمن کبيري د اړونده ساختماني شرکت له مسوول څخه وغوښتل چې د دغې ودانۍ په  جوړولو کې دې  باکيفيته مواد وکاروي.
ختم-ج-حامد

کابل – باختر د وږي دمياشتې ١٦
په کابل کې دايساف قوماندانۍ ديوې خبرپاڼې په خپرولو سره تاييد کړې ده چې يو عسکريې  پرون دافغانستان په ختيځ کې د وسله والو کسانو د بريد له امله وژل شوى دى.
په خبرپاڼه کې ددغه عسکر دهويت په باب څه نه دي ويل شوي خو دهيواد په ختيځ کې  زياتره امريکايي عسکر ديره دي .
دخپرو شويو خبرونو له مخې :   د ٢٠١٤ م کال له پيل څخه تراوسه پورې يوسلو دوه ويشت تنه بهرني عسکر په افغانستان کې وژل شوي دي چې شپږ نوي تنه يې امريکائيان دي.

کابل – باختر د وږي دمياشتې ١٦
دسمنګانو ولايت دايبکو ښار په بيوزلو کورنيو د ١٧٠ ټنو اوړو د ويشلو پروګرام له پيښو سره دمبارزې د ادارې له خوا پيل شو.
دسمنګانو ولايت له پيښو سره دمبارزې دملي ادارې رييس رجب علي يوسفي باختر آژانس ته وويل :  دغه مرسته د ترسره شوې سروې له مخې ترسره کيږي.
د ده دڅرګندونو له مخې :  دغه اوړه د سيلاو په شان د طبعي پيښو له زيانمو شويو کسانو سره دمرستې په خاطر زيرمه شوي او اوس په بيوزلو کورنيو، ګونډو ښځو او معيوبينو چې په تيرو کلونو کې د وچکالۍ  له امله زيانمن شوي و  ويشل کيږي.

کابل – باختر د وږي دمياشتې ١٦
دخوست ولايت په نادرشاه کوټ ولسوالۍ کې يو ديرش بستريز روغتون جوړاو نن پرانستل شو.
دغه روغتون دنشه يي توکو پرخلاف دمبارزې دچارو د وزارت له خوا د اووه سوه زرو امريکايي ډالرو لګښت جوړ شوى  دى .
دخوست ولايت دعامې روغتيا رياست سرپرست داکترحميدالله باختر آژانس ته وويل  :  دغه روغتون چې په طبي وسايلو او لوازمو سمبال دى د داخلې او جراحۍ په ګډون د درملنې بيلابيلې ځانګې لري او عاجله څانګه هم پکې په  پام کې نيول شوې  ده.
دخوست والي عبدالجبار نعيمي د دغه روغتون دپرانستلو په مراسمو کې وويل ، چې ددغه روغتيايي مرکز په فعاليدو سره د نادرشاه کوټ دولسوالۍ او دګاونديو  سيمو خلک نور دې ته  اړ نه دي د خپلو ناروغانو  د درملنې لپاره دخوست ښار او يا کابل ته لاړشي.
نعيمي وويل ، هلې ځلې کوي چې د مرستندويو موسسو دمرستو په جلبولو سره ددغه سرحدي ولايت په نورو سيمو کې هم  د روغتياي مرکزونو په جوړولو لاس پورې کړي.

