22 February 2019

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل \ باختر\ د کب د مياشتې ۱ نېټه
کابل باختر د کب لومړى :
کابل ښاروالۍ په ښارکې د کثافاتو د اغېزمن مديريت په باب د پوهاوي ورکولو پروګرام پيل کړى دى .
د باختر اژانس دخبريال دخبرله مخې:
د کابل ښاروالۍ د تنظيف رييس بهزاد غياثي وويل: دا لومړنى ګام دى چې د کثافاتو د مديريت په لور اخيستل شوى دى.
ده زياته کړه: که چيرې وغواړو ښه مديريت ولرو؛ بايد بدلون  له خپل کور څخه  پيل کړو. له همدې امله کابل ښاروالۍ له يوې مياشتې راپدېخوا د هبيتات دفتر په مرسته د پوهاوى ورکولو پروګرام د شپږو مياشتو لپاره پيل کړى او د پوهاوي ورکولو پوسټرونه کور په کور ويشي.
بهزاد زياته کړه چې د پوهاوي ورکولو په پوسټرونوکې د وچ او لانده کثافاتو د جلا کولو په باب خلکو ته پوهاوي ورکول کېږي او ټاکل شوې ده کابل ښاروالۍ په راتلوونکې کې د کثافاتو د جلا کولو پروګرام پيل کړي. له همدې امله يې د پوهاوي ورکولو پروګرام پيل کړی دى چې په دې ډول هغه کثافات چې بيا جوړيږي؛ له لانده کثافاتو څخه  جلا کېږي، يوه برخه يې ښخول کېږي او بله برخه يې د بيا جوړولو لپاره فابريکې ته لېږدول کېږي .
  ختم_ ج _ اکرم

Wednesday, 20 February 2019 16:50

د جمهور رييس فرمان

کابل \ باختر\ د کب د مياشتې ۱ نېټه
د څيړنې د عالي ادارې د لوى رييس د ټاکنې په باب د افغانستان د اسلامي جمهوريت د جمهور رييس محمد اشرف غني فرمان !
د افغانستان د اساسي قانون د ٦٤ مادې د ١٣ فقرې د حکم او د څيړنې د عالي ادارې د قانون د اوومې مادې د لومړۍ فقرې له مخې، له رتبې څخه په بهر بست کې د څيړنې د عالي ادارې د لوى رييس په توګه د محمدنعيم حقمل ټاکنه منظوره ده.
  ختم_ ج _ اکرم

کابل \ باختر\ د کب د مياشتې ۱ نېټه
د افغانستان او ايرلند د کرکټ د ملي ټيمونو ترمنځ ٢٠ آوريزه سيالۍ سبا د کب د مياشتې په دويمه نېټه پيليږي.
د دواړو  ټيمونو لوبغاړو ويلي دي چې د سبا لوبې لپاره يې لازمې تياري نيولي دي.
د هېواد د کرکټ بورد وياند فريد هوتک د باختر آژانس خبريال ته وويل چې دغه لوبه سبا د افغانستان په وخت د ماښام په پنځه نيمو بجو په هندکې پيليږي.
د افغانستان د کرکټ ملي ټيم د مارچ د مياشتې تر  ١٩ نېټې پورې د ايرلند له ټيم سره د ۲۰آوريزې  پنځه يو ورځنى او يوه تست لوبه د ايرلند له ټيم سره ترسره کوي . 
د هېواد دکرکټ ملي ټيم کپيتان اصغر افغان ويلي دي چې له يوې مياشتې راپدېخوا په هند کې په تمرين بوخت دي .
دغه راز د ايرلند د کرکټ د ټيم کپيتان پاور سترلينګ ويلي دي چې دوى به هلې ځلې وکړي چې ښه لوبه نندارې ته وړاندې کړي.
اوس افغانستان د کرکټ په ۲۰ آوريزو سياليوکې د نړۍ په کچه ۸ مقام او د ايرلند ټيم ۱۷مقام لري .
ختم_ شکريه _ اکرم

کابل \ باختر\ د کب د مياشتې ۱ نېټه
د نشه يي توکو او مسکراتو پرخلاف د مبارزې  عدلي او قضايي مرکز د ابتداييه او استيناف محکمو، ٤٥ تنه د نشه يي توکو د قاچاقو د جرمونو په تور له  ١٣ مياشتو تر  ١٨ کلونو بند په سزا محکوم کړل .
د مسکراتو او نشه يي توکوپرخلاف دعدلي اوقضايي  مرکز وياند خالد موحد نن په خبروکې د باختر اژانس خبريال ته وويل چې دغه کسان څه موده مخکې د نشه يي توکو د قاچاقو د  ٢٥ پېښو په اړوند د هېواد له مرکز او ولايتونو څخه  د پوليسو له خوا ونيول شول چې د١٤٣٨کيلوګرامو نشه يي توکي، څه دپاسه  ٧٨کيلوګرامو کيميايي توکي او د ١٢٤ ليتر الکولي مشروبات د هېواد په مرکز او بهرکې درلودل.
  موحد وويل: دغه کسان د تيرې اوونۍ په بهيرکې د دغه مرکز د ابتداييه او استيناف محکمو  له خوا په مجازاتو محکوم شوي دي .
  ختم_ شکريه _ اکرم

