20 October 2019

RSS Facebook

سوداگریز


تازه خبرونه

پایلې دې ځنډنۍ وي، خو چې رڼې وي

کابل / د تلې ۲۸ مه / باختر د انتخاباتو خپلواک...

د استاد رحمت الله رسا ادبي اثر چاپ شو

کابل/ د تلې٢٨مه / باختر د صلح سبزجهانى...

Youtube Player

khantry design

سوداگریز

سوداگریز

Monday, 08 October 2012 09:49

داسعارو بيه

کابل\باختر\د زمري دمياشتې ٢١مه 
دکابل دشهزاده سراى دصرافانو درئيس  دمعلوماتو له مخې : نن له غرمې مخکې دبهرنيو پيسو په مقا بل کې دافغا نۍ ارزښت په دې ډول دى
يوامريکايي ډالر پيرودل په     15ر52  افغانيو پلورل په 20، 52 افغانيو
يوانګليسى پونډ پيرودل په   20 ر83افغانيو پلورل په 30، 83افغانيو
يوه يورو   پيرودل په     50  ،  67 افغانيو پلورل په      60 ر67  افغانيو
دمتحده عربي اماراتو يودرهم پيرودل په  15 ، 14 افغانيو پلورل په  20، 14 افغانيو
يوسعودي ريال پيرودل په      75، 13پلورل  80 ،  13 افغانيو
زرهندي کلدارى پيرودل په 1000   افغانيو پلورل په 1010 افغانيو
زرپاکستاني کلداري پيرودل په 551افغانيو پلورل په 552 افغانيو
اوزر ايراني تو مان پيرودل په     20 ، 18  افغانيو پلورل په    30ر18 افغانيو.
 

کابل – باختر دتلې ١٧
دهيواد دختيځو او لويديځو زونونو د ولايتي شوراګانو د غړو ښځو لومړۍ ګډه غونډه په هرات ښارکې جوړه شوه.
دغه غونډه دهرات د ولايتى شورا په نوښټ دهيواد دبيلابيلو ولايتونو د ولايتى شوراګانو دغړو ښځو ترمنځ دتجربو او د افکارو د تبادلې او دمناسب چاپيرل د برابرولو په موخه د هرات ولايت ته دختيځو ولايتونو دفرهنګيانو له سفر وروسته جوړه شوې ده.
دباختر آژانس دخبر له مخې: په دې دوه ورځني غونډه کې دننګرهار، نورستان ، کونړ، لغمان، هرات،فراه ،غور او دبادغيس د ولايتى شوراګانو غړو ښځو ګډون کړي دي.
دسيمه ييز ارګانونو دخپلواکې ادارې د ولايتي شوراګانو دسمون رييس احمد خاموش ددغې غونډې دجوړيدو د هرکلى په ترڅ کې په ټولنيزو او فرهنګى برخوکې دهرات د ولايتى شوراګانو نوښونه او ځواکمى وستايلې.
ښاغلى خاموش ددغې غونډې دجوړولو هدف دهيواد دبيلابيلو ولايتونو د ولايتى شوراګانو دغړو ښځو له تجربو څخه استفاده وبلله او دغه غونډه يې دپوهې او تجربې د تبادلې په خاطر مناسب فرصت وباله.
دهرات د ولايتى شورا رييس ډاکتر عبدالظاهر فيض زاده هم دهيواد دختيځو ولايتونو د ولايتي شوراګانو دغړو ښځو ارزښتناک حرکت، په ناوړو دوديزو باورونو د برياليتوب په لاره کې يو تلپاتې حرکت وباله.
ده په هرات ولايت کې په رسنيو او په مدني او ټولنيزو مرکزونوکې د فعاليتونو دمناسبې فضا شتون دښځو دځواکمنى څرګندوى وباله.
دهرات د ولايتي شورا رييس دهيواد دبيلابيلو ولايتونو د اوسيدونکو دلرغونو دودونو او فرهنګونو دتبادلې په خاطر ددغه شان سفرونو تدارک ارزښتناک وباله او ويې ويل: دغه شان سفرونه او ليدنې کتنې کېداى شي ديو بل په حالت دهيواد د بيلابيلو ولايتونو د اوسيدونکو ديني پوهيدنې او دخلکو ترمنح دقومي ، ژبنيو او نژادي توپيرونو او تصعباتو دکمزورتيا سبب شي.
دهرات والي ډاکتر داود شاه صبا هم په ټولنزو ، فرهنګى او اقتصادي برخوکې، دهرات دښځو فعال او کارنده شتون ددغه ولايت دښځو دځواکمني بيلګه وبلله.
ده څرګنده کړه چې په دې غونډه کې برخه والې ښځې وکولى شي له رامنځته شوى فرصت څخه دخپلې ځواکمني د زياتوالې او دتجربو دتبادلې په خاطر استفاده وکړي.
دهرات والي په عدلي او قضايي برخوکې دهرات دسيمه ييزې ادارې برياليتوبونه په اشاره سره، ددغې غونډې له ګډون کوونکې سره دخپل برياليتوب دعواملو دشريکولو په خاطر ددغو مرکزونو تيارى اعلام کړ.
دهرات والي په همدې حال کې دهرات ولايت ته دهيواد دبيلابيلو ولايتونو د ولايتي شوراګانو دغړو ښځو دسفر هرکلى وکړ او زياته يې کړه: دغه شان سفربه دښځو د زيات پيوستون او دميرمنو پرخلاف د تاوتريخوالې دمخنيوي سبب شي.
ددغې غونډى ويناوالو ددغه شان پروګرامونو تدارک له لارې فساد سره دمبارزې، ولسواکى او ښيې حکومتوالى په بيلابيلو برخوکې د ولايتى شوراګانو دشتون دپياوړتيا په برخ کې يوه جدي اړتيا وبلله.
په هرات ښارکې دهيواد دبيلابيلو ولايتونو د ولايتي شوراګانو دغړو ښځو دوه ورځني غونډه په داسې حال کې جوړيږي چې مخکې له دې دهرات د ولايتي شوراګانو د رييسانو سراسري غونډه د ولايتي شوراګانو دقانون دبيا څيړنې په موخه په هرات ښارکې جوړه شوې وه .
 

