24 September 2020

RSS Facebook

سوداگریز


تازه خبرونه

جمهوررئیس محمد اشرف غني د پاکستان د نوي سفیر باورلیک ومانه

جمهوررئیس محمد اشرف غني د پاکستان د نوي سفیر باورلیک ومانه

کابل/ د تلې ۳مه/ باختر د افغانستان د اسلامي جمهوریت...

 مولوي رحمت الله اندړدملي امنیت شورا ویاند وټاکل شو

مولوي رحمت الله اندړدملي امنیت شورا ویاند وټاکل شو

کابل/ د تلي ۳مه/ کابل د افغانستان د جمهور ريیس...

Youtube Player

khantry design

سوداگریز

سوداگریز

کابل\باختر\ دسنبلي٢٣
دسمنګانو ولايت دمرکز ايبکو ښار د پرمختيايي شورا رييس د ناپيژندل شويو وسله والوکسانو له خوا ووژل شو .
د سمنګانو ولايت دامنيې قوماندانۍ د جرمونو پرخلاف دمبارزې مدير سمونوال غلام محمد زلمي باخترآژانس ته وويل: دسمنګانو ولايت دمرکز ايبکو دګل قشلاق د کلي دملي پيوستون دپروګرام دپرمختيايي شورا رييس سکندر د ناپيژندل شويو وسله والو کسانو له خوا دکلاشينکوف په ډزو سره ووژل شو .
د زلمي دڅرګندونو له مخې: ناپيژندل شوي وسله وال کسان دسکندر کورته ننوتل او دى يې شهيدکړ.
په همدې حال کې سمو نوال زلمي دغه وژنه د شخصي او قومي دښمنۍ زيږنده بولي.

کتمندو باختر د وږي دري ويشتمه :
د آسيا د فوټبال د کنفدراسيون رييس د آسيا د جنوب د ملتونو په جام کې دافغانستان د فوټبال دملي ټيم برياليتوب وستايه  او  ويلي يې دي چې افغانستان د آسيا د ملتونو د جام سياليو ته د رسيدو لپاره قوي چانس لري.
د افغانستان دفوټبال ملي ټيم د چهارشنبې په ورځ به هندوستان باندې د صفر په وړاندې د دوو ګولونو په برياليتوب سره د لومړي ځل لپاره يې د آسيا دجنوب دفوټبال د اتلوالى مقام وګاټه او افغانانو په ټول هيوادکې ددغه برياليتوب  هرکلى وکړ .
د آسيا دفوټبال کنفدراسيون  (اى اف سي) رييس شيخ سلمان بن ابراهيم الخليفه  پرون وويل چې د افغانستان د فوټبال ملي ټيم اوس د آسيا دفوټبال کنفدراسيون د مبارزاتو جام له پاملرنې وړ ټيمونو څخه دى.
د آسيا د فوټبال کنفدراسيون  د مبارزاتو دجام د سيالۍ ګټونکي چې په  راتلونکي  کال کې په مالديوکې ترسره کيږي؛ په مستقيم ډول د آسيا د وچې دملتونو جام په سياليو کې دګډون حق ترلاسه کوي .
د آسيا دملتونو دجام د فوټبال سيالۍ په  ٢٠١٥ کال کې په استراليا کې ترسره کيږي .
د آسيا د فوټبال کنفدراسيون رييس وويل چې د آسيا په جنوب کې د افغانستان برياليتوب هغو ټيمونو ته خبر دارى دى چې هلې ځلې کوي  په  ٢٠١٤ کال کې د آسيا دفوټبال  د کنفدراسيون دسياليو اتلولى وګټي .
شيخ سلمان زياته کړه: افغان لوبغاړي د سيمې په کچه خپله وړتياوښودله اوفکرکوم هغوى به دمالديو په سياليوکې له پاملرنې وړ ټيمونوڅخه وي.