کابل – باختر د وږي دمياشتې ١٦
هغه سړى چې غوښتل يې دپکتيکا ولايت دسروبي ولسوالۍ په  بازار کې ځانمرګې بريد وکړي دملي امنيت دموظفينو له خوا  ونيول شو.
دملي امنيت دلوى  رياست مطبوعاتي دفتر نن باختر آژانس ته ديوې خبرپاڼې په ليږلو سره ليکلي دي .
ددغې ادارې موظفينو دځانګړو اوپراتيفي عملياتو په بهير کې يو ځانمرګې بريد کوونکې د پکتيکا ولايت د سروبي ولسوالۍ په  مربوطاتو کې ونيو .
ده چې دحيدري په  نامه د طالبانو د ډلې ديو قوماندان له خوا په  دغه ولايت کې ځان رګې بريد ته چمتو شوى و او د طالبانو د ډلې ديو فعال غړي ملاسنګين ځدران  له خوا روزل شوى و،  ويل شوي دي چې دغه سړى دپکتيکا ولايت دارګون ولسوالۍ ته استول شوى و چې د ارګون ولسوالۍ په بازار کې د خلکو ترمنځ ځانمرګې بريد وکړي .
ديوبل خبرله مخې :  دملي امنيت دلوى رياست موظفينو څلور تنه غله ديوه موټر چلوونکې او دتيلو ديو ټانکر د خاوند دوژنې په تور چې د غزني –کابل دلوې لارې په اوږ دوکې وژل شوى و، ونيول .
دغو څلورو تنو وروسته دتيلو ټانکر دغزني ولايت دمقر ولسوالۍ ته ليږدولي او په نهو مليونو پاکستاني کلدار و يې پلورلى و .
نيول شويو کسانو دلومړنيو تحقيقاتو په بهير کې په خپل جرم اعتراف کړى دى .

کابل\باختر\ د سنبلي١٦
په  قندهار ولايت کي داستوګنې په يوه کور دهاوان د ماين د لګيدو له امله دوه تنه ماشومان شهيدان او څلور تنه ښځي ټپيانې شوې .
د قندهارد والي ويندوى  جاويد فيصل باخترآژانس ته وويل :  چې دغه پيښه تيره شپه د ميوند ولسوالۍ دسوري غل په سيمه کې را منځته شوه او وسله وال طالبان ددغې پيښې مسوول بلل شوي دي  .
د ده دڅرګند ونو له مخې :   دغه ماين د استوګني په يوه کور لګيدلى دى چې له
امله يې دوه تنه ماشومان شهيدان اوڅلور تنه ښځې چې ديوې کورنۍ غړي دي ټپيانې شوې .
خبرځاى  زيا ته کړه ، چې دپيښې ټپيان د ميوند روغتون ته ليږدول شوي او د روغتون د چارواکو د څرګندونو له  مخي  ،  د دوو  تنو ټپيانو حالت  خراب بلل شوى دى

کابل\باختر\ د سنبلي١٦
پنځه تنه وسله وال طالبان تيره شپه دامنيتي ځواکونو له خوا په هلمند کې ووژل شول او  درې تنه نور طالبان ټپيان شول .
د هلمند د والي ويندوى  عمرځواک باخترآژانس ته وويل  :   دغه پيښه هغه وخت رامنځته شوه چې وسله والو طالبانو د نادعلي ولسوالۍ په تريخ ناور سيمه کې د پوليسو په پوستې بريد وکړ او جګړه  ونښته چې له امله يې پنځه تنه وسله وال
طالبان  ووژل شول او  درې تنه نور يې ټپيان شول .
دځواک د څرګندونو له مخې ،  ديو وژل شوي طالب مړى  د نښتې په ډګر کې پاتې دي اوطالبان له سا حې څخه تښتيدلي دي .

کابل\باختر\ د سنبلي١٦
په قندهار کې پرون مازيګر شپږ تنه ماين ښخوونکي  ووژل شول  .
دقندهار د والي ويندوى  جاويد فيصل باخترآژانس ته وويل  :   شپږ تنه ماين ښخوونکي چې غوښتل يې د قندهار ولايت دارغستان ولسوالۍ په يوګڼ ميشته سا حه کې په واټ کې ماينونه ښخ کړي  د امنيتي ځواکونو له خوا وپيژندل شول او ډزې پرې وشوې چې  له امله يې د دوي له خواښخ کړاى شوى ماين وچاوديد اوشپږ واړه  يې و وژل شول  .
ديو بل خبر له مخي :   يو ماين ښخوونکي طالب د ده له خوا دښخ کړاى شوي ماين د چاودني له امله  ووژل شو .
دقندهار د والي ويندوى  جاويد فيصل باخترا ژانس ته وويل  :  دغه سړي غوښتل چې تيره  شپه دپنجوايي ولسوالۍ د ګرندي ښوونځي ته څيرمه يو ماين ښخ کړي ماين  وچاوديد او دى  و وژل شو  .