کابل باختر دتلي  شپاړسمه
دبهرنيو چارو وزارت دويندوى مرستيال ډاکتر فرامرز  تمنا نن په يوه خبري غونډه کې د افغانستان او امريکا ترمنځ دګډ کميسيون دلومړى غونډې نتيجې بيان کړې اوخبر يې ورکړ چې په نږدې  راتلونکي  کې به دافغانستان دبهرنيو چارووزير دافغانستان او پاکستان ترمنځ د ستراتيژيکي تړون  دمسودې په باب  دخبرو په مقصد  اسلام اباد ته سفر وکړي .
دباختر اژانس دخبريال دخبر له مخې، ډاکتر تمنا دافغانستان او امريکا دګډ کميسيون لومړى غونډه چې ددواړو هيوادونو ترمنځ دستراتيژيکي  همکاريو دموافقه ليکونو په چوکاټ کې جوړه شوې ده نتيجې يې دافغانستان لپاره ګټورې وبللې او وي ويل دواړو لورو  په هغو خبرو کې چې  ترسره يې کړې دستراتيژيکي  همکاريو د موافقه ليکونو په چوکاټ  کې ددوه اړخيزو همکاريو دمسئلو په باب خبرې وکړې .
دده دڅرګندونو له مخې، افغانستان او امريکا دهمکاريوديو لړ مشخصو مواردو په باب موافقه  کړې ده چې په نږدې  راتلونکي کې به د دواړو هيوادونو دکاري ډلو له خوا تعقيب شي .
دګډ کميسيون لومړى  غونډه په امريکا  کې جوړه شوې ده .
دتمنا دڅرګندونو له مخې، ددغه کميسيون دويمه غونډه به  شپږ مياشتې وروسته په کابل کې جوړه شي .
ډاکتر تمنا دامنيتي  همکاريو دموافقه ليک په باب دخبرو دپيل په باب دافغانستان او امريکا دموافقې  خبر ورکړ او وي ويل چې دغه خبرې په نږدې راتلونکي کې پيليږي .
دبهرنيو چارو وزارت دويندوى مرستيال دغه راز په دې کنفرانس کې وويل چې دافغانستان دبهرنيو چارو وزير دامريکا  دکانګرس  له يو شمير غړو او ددغه هيواد دملي امنيت له سلاکار  سره خبرې اترې کړي دي .
دبهرنيو چارو وزارت دويندوى مرستيال دافغانستان او پاکستان ترمنځ دستراتيژيکي  همکاريو د تړون په باب دخبرو په اړوند ديوې پوښتنې په ځواب کې وويل: ددواړو هيوادونو ترمنځ  دستراتيژيکي همکاريو دسند لاسليک په وروستيو کلونو کې په بيلابيلو برخو کې دافغانستان او پاکستان ترمنځ ستر اوڅرګند رول لري او دغه سند کولاي شي ددوه اړخيزو همکاريو پراخ طيف  احتوا کړي .
دده  د څرګندونو له مخې،  دتروريزم ، ترانزيت او دنورو مسئلو په باب خبرې کيداي شي  دغور وړ وي .
ده وويل  هغه څه چې دافغانستان دخلکو په ملي ګټه  وي دافغانستان دحکومت له خوا طرح  ليږي .
ده دغه ر از په ايران  کې دافغان بنديانو او اسلام اباد ته دافغانستان دبهرنيو چارو  دوزير دسفر خبر ورکړ .
 

