05 July 2020

RSS Facebook

سوداگریز


تازه خبرونه

دکرونا ويروس  ٢٧٩نوى پېښې ثبتې شوې دي .

دکرونا ويروس ٢٧٩نوى پېښې ثبتې شوې دي .

-کابل / دچنګاښ ١٥مه / باختر : دعامې روغتيا وزارت نن...

يو امريکايي عسکر په فراه کې ووژل شو .

يو امريکايي عسکر په فراه کې ووژل شو .

-کابل / دچنګاښ ١٥مه / باختر : د امريکا د...

Youtube Player

khantry design

سوداگریز

سوداگریز

کابل\باختر\دسرطان ٢٤
دملي دفاع وزارت ويندوى نن د ايساف دځواکونو او د ناټو د ملکي برخې له ويندويانو سره په ګډه خبري غونډه کې وويل چې د امنيتي مسووليتونو له ليږدونې وروسته د هيواد هيڅ يوه سيمه د ملي اردو له ادارې څخه نه ده وتلې.
دباخترآژانس دخبر له مخې: د ملي دفاع وزارت ويندوى جنرال ظاهرعظيمي په دې ګډه غونډه کې څرګنده کړه: سره له دې چې امنيتي ځواکونو له ستونزو سره مخامخ وو، خو د روان کال په بهيرکې د دښمن دپلان شويو بريدونو په شنډولوکې ځواکمن وو او دغه ځواکمنتيا د دې ښکارندوى ده چې د نړيوالو ځواکونو په وتلو سره دښمن له افغان ځواکونو سره د مخامخې مبارزې وس نه لري.
ده زياته کړه: له بهرنيو ځواکونو څخه افغان ځواکونو ته د امنيتي مسووليتونو له ليږدونې وروسته د هيواد هيڅ کومه سيمه د دولت له کنترول څخه نه ده  وتلې . ده دغه راز زياته کړه چې د ملي اردو د وسايطو د ترميمولو کارپيل شوى دى، خو دغه بهير وخت ته اړ تيا لري .
دغه راز د ايساف اود ناټو د ملکي برخې ويندويانو يوځل بيا په خپلو ژمنو ټينګار وکړ او زياته يې کړه چې ايساف اوناټو به د ملاتړ په نامه په نوى ما موريت کې د افغانستان له دولت او خلکو سره خپلو همکاريو ته دوام ورکړي.