کابل باختر د وږي دري ويشتمه :
دملي اردو درې تنه عسکر پرون دغزني ولايت په مربوطاتوکې د ښخ کړى شوى ماين دچاودنې له امله  شهيدان شول.
دملي دفاع وزارت دمطبوعاتي دفتر ويندوى باخترآژانس  ته خبر ورکړ: دملي اردو درې تنه عسکر دغزني ولايت په قره باغ ولسوالۍ کې د امنيتي دندو دترسره کولو په بهيرکې  په واټ کې د ښخ کړى شوى ماين دچاودنې له امله شهيدان شول او دغه راز دملي اردو يو بل عسکر د سرپل ولايت په مربوطاتوکې په ورته پيښه کې شهيد شوى دى او دملي اردو دوه تنه نور عسکر دکونړ ولايت دغازي آباد ولسوالۍ په مربوطاتوکې د وظيفوي فعاليتونو د ترسره کولو په بهيرکې د ښخ کړاى شوى ماين د چاودنې له امله ټپيان شول.

کابل باختر د وږي دري ويشتمه :
دپروان ولايت د ژورناليستانو د شورا په لومړۍ غونډه کې د دغې شورا د رهبرى هيئت انتخاب شو.
  د رهبرى په هيئت کې چې رييس، مرستيال او منشي شامل دي؛ د ژورناليستانو د شورا د انتخاباتو له لارې وټاکل شو.
دچاريکارو له ښار څخه دباخترآژانس دخبريال دخبر له مخې: په هغې غونډه کې چې د پروان ولايت داطلاعاتو او فرهنګ رياست دمطبوعاتو په تالارکې جوړه شوه؛ دپروان ولايت د اطلاعاتو او فرهنګ رييس په دغه ولايت کې د ژورناليستانو دحقوقو د دفاع په لاره کې د ژورناليستانو د شورا شتون يو کټور ګام وباله او زياته يې کړه چې ژورناليستان بايد د خبريالى  د اصولو له مخې فعاليتونه ترسره کړي .
دغه راز په دې غونډه کې عبدالغفار رووفي د پروان ولايت د ژورناليستانو  د شورا د رييس، ميرمن عاطفه بهاررضايي دمرستيالې او يعقوب رسولي دمنشي په توګه انتخاب شول .

کابل باختر د وږي دري ويشتمه :
پنځه تنه وسله وال طالبان تيره شپه په سرپل ولايت کې ووژل شول .
دسرپل ولايت دامنيې قوماندانۍ د امنيت آمر سخي داد حيدري باخترآژانس ته وويل: پنځه تنه وسله وال طالبان د سانچارک ولسوالۍ د کلکر په سيمه کې له امنيتي ځواکونوسره په نښته کې ووژل شول .
حيدري زياته کړه: دغه کسان چې په کلکر کلي کې دخلکو د ځورونې سبب کيدل او په زوره يې له هغوى څخه باج اخيسته، د سيمه ئيزو او ملي پوليسو او د ملي اردو او ملي امنيت د ځواکونو له خوا پرهغوى بريد وشو او ووژل شول.
ويل کيږي ددغو نښتو له امله يو پوليس ټپي شوى او ملکي وګړو ته د سر زيان نه دى اوښتى .
حيدري زياته کړه چې په دغه کلي کې د طالبانو يو موټرسايکل اوڅو ټنه راټول کړاى شوي غنم هم د امنيتي ځواکونو لاس ته ورغلي دي چې ددغې سيمې په خلکو وويشل شول.