کابل باختر دتلي  شپاړسمه
  دملي امنيت دلوى رياست موظفينو  دغزني ولايت په مربوطاتو کې  دځانګړو عملياتو په بهير کې  پنځه تنه ملکي وګړي  دطالبانو له بندڅخه ازاد کړل .
دملي امنيت دلوى رياست مطبوعاتي دفتر باختر اژانس ته خبر ورکړ: دغه کسان دغزني ولايت  دناوې اومقردولسواليو اوسيدونکو  ، روزي محمد ، محمد حنيف  ، محمد اکرام ، فتح الله  او عبدالسلام دي  چې  اتلس ورځې مخکې دوسله والو طالبانو له خوا  تښتول شوي  و او د غزني  ولايت دناوې ولسوالۍ دسپينې خولې په سيمه کې  په يو پټنځاى کې ساتل کيدل .
يوه  اړونده خبرځاى وويل: دغه کسان دوسله والو له خوا  وهل شوي او ډبول شوي دي او په لاسونو او پښو  کې يې ځنځير او زولانه اچول شوي وو چې دملي امنيت دلوى رياست دموظفينو په ځانګړو عملياتو کې ازاد کړي شول
ويل کيږي چې ددغې پيښې  په اړوند دحاجي  شيرجان او جعفر په نومونو  دوه تنه طالبان نيول شوي دي او پيښه څيړل کيږي. 
ديوبل خبر له مخې، دملي امنيت دلوى رياست موظُفينو په  بچه حاجي مشهور  نصير احمد او دقاسم په نومونو دوه تنه تروريستان د سيمه ئيزو مشرانو او دپوځي کسانو دترور په تور دغزني ولايت په مربوطاتو کې نيولي دي .
په يوه بله پرمختيا کې  دملي امنيت دلوى رياست موظفينو دغزني ولايت دکليو دبيا  جوړولو او پراختيا درياست   کارکوونکي ابو خير  چې طالبانو ته يې دعشر  اوزکات  دراټولولو دنده لرله  طالبانو له څو ابلاغيو سره لاس په لاس نيولى دى .
دغه راز دملي امنيت دلوى رياست موظُفينو  دغزني ولايت دپوهنې رياست کارکوونکي محمد حنيف  نن دبډې اخستنې په وخت کې ونيوه  ديادونې وړ ده چې دغه پيښې  تر څيړنې لاندې دي .
 

کابل باختر دتلي  شپاړسمه
  دهرات ولايت داوبې ولسوالۍ پوليس نن دانسان تښتوونکو له منګولو څخه ددوو باروړونکو موټرونو دچلوونکو په خوشي کولو بريالي شول .
  دهرات  ولايت دامنيې قوماندانۍ دامنيت آمر مل پاسوال حميدي باختر اژانس ته وويل: دغه دوه تنه څه موده مخکې  داوبې او دچشت شريف دولسواليو ترمنځ سړک کې تښتول شوي وو او داوبې ولسوالۍ دتګاب سورساحې ته ليږدول شوي و  .
يوه اړونده خبرځاى وويل:  تښتول شوي کسان د پوليسو دعملياتو له امله ازاد کړي شول خو انسان تښتوونکي دعملياتو له پيل کيدومخکې په تيښتې بريالي شول او دامنيتي ارګانونو تر څارنې لاندې دي .
 

کابل باختر دتلي  شپاړسمه
دمشرانو جرګې لومړي نايب محمد علم ايزديار نن په کابل کې دفرانسې دسفارت  له سياسي مسوول ښاغلي ايف مانويل سره دخپل کار په دفتر کې وکتل .
دمشرانو جرګې مطبوعاتي دفتر باختر اژانس ته خبر ورکړ:  په دې کتنه کې دسنا مجلس لومړي نايب دجهاد اومقاومت په دوران کې اوپه وروستيو  کلونو کې  دافغانستان په بياجوړولو کې ددغه هيواد دمرستو  له امله قدرداني وکړه او په بيلابيلو  برخو او په تيره بيا دپارلماني اړيکو په ټينګښت  کې يې ددغه هيواد د لازياتو همکاريو غوښتنه وکړه .
  په مقابل کې  ښاغلي مانويل له افغانستان سره ددغه هيواد دهمکاريو ددوام ډاډ ورکړ او ژمنه يې وکړه  چې  دافغانستان دپارلمان او دفرانسې دپارلمان ترمنځ دبين الپارلماني  په ټينګښت  کې  به هلې ځلې وکړي .
دغه راز محمد علم ايزديار دکابل ښاروالۍ له مرستيال ، دکابل ښار داوومې ناحيي له رييس او داوومې حوزي د پوليسو له مسوولينوسره دغونډې په ترڅ کې د پدوله ددښتې دطرحې او تطبيق په باب په داسې حال کې چې دمشرانو جرګې دمصوونيت اوامتيازونو دکميسيون ځينې غړي هم حاضر وو ديوې غونډې  په ترڅ کې خبرې وکړې .
  په دې کتنه کې دوى دمعلوماتو دوړاندى کولو په ترڅ کې څرګنده کړه چې په دې  پروژه کې داستوګنې  نږدې ١٢٠  نمرى ځمکه دکربلايي شير حسن او دحاجي رمضان  په نومونو داشخاصو له خوا غصب  شوي  خو دملي پوليسو او دښاروالۍ داوومې ناحيي دمسوولينو له هلوځلو سره سره دغه کسان نيول کيږي  خو له دوو  ساعتونو توقيف وروسته دلوى څارنوالي له خوا خوشي کيږي .
په دې  غونډه کې دسنا مجلس  لومړي نايب په خپل وخت دښاري پروژو دتطبيق په باب خبرې وکړې او ټينګار يې وکړ چې دکابل ولايت امنيه قوماندانۍ دى په دې ساحه کې دخلکو دملکيتونو دغصب  دمخنيوي  په مقصد دپوليسو  امنيتي پوستې جوړې کړي او هم دى کابل ښاروالۍ دکاردګړندي کولو په خاطر  تخنيکي وسايل ددغې پروژې دکارګرانو  په واک کې ورکړي .
  ديوبل خبر له مخې، دمشرانو جرګې دويم نايب حاجي رفيع الله ګل افغان نن  دالمپيک  دملي کميټې  له رييس او له  يو شمير ورزشکارانوسره دخپل کار په دفتر کې وکتل .
په دې کتنه کې دالمپيک دملي کميټې رييس محمد ظاهر اغبر  ددغه مرکز برياليتبونه په ګوټه کړل او وي ويل دافغانستان ورزشکارانو وکولى شول ددغه هيواد بيرغ په  ٢٠١٢ المپيک کې دنړۍ دڅه دپاسه  ٢٠٠ هيوادونو ترمنځ ورپوى او دمډال راوړونکو هيوادونو ترمنځ خپل نوم وليکي چې دغه برياليتوب دورزش او ورزشکارانو دراتلونکي لپاره دښه زيري او وياړ سبب دى .
دمشرانو جرګې دويم نايب  دغه راز دلندن د ٢٠١٢ کال په سياليو کې دورزشکارانو ګډون دورزش په برخه کې  يو مثبت ګام وباله او ژمنه يې  وکړه چې په نږدې  راتلونکي کې به دالمپيک  ملي کميټه وګوري او دورزشکارانو ستونزې به له نږدې واوري .
 