کابل\باختر\دسرطان ٢٤
دافغانستان د اسلامي جمهوريت دجمهور رييس حامدکرزي په مشرۍ د وزيرانو شورا نوبتي غونډه نن له غرمې مخکې د جمهوري رياست د ارګ دګلخانې په ماڼۍ کې جوړه شوه.
د چارو د ادارې او د وزيرانو شورا د دارالانشا لوى رياست باخترآژانس ته خبرورکړ:
له اجندا سره سم، د جمهوري رياست دويم مرستيال او د اقتصادي کميټې رئيس محمدکريم خليلي د دغې کميټې د١٣٩١ کال د٢٦ او٢٧ ګڼه پريکړو په باب غونډې ته لنډ معلومات وړا ندې کړل. وروسته دکانونو او پطروليم وزيرد١٣٩٢ _ ١٣٩٣کلونولپاره دشمال دډبرو سکرو د تصدۍ دتوليدي _ تجارتي فعاليت د دوام په باب ددغه وزارت وړانديز غونډې ته طرحه کړ او زياته يې کړه چې په وروستيوکلونوکې د دغې تصدۍ عوايد زيات شوي دي. دغه راز د دغې تصدۍ د فعاليت د دوام له امله هيوادوالو ته دکار زمينه برابريږي.
د وزيرانو شورا له هراړخيزو خبرو وروسته د١٣٩٢ _ ١٣٩٣ کلونو لپاره دشمال د ډبرو سکرو د تصدۍ دتوليدي _ تجارتي فعاليت د دوام په باب دکانونو اوپطروليم و زارت وړانديز تصويب کړ.
ورپسې دښارجوړولو د چارو وزير دسلواغي د مياشتې د٢٦ نيټې د پروژې په اړوند ددغه وزارت پيشنهادي طرحې په دې ډول غونډې ته وړاندې کړې.
په دې پروژه کې دپنځه پنځوسو مليونو ډالرو بيل کړاى شوو پيسو له جملې څخه درويشت مليونه ډالره يې اجرا اومصرف شوي دي چې دعمومي سړکونو د اسفالت ، د اوبو رسولو دشبکو د جوړولو او کاناليزاسيون په ګډون دپروژې ساختماني کار په سلوکې څلويښت پرمخ تللى دى او د دغې پروژې د کار د دوام په مقصد يې ددغې پروژې په تجارتي ساحوکې د حويليو دپلورنې او د خصوصي سکټور د مشارکت وړا نديز وکړ.
د وزيرانو شورا له هراړخيزو خبرو وروسته ، اقتصادي کميټه موظفه کړه چې وړاندې شوي پيشنهاد دې په دې شرط چې د دغې پروژې ساحې د کابل د نوى ښار په ماستر پلان کې شاملې نه وي، دغه پروژه دې د نامه په بدلون سره په لومړى ګام کې د دولت په مالي امکاناتو سره او په هغه صورت کې چې دغه انتخاب امکان ونه لري؛ په تجارتي ساحوکې د خصوصي سکټور د مشارکت په اړوند د مشخص ميکانيزم په طرحه کولو او د حويليو په پلورنې سره د ماليې او اقتصاد د وزيرانو په ګډون بيا وڅيړي اود نتيجې په باب دې د وزيرانو شورا ته رپوټ وړاندې کړي.
وروسته د عدليې وزير په اطلاعاتو د لاسبرى دقانون طرحه غونډې ته وړا ندې کړه او څرګنده يې کړه چې دغه قانون د افغانستان د اساسي قانون دپنځه پنځوسمې مادې په دريمه فقره کې له ليکل شوى حکم سره سم، په شپږو فصلونو او پنځه ديرشو مادوکې له دولتي ادارو څخه په اطلاعاتو د هيواد د اتباعو دلاسبري د حق د تامينولو په مقصد برا بره شوې ده.
د وزيرانو شورا له هراړخيزو خبرو وروسته د عدليې، بهرنيو چارو، ماليې او د اطلاعاتو او فرهنګ وزيران، د ملي امنيت سلاکار او د ملي دفاع وزارت لومړى مرستيال موظف کړل چې ددغه قانون طرحه دې دغونډې له يادونې سره سمه بيا وڅيړي او دقوانينو د کميټې له تاييد وروسته دې د وزيرانو شورا ته وړاندي کړي.
وروسته د عدليې اود لوړو زده کړو وزيرانو دخصوصي لوړو زده کړو د موسسو د مقررې په ځينو مادوکې د تعديل او زياتوالى طرحه غونډې ته وړا ندې کړه او زياته يې کړه چې په وړاندې شويو تعديلونوکې د اکاډميک ظرفيت د لوړولو، تر خاصو شرايطو لاندې د خصوصي لوړو زده کړو د موسسو د جوړولو او پراختيا، د موسسو د حق الا متياز د لوړولو معيارونه  او دغو موسسو ته تاديبي موئيدات اټکل شوي دي.
د وزيرانو شورا له هراړخيزو خبرو او د دغې طرحې د بډاى کولو په لاره کې د سالمو نظريو او پيشنهادونو له وړاندې کولو وروسته دلوړو زده کړو دمو سسو دمقررې په ځينو مواردو کې د تعديل او زياتوالى طرحه په اصولو کې تائيدکړه او د عدليې او د لوړو زده کړو وزارتونه يې موظف کړل چې پيشنهادي تعديلونه دې د غونډې له يادونې سره سم تصحيح او دغه مقرره دې بشپړه کړي چې ددغې مقررې په انفاذ سره دې د خصوصي لوړو زده کړو د موسسو د راجستر تعليق لرې شي.
دغونډې په پاى کې د بهرنيو چارو وزير دپوليسو د ليک لوست د زده کړې په برخې پورې له اړوندو ښوونکو سره د تخنيکي مرستو د برابرولو په باب دکورنيو چارو وزارت، ماليې وزارت او د ملګرو ملتو د سازمان د تعليمي ، علمي او فرهنګي مرکز ترمنځ تفاهم ليک غونډې ته طرحه کړ چې د تائيد وړ وګرځيد.
د وزيرانو شورا د بهرنيو چارو وزارت موظف کړ چې دغونډې له يادونې سره سم د افغانستان او ترکمنستان د سرحدي اوبو د مسئلو په باب د افغانستان د اسلامي جمهوريت او دترکمنستان جمهوريت د هيئتونو دخبرو پروتوکول د ترکمنستان جمهوريت له لوري سره يو خيل کړي او وروسته دې د تاييد په مقصد د وزيرانو شوراته  وړاندې کړي.