 

کابل \ باختر\ د کب د مياشتې ۱ نېټه
د کابل د ځوانانو ټيم د (ورزش د نشه يي توکو دښمن دى) تر نامه لاندې سياليو کې د فوتسال جام اتل شو.
د افغانستان د فوټبال فدراسيون دمعلوماتو له مخې: دغه سيالۍ يوه اوونۍ مخکې په کابل کې د اتو ټيمونو ترمنځ پيل شوې او پرون پاى ته ورسيدې.
د دغوسياليو په پاى لوبه کې د کابل د ځوانانو ټيم غړی «ظاهر اسد» د دوو په وړاندې  په پنځو سره د دغوسياليو اتل شو .
  حسين خادمي، هادي جعفري او سلطان د کابل د ځوانانو د ټيم درې تنه لوبغاړي د دغو سياليو  ډير ښه لوبغاړي وپېژندل شول او د ټيم غوره کسانو ته د اخلاق کپ هم ورکړای شو.
  ختم_ شکريه – اکرم

کابل \ باختر\ د کب د مياشتې ۱ نېټه
د افغانستان  د جمهوري رياست د چارو د ادارې رييس عبدالوحيد قتالي د هېواد د فوټبال فدراسيون له مشرتابه سره وکتل .
د هغې خبرپاڼې له مخې چې د فوټبال فدراسيون د مطبوعاتي دفتر له خوا باختر آژانس ته رسسيدلې ده، ويل شوي دي چې قتالي په دې کتنه کې د فدراسيون نوي سرپرست ته ډاډ ورکړ او ويې ويل چې ددغه ورزش ودې ته به هڅې وشي.
  دا په داسې حال کې ده چې د فوټبال  فدراسيون ځينې مسوولين مخکې له دې ويلي و چې د لوى څارنوالی د څيړونو د لړۍ د اوږدوالي په دليل ددغه فدراسيون دپخواني رييس له خوا د فوټبال د ملي ټيم د نجونو دجنسي ځورونې په تور  د څيړلو د فوټبال دپروګرامونو ځينې  پروګرامونه له ستونزو سره مخامخ شوي دي.
  ختم_ شکريه _ اکرم

کابل \ باختر\ د کب د مياشتې ۱ نېټه
درې تنه وسله وال طالبان په سمنګانو ولايت کې دپوځيانو له خوا ونيول شول .
د سمنګانو د پوليسو وياند د باختر آژانس خبريال ته وويل چې دغه وسله وال طالبان پرون د کوز دره صوف ولسوالۍ د بياتان او بازارک  په کليوکې د وليد-  ٣٧ په عملياتوکې د شاملو ځواکونو د هڅو له امله ونيول شول .
خبرځاى زياته کړه چې ددغوعملياتو په بهيرکې د دښمن يو کلاشينکوف، يوه پرتله او څلور موټرسايکلونه دپوځيانو لاس ته ورغلي دي .
دغه راز په دغې سيمې کې د طالبانواووه ښخ کړى شوي ماينونه هم د ماين پاکۍ  د ټيمونو له خوا کشف او شنډ کړى شول.
  ختم_  شکريه _ اکرم

کابل \ باختر\ د کب د مياشتې ۱ نېټه
د سمنګانو د کرنې، اوبو لګولو او مالدارى رياست په روان کال کې څه دپاسه  ٢٤١ متريک ټنه اصلاح شوي غنم د دغه ولايت کروندګرو ته دکښت په خاطر ويشلي دي .
  د سمنګانو  د کرنې، اوبو لګولو او مالدارى رييس محمد رحمان ارغنديوال  وويل چې دغه اصلاح شوي غنم ددغه ولايت د مرکز او ولسوالۍ په کچه پر ٤ زره ٨٢٤ کروندګرو وويشل شول .
  ده وويل چې د دغه رياست د کرنې د چارو د آمريت مسلکي کارکوونکو  بزګرانو ته د غنمو د کښت، راټولولو  او خړوبولو په اړوند عملي او نظري زده کړې ورکړې دي .
ختم_  شکريه_ اکرم