کابل باختر دتلي  شپاړسمه
  په کاپيسا ولايت کې دناټو دپوځيانو د ډزو له امله دوه تنه ملکي وګړي ټپيان شول .
  دغه پيښه  نن سهار دکاپيسا ولايت دتګاب ولسوالۍ  په جويبار سيمه کې رامنځته شوه .
ويل کيږي په دوو تنو ځوانانو چې په يوه غونډۍ کې دسون دموادو په راټولولو  بوخت وو دناټو د پوځيانو له خوا بريدوشو او ټپيان شول .
دکاپيسا ولايت دپوليسو يو مسوول  سمونوال امان الله باختر اژانس ته وويل: دناټو ځواکونوپه دغو دوو تنو تنکيو ځوانانو دياغيانو ګومان وکړ اوبريد يې پرې وکړ .
په همدې حال کې په کاپيسا کې دناټو په يو روغتيايي کلينيک کې ډاکترانو د پيښې  ديو ټپي ملکي وګړي  روغتيايي حالت خراب وباله .
دناټو پوځيانو  تراوسه پورې په دې اړوند نظر نه دى څرګند کړى، پخوا هم دښځو او نجونو په ګډون  نهه تنه  ملکي وګړي چې دکاپيسا ولايت په يوه غوندۍ  کې  دسون دموادو په راټولولو بوخت وو دناټو د جنګي  الوتکو  په بريد کې ووژل شول .
 

کابل باختر دتلي  شپاړسمه
دمشرانو جرګې په خپلي ننني غونډه کې  دالمپيک دلوبو مډال راوړونکي روح الله نيکپا  اوپه دغو سياليو کې نور برخه وال ورزشکاران  دمډالونو او ستاين ليکونو په ورکولو سره وستايل .
دمشرانو جرګې مطبوعاتي دفترباختر اژانس ته خبر ورکړ: په دې غونډه کې له هغه وروسته چې دسنا مجلس  رييس فضل  هادي مسلميار  دهيواد دورزشکارانو وياړنې دافغانستان ټولو خلکو ته دسرلوړي  او ستر وياړ سبب وباله، دالمپيک  دملي کميټې رييس محمد ظاهر اغبر په  ټولنه کې دورزشکارانو دمقام او دوياړنو  په ترلاسه کولو او په هيواد کې دملي يو والي په ټينګښت کې د هغوى درول په باب خبرې وکړې او سناتورانو ته يې  بلنه ورکوه چې  په يومناسب وخت کې دورزش  اداره وګوري او له نږدې له ورزشکارانو سره ليده کاته وکړي .
وروسته روح  الله نيکپا  دسنا مجلس  له خوا دورزشکارانو دستاينې په نسبت  خپلې ولولى  بيان کړې او دالمپيک دسياليو دمډال په ترلاسه کولو کې يې دافغانستان ټول خلک شريک وبلل .
ده داستازو له مجلس  څخه وغوښتل چې دهيواد دمقننه  قوې په توګه دښو زمينو په برابرولو او دورزش  دادارې دبودجې په زياتوالي اقدام وکړي .  وروسته  دمجلس اداري هيئت دمجلس ستاين ليک  دمجلس دملي کميټې رييس ته اوهم مډالونه او ستاين ليکونه ورزشکارانو اوښوونکو ته ورکړل .
 