کابل\باختر\دسرطان ٢٤
د وسله والوطالبانو په ډلې او په حقاني شبکې پورې اړوند درويشت تنه په افغانستان کې ونيول شول.
په دغوکسانو تيره شپه او نن سهار دقندهار،غزني، پکتيا ،کونړ ، نورستان او دلوګر د ولايتونو په ځينو سيموکې له افغان پوځيانو او دناټو دځواکونو په عملياتو کې بريدونه وشول او ونيول شول.
باخترآژانس د ناټو ديوې خبرپاڼې له خولې خبر راکړ چې دغه طالبان په ترورستي فعاليتونو پوخت وو چې ونيول شول.
ويل کيږي چې د وسله والوطالبانو د ډلې دوه تنه سيمه ييز قوماندانان او دحقاني دشبکې د تروريستي بريدونو يو مرستندوى هم په نيول شويوکسانوکې شامل دى.
ناټو وايي چې په دغو عملياتوکې د طالبانو دډلې اودحقاني دشبکې څلور پټنځايونه هم دړې وړې شوي دي او پوځيانو ددغو ډلو دجنګي وسايلو درې ډيپوګانې هم ترلاسه کړې دي.
په دغو ډيپوګانوکې د ماينونو او توغندي ويشتوونکو په ګډون په لسګونو سپک او درانده جنګيوسايل ترلاسه شوي دي.

کابل\باختر\دسرطان ٢٤
د سيمه ييزو ارګانونو دخپلواکې ادارې په وړانديز او د افغانستان د اسلامي جمهوريت د جمهور رييس حامدکرزي له حکم سره سم، شجاع الملک جلاله په فوق رتبه بست کې د کونړ  د والي په توګه وټاکل شو.
شجاع الملک جلاله د عبدالملک زوى چې پخوا يې د قومونو په چاروکې دافغانستان د اسلامي جمهوريت د جمهوري رياست د عالي مقام د سلاکار په توګه دنده ترسره کوله؛ ښې تجربې او لازمه وړتيا لري.

کابل_باختر دچنګاښ د مياشتې٢٤مه:
د افغانستان د طالبانو په باب د پاکستاني پوځ له نظره د هغه هېواد یوه پخواني متقاعد برید جنرال په کم ساري ډول پرده پورته کړې ده. د نیوز په ورځپاڼه کې متقاعد پاکستاني برید جنرال صدیقي د پاکستان د پخواني ولسمشر او پوځي مشر جنرال پرويز مشرف له خولې لیکلي دي چې افغان طالبان د پاکستان د پوځ لپاره چمتو ځواک دی چې تل یې کارولی شي.
باخترآژانس ته په را رسيدلوخبرونوکې ويل شوي دي:
د پرويز مشرف له خولې دا هم ویل شوي چې افغان طالبان د پآکستان د پوځ د ګټو لپاره په هر مناسب وخت کې کاریدلی شي او دوی یې د هند پر ضد هم د اړتیا پر وخت کارولی شي.
متقاعد پاکستانی برید جنرال دا هم وایي چې پرویز مشرف منله چې طالبانو افغانستان خراب کړی خو د پاکستان د پوځ لپاره ستراتیژیک احتیاطي ځواک دی چې د اړتیا پر وخت یې کارولی شي.
پرویز مشرف اوس په پاکستان کې د بیلا بیلو جنایي او سیاسي قضیو له امله نظر بند دی.

کابل\باختر\دسرطان ٢٤
دملي اردو منسوبينو په ښه توګه په هيوادکې د امنيت د تامينولو په مقصدپرون د هلمند ولايت دګرشک ولسوالۍ په مربوطاتوکې يولړ چاڼيز عمليات ترسره کړل چې له امله يې دوه تنه وسله وال مخالفين ووژل شول او يوه اندازه وسله او مهمات ترلاسه شول.
دملي دفاع وزارت مطبوعاتي دفتر باخترآژانس ته خبر ورکړ: دغه راز د زابل ولايت دشاه جوى ولسوالۍ په مربوطاتوکې دملي اردو او دملي پوليسو د منسوبينو دګډو چاڼيزو عملياتو په بهيرکې يو وسله وال مخالف وژل شوى دى.
دغه راز د هلمند ولايت د واشير ولسوالۍ په مربوطاتوکي د ملي اردو او ملي پوليسو د منسوبينو په ګډو عملياتوکې پنځه تنه مشکوک مخالفين ونيول شول.
دغه راز دقندهار ولايت د ميوند ولسوالۍ په مربوطاتوکې دملي اردو دخاصې قطعې د منسوبينو دګډو چاڼيزو عملياتوپه بهيرکې دوه تنه مشکوک مخالفين او دپکتيا ولايت د احمدا باد ولسوالۍ په مربو طاتو کې پنځه تنه مشکوک مخالفين له يو کلاشينکوف او له څلورو شاژورونو سره ونيول شول.
ديو بل خبر له مخې: د وسله والو مخالفينو له خوا دميدان وردګو ولايت د جلريز ولسوالۍ په مربوطاتوکې دښخ کړاى شويو ماينونو د چاودنې له ا مله د ملي اردو پنځه تنه منسو بين ټپيان شول.