کابل باختر د وږي دري ويشتمه :
يو شمېر سکټوري وزارتونه هلې ځلې کوي چې ديو همغږى پروګرام په جوړولو سره دخوست ولايت دپرمختيا لپاره پروګرامونه جوړکړي .
دباخترآژانس دخبر له مخې: د سيمه ييزو ارګانونو ادارې د خوست ولايت د ودې او پرمختيا لپاره يو لړ تدبيرونه ترلاس لاندې نيولي دي .
د دغوتدبيرونو په چوکاټ کې نن د کليو د بيا جوړولو او پراختيا، کرنې او اوبو رسولو ، پوهنې او اقتصاد د څلورو سکټورې وزوارتونو ترمنځ غونډه جوړه شوه.  په دې غونډه کې د دغو وارتونو په مسوولينو برسيره د يو شمير نورو دولتي مرکزونو او ادارو استازو هم ګډون کړى و.
د سيمه ئيزو ارګانونو د خپلواکې ادارې رييس عبدالخالق فراهي وايي: دخوست ولايت په تيروکلونوکې ښه وده کرې ده ، د دې سبپ شوچې دغه ولايت  له دريمې درجې څخه دويمې درجې ته لوړ شي. خو تراوسه پورې هم يو شمېر ستونزې شته. خوست معياري هوايي ډګر او لويه لاره نلري او د کرنې اوځنګلو په نشتوالي کې پوهنه هم ستونزې لري. د سکټوري وزارتونو دمسوولينو ترمنځ خبرې کولاى شي يو پرمختيايي هراړخيز پروګرام رامنځته کړي.
دغه راز د خوست والي عبدالجبار نعيمي خبرې وکړې په دغه ولايت کې د ترلاسه شويو برياليتوبونو د بيانولو په ترڅ کې د خوست ولايت يو شمېر اړتياوو ته يې هم اشاره وکړه .
په دې غونډه کې د کليو د بيا جوړولو او پراختيا وزير ويس برمک، دکرنې او اوبو لګولو وزير محمد آصف رحيمي، داقتصاد وزير عبدالهادي ارغنديوال او دپوهنې وزارت معين شفيق صميم ګډون کړى و چې  دخپلو خبرو په بهيرکې دخوست ولايت د ودې او پرمختيا په مقصدبه د يو کاري پروګرام په باب خبرې وکړي.

کابل باختر د وږي دري ويشتمه :
په هغه ځانمرګى بريدکې چې نن دقندهار ولايت د دامان ولسوالۍ په مربوطاتوکې ترسره شو؛ درې تنه ملکي وګړي شهيدان او شپږ تنه نور ټپيان شول .
دغه پيښه نن سهار ددغه ولايت د دامان ولسوالۍ په مربوطاتوکې يوه روغتيايي کلينيک ته څيرمه رامنځته شوه.
دقندهار د والي ويندوى جاويد فيصل باخترآژانس ته وويل: ځانمرګى بريد کوونکى په چاوديدونکو توکوبار خپل موټر يوه روغتيايي کلنيک ته څيرمه وچاوه چې له امله يې يوه ښځه او دوه ماشوم شهيدان او شپږ تنه نور ټپيان شول .
ددغې پيښې ټپيان په ډير لنډوخت کې د قندهار ښار ملکي روغتون ته وليږدول شول او د روغتون مسوولينو دڅرګندونو له مخې: ددغي پيښې دڅلورو تنو ټپيانو روغتيايي حالت خراب بلل شوى دى.
دفيصل دڅرګندونو له مخې: د ځانمرګى بريدکوونکى هدف په سيمه کې د آيساف دځواکونو د وسايطو په کاروان بريد و.

کابل باختر د وږي دري ويشتمه :
په هرات کې دفوټبال دغوره ليک د دويم لاس د سياليو په دوام نن سهار دباخترټيم ددغه ولايت دامنيې قوماندانۍ د آريا پرټيم بريالى شو.
دهرات ولايت د ورزشي آمريت مرستيال ضياالحق ضيا باخترآژانس ته وويل: په دې لوبه کې د امنيې قوماندانۍ د آريا ټيم د دوو په مقابل کې په دريو سره دپامير ټيم ته ماتې ورکړه .
دغه سيالۍ د دولسو ټيمونو ترمنځ په دغه ولايت کې پيل شوې دي .
ديوبل خبر له مخې: دفوټبال دلومړى لاس د ټيمونو سياليو پرون مازيګر په هرات کې په يوې لوبې سره دوام وکړ.
دهرات ولايت د ورزشي آمريت مرستيال ضياالحق ضيا باخترآژانس ته وويل: په دې لوبه کې د آمو ټيم د صفر په مقابل کې له يوې سره دپيام آسيا پر ټيم بريالى شو.
دغه سيالۍ د لسو ټيمونو ترمنځ په دغه ولايت کې پيل شوې دي چې په دوام يې ټاکل شوې ده نن مازيګر دپامير او اماني ټيمونه لوبه وکړي.