کابل-باختر دتلې ١٦
د افغانستان- امریکا متحده ایالاتو د دوه اړخیز کمیسون د پرانستلو د ناستې په اړه دافغانستان د بهرنیو چارود وزیر ډاکټر زلمی رسول اودامريکا بهرنیو چارود وزیرې هیلری کلنټن ګډه وينا، د افغانستان اسلامي جمهوریت دبهرنیو چارو دوزیر زلمی رسول اود امریکا دمتحده ایالاتو بهرنیو چارو وزیرې هیلری کلنټن د تلې په ۱۲ مه د افغانستان- امریکا د دوه اړخیز کمیسیون د پرانیستې په ناسته کې ګډون وکړ کوم چې د افغانستان-امریکا ترمنځ د اوږد مهاله ستراتیژیکو همکاریو تړون له لارې منځته راغلې او د روان کال په لومړیو کې دافغانستان دجمهور رئيس حامد كرزی اوامريکا جمهور رئيس اوباما  په کابل کې لاسلیک کړ.د بهرنیو چارو وزیر زلمی رسول او بهرنیو چارو وزیرې هیلری کلنټن د افغانستان او امریکا متحده ایالاتو د حکومتونو او ولسونو ترمنځ د یوه قوي، پراخه او اوږد مهاله ستراتیژیکو همکاریو د تړون په اړه خپلې ژمنې تکرار کړې. د ستراتیژیکو همکاریو دغه تړون په دوه اړخیزو ګټو او موخو، او همداراز د دواړو خپلواکو هیوادونو  ترمنځ په دوه اړخیز درناوی ولاړ دى. د بهرنیو چارو وزیر زلمی رسول او بهرنیو چارو وزیرې د افغان ولس مهمې لاسته راوړنې، چې د امریکا متحده ایالاتو او نورو نړیوالو همکارانو په مرسته یې لاسته راوړې دي، په رسمیت وپیژندې. د روغتیا او پوهنې په ګډون، دغه بریالیتوبونه د ګډو سرښندنو او پانګو له لارې ممکن شول.د بهرنیو چارو وزیر زلمی رسول او بهرنیو چارو وزیرې هیلری کلنټن او د دوی اړوندو  پلاوو، چې مشري یې د بهرنیو چارو مرستیال وزیر جاوید لودین او ځانګړی استازی مارک ګراسمن پر غاړه وه، د ستراتیژیکو همکاریو د دغه تړون د مختلو اړخونو په یوه ګټور، هراړخیز بحث کې ګډون وکړ.افغانستان او د امریکا متحده ایالاتو تائيد کړه چې یو ټول شموله، آزاد او روڼ سیاسی لیږد، د یوه ولسواک افغانستان اوږد مهاله بریالیتوب، پرمختګ او ټیکاو لپاره اړین ده. افغانستان د جمهوری ریاست، پارلمانی او ولایتی شوراګانو د ټول ټاکنو په موخه، لکه څنګه چې د جمهور رئيس کرزی د جولاي د مياشتې په ۲۶ مې شمیرې فرمان کې ذکر شویده، د یوه هراړخیز مهال ویش د جوړولو په اړه خپله اراده بیاڅرګنده کړه. امریکا متحده ایالات به د افغانستان د ټول ټاکنو څخه د ملاتړ لپاره د تخنیکی او مالی مرستو لړۍ روانه وساتي.د بشري حقونو او د دموکراتیکو ارزښتونو خوندي ساتنه او ترویج، زمونږ د تل پاتې ملګرتیا یوه بنسټیزه بڼه ده. متحده ایالتونه د افغان دولت هڅې څرنګه چې د توکیو د متقابل کاري مسوولیت په غونډه کې څرګنده شوه، او همداراز د جمهوررييس کرزي فرمان چې د حکومت دارۍ او د قانون د حاکمیت پیاوړتیا او د خپلواکې مدنې ټولنې د یو ځواکمن رول خوندي ساتنې په اړه د جولای په ۲۶ نېټه صادر شوی وو، ملاتړ کوي. دواړه خواوې یو ځل بیا د بشري حقونو د پرمختیا او اړونده قوانین لکه هغه قوانین چې په قضاکې د ښځو لاسرسي ته ډېروالی بخښي، د پلي کولو پیاوړتیا لپاره په اړوندو ستکورونو کې، د قضا او مدنې ټولنو په شمول، د کار کولو ټینګار وکړل.د هغو اصولو پر بنسټ چې د ۲۰۱۱ کال د نوامبر په میاشت کې د استانبول په کنفرانس پرې ټینګار وشو او د ۲۰۱۲ کال د جون په میاشت کې د وزیرانو په کچه د آسیا زړه د کنفرانس په بهیر کې یو ځل بیا پرې ټینګار وشو، افغانستان او د امریکا متحده ایالتونه د یو سوله ایز او هوسا افغانستان او د سیمي د ټیکاو د ډېروالي لپاره د سیمه ایز نوښتونو د جوړولو دوام باندې، یوځل بیا ژمنه وکړل. افغانستان او د امریکې متحده ایالتونه د لېږد د بهیر د ترسره شوي پرمختګ څخه، چې په ترڅ کې یې ۷۵ سلنه افغان وګړي په هغو سیمو کې ژوند کوي چې امنیتي مسوولیت یې د افغان ملي امنیتي ځواکونو په لاس کې دي، هر کلی وکړل. څرنګه چې د استراتیژیکو همکاریو په تړون کې هوکړه شوی وو، متحده ایالتونو یو ځل بیا د افغان ملي امنیتي ځواکونو په تجهیز، مشورت او ملاتړ باندې پر خپل هوډ ټینګار وکړ. څرنګه چې د ستراتیژیکو همکاریو په تړون کې هوکړه شوی وو، دواړه خواوې سترګې په لاره دي تر څو په دې نږدۍ راتلونکي کې د دوه اړخیز امنیتي تړون لپاره خبرې اترې پېل کړي. د افغانستان او پاکستان په چارو کې د امریکې د ځانګړي استازي مرستیال، جیمز وارلیک به د امریکي له خوا او په امریکې کې د افغانستان سفیر، اکلیل حکیمي به د افغانستان