کابل \ باختر\ د کب د مياشتې ۱ نېټه
د کورنيو چارو وزارت سرپرست په يوه غوڅ اقدام کې د پوليسو ځواکونو ته لارښوونه کړې ده چې تروريستان د جګړې په ډګرکې له منځه يوسي.
مسعود اندرابي چې نوى د کورنيو چارو وزارت د سرپرست په توګه ټاکل شوې دى، په کابل کې د ولايتونو له امنيه قوماندانانو او د پوليسو د مقاماتو او مسوولينو په يوه غونډه کې دغه لارښوونه صادره کړې ده.
  ده  د پوليسو په سياسي واک ټينګار وکړ او ويې ويل: پوليس بايد يرغليز حالت  غوره کړي.
د مسعود اندرابي دغه څرګندونې چې په رسنيو کې په پراخ ډول منعکس شوى دى؛ کيداى شي د پوليسو په فعاليتونوکې نوې پاڼه پرانيزي.
دغه راز د کورنيو چارو وزارت سرپرست خبر دارى ورکړى دى چې د لوړ رتبه دولتي مقاماتو په ګډون هيڅوک نه شي کولاى چې د پوليسو د دندو د اجرا کولو مخه ونيسي .
اندرابي د ټولو ولايتونو امنيه قوماندانانو ته لارښوونه کړې ده چې د دندې د اجرا په وخت کې بايد د پوليسو ملاتړ او ساتنه وشي.
د کورنيو چارو وزارت د وياند د دفتر سرپرست نصرت رحيمي په دې باب د باختر آژانس خبريال ته وويل: د هېواد د مرکز او ولايتونو د پوليسو قوماندانانو ته دغه راز لارښوونه شوې ده، هغه  زور واکان، دولتي مقامات او هغه ډلې ټپلي چې د دندې د اجرا کولو په وخت کې پوليسو ته سپکاوي کوي او يا پوليس وهي او ډبوي؛ وپېژني.
له بله پلوه د کورنيو چارو وزارت پرون په دې باب يوه اعلاميه خپاره کړې ده چې پکې ويل شوي دي: د هغو کسانو په وړاندې چې د پوليسو په مقابل کې له زور څخه کار اخلي؛ د جزا کود د دويمې مادې د درېيم فصل له مخې ورسره جدي او قانوني چلند کېږي .
د افغانستان د جزا قانون په  ٣٥٥ ماده کې حکم کړى دى: هغه کسان چې دعامه خدمتونو دموظفينو د دندې د اجرا کولو مخه نيسي؛ په لنډې مودې بند او يا له ديرشو څخه تر شپيتو زرو افغانيو د نغدي جريمې په سزا محکوميږي .
په اعلاميه کې دغه راز ويل شوي دي: له دې وروسته به هيچا يا جنايتکار او قانون ماتوونکو ډلو ته اجازه ورنه کړى شي چې د دوى د کار مخه ونيسي .
دغه راز  له هغو کسانو سره به چې د يونيفورم، وسلې، تجهيزاتو او يا له پوځي وسايطو څخه په استفادې سره قانون تر پښو لاندې کوي؛ جدي چلند وشي.
  ختم_ ج _ اکرم

کابل \ باختر\ د کب د مياشتې ۱ نېټه
مرکزي بانک (۲۲) ميليونه ډالره د ليلام په ډول پلوري.
د دغه بانک په هغه ليک کې چې باختر آژانس ته ليږل شوى دى؛ ويل شوي دي:                د افغانستان بانک د روان کال د کب د مياشتې په ۴ نېټه د شنبې په ورځ (۲۲) ميليونه ډالره د ليلام په ډول پلوري.
په شرايطو برابر صرافانو او بانکونوته بلنه ورکول کيږي چې په دغو داوطلبيوکې ګډون وکړي او د ليلام ګټوونکي مکلفيت لري چې خپل حسابونه دې د ورځې تر پايه پورې تصفيه کړي  .
هغه صرافان چې تر اوسه پورې يو ميليونو او ۵۰۰ زره افغانۍ د تضمين په ليلامونوکې د ګډون په مقصدنه دي تحويل کړې؛ کولاى شي له داوطلبي څخه يوه ورځ مخکې دخپل تضمين پيسې تحويلې اوپه راتلوونکو ليلامونو کې دې ګډون وکړي.
د يادونې وړ بلل کيـــــږي چې د معاملاتـو د قسمي تسويې تر سره کول مجاز نه  دى، د  ليلام ګټوونکي دې د خپل ذمت پيسې ټولې يوځاى په نغدي ډول او په حوالــــې سره په ټاکلې موده کې په بانک کې تحويلې کړي.
پاى  \سعيده


 

Page 5 of 7402