کابل باختر د وږي دري ويشتمه :
دبدخشان ولايت دجرم ولسوالۍ د څارنوالۍ ودانۍ ته تيره شپه اور واچول شو .
دبدخشان ولايت د استيناف څارنوالۍ رييس محمد وزير جلالي باخترآژانس ته وويل: دغې ودانۍته دناپيژندل شويو کسانو له خوا اور اچول شوى دى او ددفترونو ټولې دوسيې او سندونه يې له منځه تللي دي .
ويل کيږي د پيښې د څيړنې لپاره له مرکزڅخه هيئت ټاکل شوى او دجرم ولسوالۍ ته استول شوى دى .
دپيښې جزئيات وروسته خپريږي .

کابل باختر د وږي دري ويشتمه :
په هلمند ولايت کې د رايې ورکوونکو د نوم ليکنې د پروګرام له پيل څخه تراوسه پورې دوه څلويښتو زرو تنو ښځو او نارينه و د رايې ورکولوکارتونه ترلاسه کړي دي.
د هلمند د انتخاباتو دخپلواک کميسيون مسوول عبدالهادي  باخترآژانس ته وويل: په دغه ولايت کې د رايې ورکولو د کارتونو د ويشلو د پروګرام له پيل څخه تراوسه پورې دوه څلويښتو زرو تنو نوي کارتونه ترلاسه کړي دي چې درې زره تنه يې ښځې دي .
د عبدالهادي دڅرګندونو له مخې: دهلمند ولايت په زياترو ولسواليوکې د رايې ورکوونکو د نوم ليکنې مرکزونه  پرانيستل شوي دي، خو ښځې د نارينه و په پرتله کم ددغه ولايت په ولسواليوکې د رايې ورکولو د کارتونو د ترلاسه کولو په خاطر مراجعه کوي .
عبدالهادي  ټينګار وکړ: يو شمېرمحدودښځو يواځې دهلمند په ګرشک ولسوالۍ کې د رايې ورکولو کارتونه ترلاسه کړي دي او د ده دڅرګندونو له مخې ددغه ولايت په نورو ولسواليوکې دښځو شمير کم دى.
د هلمند ولايت د انتخاباتو د خپلواک کميسيون رييس وايي چې د باغران او ديشو په ولسواليوکې تراوسه پورې د رايې ورکوونکو دنوم ليکنې مرکزونه نه دي پرانيستل شوي .
په همدې حال کې د هلمند ولايت د ښځو د چارو رييسې جميلې نيازي وويل:  د رايې ورکولو د نوم ليکنې په پروګرام کې د ښځو دکم ګډون علت د انتخاباتو دبهير په باب دهغوى نه پوهاوي دى.
دا وايي چې د هلمند دځينو ولسواليو ښځې د انتخاباتو او د رايې ورکولو دکارتونو په باب هيڅ پوهاوي نه لري.
د هلمند د ښځو د چارو رييسې ټينګار وکړ چې په دغه ولايت کې د ښځولپاره د رايې ورکوونکو د نوم ليکنې مرکزونه کم دي او د انتخاباتو خپلواک کميسيون بايد د نوم ليکنې زيات مرکزونه جوړکړي.
د هلمند د ولايتي شورا غړې  کريمې  ټينګار وکړ: په هلمندکې د لسګونو زرو ښځو له جملې څخه يواځې دريو زروتنو يې د رايې ورکولوکارتونه ترلاسه کړي دي چې ددغه بهير دوام د انديښنې وړ دى.
ټاکل شوې ده د هيواد دجمهوري رياست او د ولايتي شوراګانو ته انتخابات د ١٣٩٣ کال د وري د مياشتې په ١٦ نيټه ترسره شي.