له خوا د خبرو اترو مشري په غاړه لري. د دواړو خواوو متخصصین به د منځ مهال او اوږد مهال امنیتي همکاریو یو پلان د امریکا د متحده ایالتونو د غیر ناټو متحد په  توګه  د افغانستان د نقش پر بنسټ، جوړوي. د امریکي متحد ایالتونه او افغانستان  د افغانانو په مشرۍ او د افغانانو له خوا د یو داسې سولې بهیر څخه ملاتړ کوي، چې له لارې به یې کسان او ډلې ټپلې له القاعدې سره خپلې اړیکي وشلوي، له تاوتریخوالي څخه لاس واخلي، او دافغانستان اساسي قانون چې د ټولو افغانو نارینه او ښځینه حقوق پکې خوندي وي، ومني. څرنګه، چې نړیوالې ټولنې په بن، او بیا په توکیو کې په بیا ځلي توګه په ډاګه کړي ول، دا ټول موارد د هر ډول خبرو اترو اړینې پایلې دي. د ۲۰۱۴ کال امنیتي او سیاسي لیږد څخه وړاندې د سولې لپاره د افغانانو د هڅو پرمختیا باندې په ټینګار کولو سره، دواړو خواوو د وسله والو مخالفینو سره د مختلفو کانالونو او اړیکو د تعقیبولو پر اهمیت باندې ټینګار وکړل. د سولې لپاره د افغانانو له هڅو څخه سیمه ایز ملاتړ ته په هرکلي ویلو سره،.  دواړه خواوو د افغانستان-پاکستان- او امریکې ډله ایز محور له لارې ، چې د دې میاشتې په وروستیو کې به ترسره شي د پاکستان سره د پرمختللي همکاریو او همغږیو په اړه خبرې اترې وکړې. مونږ پر نړیوالې ټولنې غږ وکړ، تر څو د افغان د پخلاینې له بهیر څخه د ملاتړ لپاره محسوسیدونکي ګامونه پورته کړي. افغانستان او د امریکې متحده ایالتونو یو ځل بیا پر ټینګې ژمنې ټینګار وکړل، چې پر سیمه ییز ترانزیت، سوداګرۍ، او پانګونې پراختیا باندې او په سیمه کې د اقتصادي همکاریو، سوداګریز خپلواکی، او د خلکو تر منځ د اړیکو پراختیا باندې، سره په ګډه کار کوي. افغانستان او د امریکې متحده ایالتونو په افغانستان کې د کار پیداکولو او د ښځینه متشبثینو په شمول د کوچني او منځنی متشبثینو د ملاتړ د هڅولو له لارې اقتصادي ودې باندې ژمنه وکړل. د امریکې متحده ایالتونه ژمن دی چې افغانستان سره د یو پروګرام په جوړلو کې مرسته وکړي تر څو د استخراج په صنعت کې افغاني وړتیاوې لا زیات پیاوړی کړي. دواړه خواوې په دې پوهیږي چې د یوې باثباتې سیمې او بریا افغانستان لپاره، د پرمخ تللي افغانستان طبیعي سرچینې په واضح توګه ډېر اهمیت لري. څرنګه چې د متقابل مسوولیت کاري چوکاټ په شمول د ۲۰۱۲ کال د جولای په میاشت کې د توکیو په کنفرانس کې په ډاګه شوه؛ د کابل او لندن د رسمي اعلامیو او د افغان دولت د رورانو ریفورمونو پر بنسټ چې د خپل د خلکو مالي سیستم پیاوړی کړي، د بودیجې په اجرآتو کې ښه والی راولي او د عوایدو د راټولولو کچه لوړه کړي؛ د امریکې متحده ایالتونه به د افغانستان دولت سره کار کوي تر څو د پراختیایې همکاریو ۵۰ سلنه د دولت د بودیجې له لارې او ۸۰ سلنه مرستې د افغان دولت د لومړیتوبونو پر بنسټ برابره کړي. دواړه خواوې به دې موخو ته د رسېدلو د پرمختګ په هکله په راتلونکی دوه اړخیز کمسیون کې رپوټ ورکړی.  همدراز دواړه خواوې د اداري فساد پر وړاندې د مبارزې پر اهمیت باندې هم ټینګار وکړل. د امریکي متحده ایالتونو یو ځل بیا پر خپل ژمنې ټینګار وکړ تر څو امریکایې کمپنۍ، خصوصي سکتورونه، او نړیوال او سیمه ییز مالي بنسټونه وهڅوي تر د افغانستان د طبیعي سرچینو په پراختیا، کرنې او کرهنیز سوداګرۍ کـې پانګـونه وکـړي. د یو پیاوړی قانونـي او منظم کاري چــوکاټ په رامنځته کولـو سره به د افغانسـتان دولت وتوانېږي بهرنۍ پانګونه جذب کړي. دواړه خواوې به دې موخو ته د رسېدلو د پرمختګ په هکله په راتلونکی دوه اړخیزه کمسیون کې رپوټ ورکړي. زمونږ د ښوونیز او کلتوري تبادلې مهم پروګرامونه د خلکو تر منځ اړیکې او د تل پاتې استراتیژیکو ملګرتیاوو پراختیا، اهمیت انعکاسوي. موږ په دې خوشحاله یو، چې د لومړي ځل لپاره د فول برایت په پروګرام کې چې د ۲۰۱۳ کال په مني ترسره کېږي د دوکتورا د زدکړې لپاره افغان کاندیدانو ته به هم برخه ورکړ شي. دواړه خواوې څرنګه چې د دوه اړخیز کمسیون په پراخه اجندا کې په ډاګه شوی وو؛ پر ګډو ګټو، چې د افغانستان او د امریکې متحده ایالتونو له اړیکو څخه ملاتړ کوي، ټینګار وکړ. دواړه خواوې خپل هوډ په ډاګه کړل تر څو د دوه اړخیز کمسیون له لارې چې په راتلونکي میاشتو کې ترسره کېږي، د استراتیژیک مشارکت د تړون د پلي کولو لپاره خپلې همکارۍ زیاتې کړي
 