کابل\باختر\دسرطان ٢٤
دملي امنيت د لوى رياست موظفينودتخار ولايت دچال ولسوالۍ لپاره د طالبانو د ډلې نومول شوى ولسوال  د تالقانو ښار په مربو طاتوکې ونيوه.
دملي امنيت د لوى رياست مطبوعاتي دفتر باخترآژانس ته ديوې خبر پاڼې په ليږلو سره ليکلي دي چې ده په لومړنيو تحقيقاتوکې اعتراف کړى دى چې پوځي تعليمات او په واټ کې د ښخولو لپاره د ماينونو د جوړولو لارې چارې يې په شمالى وزيرستان کې د جندالله د ډلې له ازبکستاني ښوونکو څخه زده کړې دي او دتخار ولايت لپاره د طالبانو د نومول شوى والي مولوي باز محمد له خوا چې دپاکستان په پيښورکې استوګنه لري؛ د دغه ولايت دچال د ولسوال په تو ګه ټاکل شوى و چې په تالقانو ښارکې د ماين ښخولو په وخت کې ونيول شو.

کابل\باختر\دسرطان ٢٤
دمشرانو جرګه رئيس فضل هادي مسلميار نن يومف د سويس دنيا پوهنتون دلوى رئيس کړه وړه وستايل.
دمشرانو جرګې مطبو عاتي دفتر باختراژانس ته خبر ورکړ: په هغې غونډه کې چې له همدې امله جوړه شوې وه او ځينو سناتورانو هم پکې برخه لرله؛ د يومف سويس دنيا پوهنتون لوى رئيس ډاکترجاويد سنګ دل ددغه تحصيلي مرکز دفعاليتونو په باب د معلوماتو د وړاندې کولو په ترڅ کې دسنامجلس رئيس ته وړانديز وکړ چې د لوړو زده کړو په برخه کې له کمو پرمختللو ولايتونو څخه شل تنه محصلان چې دځينو دلايلو له امله له زده کړې څخه پاتې شوې وې؛ معرفي کړي چې په وړيا ډول ددغه پوهنتون په درسي پروګرامونو کې شامل شي.
دسنا مجلس رئيس ددغه وړانډيز په تاييدولو سره ځوان نسل ته د زده کړې د زمينو د برابرولو په خاطر د دنيا پوهنتون کړه وړه وستايل او دمشر انو جرګې ستاين ليکونه او نښان يې ډاکتر جاويد سنګدل او په افغانستان کې د دنيا پوهنتون سرپرست جنرال احمد شاه ته وړاندې کړل.

کابل \ باختر  د چنګاښ ٢٤ :
د روژې دمبارکې مياشتې په درناوى د قرآن کريم د پسرلي ستر نندارتون نن په کابل  کې پرانيستل شو .
دباخترآژانس دخبرله مخې: په دې  نندارتون کې چې داطلاعاتو اوفرهنګ وزارت په همکارۍ جوړشوى دى؛ شلوتنو خپرونکو په ديرشو غرفوکې قرآن کريم په چاپي، تصويري اوصوتي ډول نندارې ته وړاندې کړى دى.
په هغومراسموکې چې له همدې امله پرځاى شوي و؛ ويناوالو د روژې د قرآن کريم  د نازليدو دمبارکې مياشتې دفضليت په باب خبرې وکړې .
دغه نندارتون دلسو ورځو لپاره دمينه والو پرمخ پرانيستى دى.

کابل \ باختر  د چنګاښ ٢٤ :
د افغانستان لپاره دملګرو ملتو دسازمان دسرمنشي ځانګړى استازى يان کوبيش وايي: ددغه سازمان دامنيت شورا يوځل بيا له افغانستان سره په خپل هميشني ملاتړ ټينګار کړى دى.
دباخترآژانس دخبرله مخې، يان کوبيش وايي: د ملګرو ملتو سازمان له بيلابيلو سياسي ډلو او دولتي مرکزونو سره له نږدې کارکوي چې په افغانستان کې د پراخې وګړني واکمنۍ لاره اواره شي .
کوبيش دغه راز وويل چې د ملګروملتوسازمان د دې ترڅنګ دسولې په بهيرکې هم خپل رول لوبوي او دافغانستان د راتلوونکي په نسبت ځان مسوول بولي.
دغه شورا له افغانستان سره د اوسنيو او له ٢٠١٤ کال وروسته مرستو په باب ټينګارکړى او د سولې او دملي روغې جوړې بهيريې يواځينۍ اړتيا بللې او په دې برخه کې  برياليتوبونه يې له هيلو ډک وبلل .
دملګروملتو سازمان  سربيره پر دې دافغانستان اقتصادي وده ډير مهم اوبرخليک ټاکوونکي بولي .
يان کوبيش دغه راز د افغانستان له حکومت څخه وغوښتل چې په هيوادکې د بشرحقوقو ته جدي پاملرنه وکړي او باور يې څرگندکړى چې د افغانستان خلک او  حکومت د دې کار ملاتړ کوي.