کابل\باختر\ د سنبلي١٦
په لغمان ولايت کې په سړک کې د ښخ کړاى شوي ماين د چاودنې له ا مله دوه تنه ملکي و ګړي شهيدان او دوه تنه  نور ټپيان شول .
دغه پيښه پرون د لغمان ولايت داليشنګ ولسوالۍ د سالاب په کردي سيمه کې را منځته شوه
دلغمان د والي ويندوى  سرحدي ځواک باخترا ژانس ته وويل  :  وسله والوطالبانو دتروريستي عملونو دتر سره کولو په مقصد دسالاب په کردي سا حه کې په سړک کي يو ماين ښخ کړى  و چى د هغه د چاودنې له ا مله ملکي و ګړي قرباني شول .
ده زياته کړه  چې دپيښې ټپيان د درملنې لپاره دلغمان مرکزي روغتون ته ليږدول شوي دي او د رو غتيايي مسوولينو دڅرګندونو له مخيې دپيښې دټپيانو حالت خراب بلل شوى دى  .

کابل\باختر\ د سنبلي١٦
دميدان وردګو ولايت د بهسودو دلومړۍ برخې د ولسوالۍ دقول خويش يوشمير مشرانو او سپين ږيرو نن له غرمې وروسته د جمهور رييس له مرستيال محمدکريم خليلي سره وکتل او خبرې يې  ورسره وکړې .
دجمهوري رياست مطبوعاتي دفتر باخترآژانس ته خبر ورکړ :
دقول خويش مشرانو او سپين ږيرو په دې سا حه کې د روان کال د زمري د مياشتې داتمې نيټې دسختوسيلاوونو راوتلوته په اشارې سره څرګنده کړه چې تراوسه پورې د سيمه ييزو ادارو  له خوا  له دوي سره کو مه مرسته نده شوې .
د کتنې د برخه والو د څرګندونو له مخې  وروستي سيلاوونه  دڅه دپاسه دري سوه کورنيو د زيانمن کيدو ، د څه دپاسه پنځه سوه جريبه کرنيزې ځمکې د ويجاړيدو ، دڅه دپاسه يو زرو پنځه سوه نيالګيو د له منځه تللو ، د برقي ژرندې، دساحي د مواصلاتي سړک ، دبريښنا د دوو  بندونو اود اوبو د٢٤ بندونو د ويجاړيدو سبب شوي دي .
دوي  دغه راز وويل  ،  چې څه  دپاسه اويا څاروي له  منځه تللي دي ، دساحې پوخ پل  په بشپړه توګه له منځه تللى دى  او دغه راز سيلاو دقول خويش دسا حې دسيند تګلورى بدل کړى دى .
دقول خويش مشرانو اوسپين ږيرو د وروستيو سيلاونو له ا مله له زيانمنو شويو کسانو سره د مرستې لپاره د دولت د جدي پاملرنې غوښتنه  وکړه .
په دې کتنه کې د جمهور رييس مرستيال او له پيښو سره د مبارزې دملي کميټې د رييس محمدکريم خليلي دقول خويش مشر انو ته د ښه راغلاست په ويلو سره له دې ا مله چې  له  نږدې په دې سا حه کې د وروستيو سيلاونو د را وتلو له امله د
رامنځته شويو ستونزو او اوښتو تاوانونو  په باب  معلومات ترلاسه کړي دي ، خوښي څرګنده کړه .

د جمهور رييس مرستيال محمدکريم خليلي د وروستيو سيلاونو دراوتلو له امله
د اوښتو تاوانونو اود ستونزو له اوريدو وروسته دکليو دبيا جوړولو او پراختيا ، فوايدعامې اود کرنې او اوبو لګولو د وزارتونو ، له  پيښو سره د مبارزې د ملي ادارې ، دجمهوري رياست د دويم معاونيت د دفتر درياست او دميدان وردګو ولايت د استازو په  ګډون يو هيئت موظف کړ چې ډير ژر دې د سا حي د زيانونو
د سروې  په برخه کې  اقدام و کړي .