کابل-باختر دتلې ١٦
***دافغانستان- امریکاد متحده ایالاتو ددوه ارخیزه کمیسیون د پرانستلو په ناسته کی دافغانستان دبهیرنیو چارو دوزیر داکتر زلمی رسول وینا،د بهرنیو چارو وزیره جلالتمآب هیلری کلنټن، خوږو ملګرو او همکارانو، د افغانستان او امریکا متحده ایالاتو د دوه اړخیز کمیسون د پرانیستې ناستې د مراسمو د کوربتوب او تودې میلمه پالنې  له امله دتاسو څخه ډيره زیاته مننه کووم.مونږ نن ورځ په داسې وخت کې سره وینو چې تیره میاشت په لیبیا کې سفیر سټیفن او د هغه همکارانو په یوې خواشینې او غمجنې پیښې کې خپل ځانونه له لاسه ورکړل. اجازه راکړې چې یو ځل بیا د خپلې خواشینۍ او ډاډګیرنې مراتب ښاغلې وزیرې تاسې ته؛ په بهرنیو چارو وزارت کې ستاسو همکارانو ته؛ او د سفیرسټیفن او د هغه د دریو همکارانو کورنیو، ملګرو ته وړاندې کړم. په حقیقت کې دا زمونږ د دواړو ملتونو د عسکرو، ډیپلوماټانو، مرستندویه کارکوونکو او خلکو د بی شمیره سرښندنو لامل ده چې مونږ ته یې دا وخت په لاس را کړ ترڅو د یوی ټینګې ملګرتیا او کلکې همکارۍ د بنسټ ډبره کیږدو،  او د خپلو خلکو د راتلونکي عامه امنیت او سولې، پت او فرصت منځته راوړلو په موخه د خپلو هڅو لړۍ روانه وساتو.نننۍ ناسته بی سارې او تاریخي ده او ماته د خوښۍ ځای دى چې په دغه ناسته کې ګډون کووم. د ګډو ارزښتونو، ګډو ګټو او دوه اړخیز درناوي ، او راتلونکې سولې او سوکالۍ د ژمنې پربنسټ د افغانستان او امریکا متحده ایالاتو ترمنځ منځته راغلې د ستراتیژیکو همکاریو دغه تړون د دواړو هیوادونو ترمنځ د اړیکو یو نوی باب پرانیزي.موږ دغې همکارۍ ته د بنسټیزو خصوصیاتو له لارې ورنږدې کیږو کوم چې زموږ ملي ګټې تامینوي او په سیمه کې د امنیت او ثبات لپاره محوري ځانګړتیا لري. موږ به د خپلو ستراتیژیکو موخو، خوندیتوب، امنیت او د افغان ولس د هوساینې په لور خپله د پرمختګ لړۍ روانه وساتو.آغلې وزیرې، لس کاله مخکې موږ د جنګ، تاوتریخوالی او ورانیو د اوږدې تورې دورې څخه راوتل پيل کړل. د افغان ولس ژوند ته د امنیت بیرته راوستلو ننګونې او افغانستان په یوه باثباته او ولسواکه هیواد بدلول ستونزمن ښکاره کیدل. سره له دې، نن ورځ موږ د نړیوالې ټولنې ویاړمن غړیتوب لرو او په چټکۍ سره د یو با امنه او په ځان بسیا راتلونکي په لور روان یو. زموږ همکاریو د نړیوالې سولې او امنیت ګواښونو ته ځواب ورکړ او افغانستان یې د یو خوندي، ولسواکه او سوکاله راتلونکی په لور روان کړ.باور لرم چې دغه دوه اړخیز کمیسون به زموږ د اړیکو او همکاریو د ترټولو مهمې غونډې په لور وده وکړي، یوه داسې غونډه چې زموږ د ګډو ګټو او موخو  د تحقق په خاطر د دواړو هېوادونو ژمن فعالین، د ټول اړخیزو خبرو اترو او د ګډو اقداماتو تعریف او پلي کولو لپاره، په دې غونډه کې سره را ټول کړي.   لکه څنګه چې د رهبرۍ  ګډه کمیټه او کاري ډله د همکارۍ د غښتلی کولو او زموږ د همکاریو مختلفو اړخونو چې د ستراتیژیکو همکاریو د تړون لپاره د منلو وړ وي په خوا د پرمختګ څارنه روانه ده، آغلې وزیرې غواړم تاسې ته ډاډ درکړم چې افغانستان زموږ د تیرې لسیزې ګډ بریالیتوب، پرمختګ، د پایلو وړاندې کولو، او په مخکې پرتو ننګونو سره مبارزې  ته په بشپړه توګه ژمن دى.زموږ مخ ته مهم لومړیتوبونه پراته دي، چې په مجموع کې د افغانستان د اوږد مهاله سولې، ثبات او هوساینې لپاره اړین دي. موږ د لیږد بهیر روان پرمختګ او د خپلو همکارانو اوږد مهاله ژمنو چې افغان امنیتي ځواکونو ملاتړ به کوي، هڅولي یو. په دې برخه کې، د دې لپاره چې د دواړو خواوو قناعت ترلاسه شي  د دواړو هیوادونو ترمنځ په یوه پراخه دوه اړخیز امنیتی تړون خبرې اترې د لوړ اهمیت لرونکې دي.خوښ یم چې د امریکا متحده ایالاتو د دغه تړون په اړه د خبرو اترو د مشرتوب لپاره په خپل استازیتوب یو تکړه ډیپلوماټ، سفیر وارلیک، مؤظف کړی دى. همداراز سفیر حکیمي چې زمونږ د وړو ډیپلوماټانو له جملې څخه دى، به زموږ په استازیتوب د دغه بهیر مشرتوب په غاړه ولري. د دغې مهمې هڅې په مخته وړلو کې دوی دواړو او د دوی ټیمونو ته خپلې نیکې هیلې وړاندې کووم.آغلې وزیرې، پر دې برسیره به مونږ د سولې بهیر په ټینګه سره روان وساتو. دا د افغانانو یواځینې او مسلم حق دى او په افغانستان کې تاوتریخوالي ته د پای ټکی کیښودلو لپاره ترټولو ریښتینې لار ده. مونږ د افغانستان د راتلونکي ټیکاو لپاره د راتلونکو ټول ټاکنو اهمیت درک کړې. هغه به ډاډ راکوي، مونږ به ډاډمن کیږو چې اړین شرایط د آزادو، عادلانه او رڼو ټاکنو د ترسره کولو لپاره برابر دي.څرنګه مو چې د بشري حقونو پیاوړتیا، د سولې او بریالیتوب لپاره د سیمه ییزې همکارې زیاتوالي؛ بشري او ملی منابعو انکشاف؛ اداري فساد پر وړاندې مبارزې؛ حکومتوالۍ ښه والي، زیربناګانو جوړولو، عامه روغتیا او پوهنې؛ او تروریزم او بنسټ پالنې سره مبارزه روانه ساتلې، نو مونږ به د خپل ترټولو ستر او مهم ملګري متحده ایالاتو په جاری او اساسي مرسته باندې حساب کوو.او موږ به ټول دغه لومړیتوبونه په ځانګړې پاملرنې سره د افغان ښځو او نجونو د حقونو د دایمي پرمختګ پورې تعقیبوو ترڅو زمونږ په ټولنه کې د تل په څیر  په ټولنیز، سیاسی، اقتصادي، او کلتوري ژوند کې د دوی رول غښتلې شي.د دغه فرصت نه په ګټې اخیستنې سره غواړم چې د افغانستان او امریکا متحده ایالاتو د هغو ټولو څخه مننه وکړم چې د افغانستان او امریکا متحده ایالاتو ترمنځ ستراتیژیکو همکاریو ته په ټینګه او کلکه سره ژمن دي، او همداراز غواړم چې ستاسو د هوډمنو هڅو او زیات زیار له کبله مننه وکړم. موږ ته پرتې ننګونې ډیرې دي، خو زموږ د همکارۍ ژمنه هم ډیره ده. نو راځي چې له دغه فرصت څخه زیاته ګټه واخلو او د خپلې همکارۍ د بریالیتوب په موخه قوي بنسټ کیږدو ترڅو راتلونکې خوندي او روښانه کړو.آغلې، له تاسې څخه مننه.