15 July 2020

RSS Facebook

سوداگریز


تازه خبرونه

 حامدکرزي او ډاکټر عبدالله د سولې پر بهير وغږېدل

حامدکرزي او ډاکټر عبدالله د سولې پر بهير وغږېدل

کابل/ د چنګاښ۲۴ مه/ باختر د هېواد پخواني جمهور رييس حامد...

 عبدالسلام رحیمي: د سولې بهیر د بریا ضمانت یوازې د افغانستان خلک دي

عبدالسلام رحیمي: د سولې بهیر د بریا ضمانت یوازې د افغانستان خلک دي

کابل/ د چنګاښ ۲۴مه/ باختر د جمهور رئيس ځانګړي استازي او...

 جمهوررئیس محمد اشرف غني د امریکا د پوځ د مرکزي قومندانۍ له قومندان سره وکتل

جمهوررئیس محمد اشرف غني د امریکا د پوځ د مرکزي قومندانۍ له قومندان سره وکتل

کابل/ د چنګاښ ۲۴مه/ باختر د افغانستان د اسلامي جمهوریت جمهوررئیس...

Youtube Player

khantry design

سوداگریز

سوداگریز

کابل/ د چنګاښ۲۴ مه/ باختر د هېواد پخواني جمهور رييس حامد کرزي او د ملي روغې جوړې عالي شورا رييس ډاکټر عبدالله نن سره وکتل او د سولې بهير په اړه يې خبرې وکړې. ډاکټر عبدالله په خپل فېسبوک پاڼه کې ليکلي دي چې په لیدنه کې حامد کرزي د ملي مصالحې عالي شورا د تشکیل پر ژر بشپړېدو ټینګار وکړ، یوځل بیا یې د سولې له پروسې خپل ملاتړ اعلان کړ او تمه یې وښوده، چې د سولې په برخه کې به همغږي لا زیاته شي. ډاکتر عبدالله زياته کړېده: د ښاغلي حامد کرزي له نیکو نظریاتو مې مننه وکړه او هیله مې وښوده چې د موجودو ستونزو د حل په موخه به ژر د سولې بین الافغاني خبرې پیل شي، افغانان به د تاوتریخوالي د کمېدو، اوربند او د ستونزو د سوله ییز حل شاهدان اوسي. همدارنګه ټینګار مو وکړ، چې اوسنی تاوتریخوالی او روان قتل د زغم نه دی.
کابل/ د چنګاښ ۲۴مه/ باختر د جمهور رئيس ځانګړي استازي او د سولې په چارو کې د دولت وزیر عبدالسلام رحیمي « د سولې لپاره د مدني ټولنې د مشورې او همغږۍ بورډ» سره په ناسته کې وویل د سولې بهیر د بریا ضمانت یوازې د افغانستان خلک دي. د سولې په چارو کې د دولت وزارت معلوماتو له مخې؛ د دغې ناستې په پیل کې د سیاسي جوړښتونو او مدني ټولنې د بنسټونو رئیسې لیلا جعفري په غونډه کې د بورډ د غړو له ګډون څخه په مننې سره وویل چې دغه بورډ د ټول‌شمولې او هراړخیزې سولې لپاره د مدني ټولنې د بنسټونو د غږ پیاوړي کولو په موخه د مدني ټولنې د ۷۰ چتري بنسټونو له‌خوا جوړ شوی چې د بورډ ۲۰ غړي یې استازیتوب کوي او د سولې په چارو کې د دولت وزارت د سولې په بهیر کې د هغوی د مشورو ترلاسه کولو لپاره آسانتیاوې برابرې کړې دي. دې وویل چې دغه بورډ د کمېټې په کچه د شپږو او د مجمع په کچه د دوو ناستو په جوړولو سره خپل کاري مېکانېزم چمتو کړی او د بندیانو د خوشي کولو بهیر او خونړیو بریدونو په اړه یې د خپل دريځ په اړه دوې اعلامیې هم خپرې کړې دي. وروسته د سولې لپاره د مدني ټولنې د مشورې او همغږۍ بورډ غړي بریالي عمرزي د دغه بورډ د موخو په اړه خبرې وکړې او ویې ویل چې د سولې په بهیر کې د مدني ټولنې د غږ منسجمول، د خلکو د غږ راټولول او لېږدول، د خلکو د غوښتنو او اندېښنو برجسته کول او د سولې بهیر څارنه، عدالت غوښتنه او ملاتړ د دغه بورډ له مهمو موخو دي. د سوېل لویدیځ زون په کچه د بورډ بل غړي سمېع‌الله حمیدي د دغه بورډ د موخو او کاري اصولو په اړه معلومات وړاندې کړل. فرهاد بهروز د بورډ بل غړي چې د کاپیسا، پروان او پنجشېر د مدني فعالانو په استازیتوب یې خبرې کولې د سولې له بهیر څخه د دغو درېیو ولایتونو د مدني ټولنې بنسټونو د ملاتړ د اعلان ترڅنګ زیاته کړه چې د دغو ولایتونو خلک د تلپاتې او عدالت‌محوره سولې غوښتونکي دي؛ خو دوی غواړي په دغه پروسه کې یې نظرونه او خبرې ځای شي. نوموړي د سولې په بهیر کې د مدني بنسټونو د رښتینو استازو د نه‌ګډون له امله د اندېښنې په څرګندولو سره په دغه بهیر کې د مدني بنسټونو او ځوانانو ونډې ته د زمینې برابرولو غوښتنه وکړه. له شمال ختیځ زون څخه عنایت‌الله خلیق د ټولو زونونو په استازیتوب د تاوتریخوالي ډېروالی د خلکو لویه اندېښنه وبلله او زیاته یې کړه دا چې د سولې راوستل او د شخړو حل د مدني ټولنې د بنسټونو عمده فعالیتونو کې راځي، دغه بنسټونه د سولې‌غوښتنې خبرو اترو په جوړولو سره کولی شي د سولې ټينګښت په برخه کې د دولت نږدې همکار شي. د بورډ بلې غړې رقیې عالمي بلخي د ناستې له ګډونوالو سره د سولې لپاره د مدني ټولنې د مشورې او همغږۍ بورډ غوښتنې شریکې کړې او ویې ویل دا غوښتنې د خلکو له منځه راټوکېدلې دي. د مذاکره‌کوونکي ټیم له لوري د تاوتریخوالو د پای ته رسولو لپاره د څار د ګډ کمیسیون جوړول، د سولې په بهیر کې د مدني ټولنې د بنسټونو ښکېلول او د مذاکراتو د دواړو لورو له‌خوا د بورډ د مېکانېزم منل هغه موارد وو چې د دغه بورډ د وړاندیزونو په توګه یاد شول. عبدالسلام رحیمي د بورډ له غړو په مننې سره وویل حکومت د سولې په بهیر کې د مدني ټولنې د بنسټونو د فعال حضور او ونډې غوښتونکی دی. رحیمي د سولې بهیر پایلې د حکومت او د مدني ټولنې د بنسټونو په ګډون د ټولنې د بېلابېلو پاړکو ترمنځ په ټولیز کار او د همکارۍ او همغږۍ د فضا په رامنځته‌کولو پورې تړلې وبللې او ویې ویل چې د سولې په برخه کې واحد او منسجم غږ موږ مطلوبې پایلې ته رسولی شي. نوموړي ټینګار وکړ که د سولې په مذاکراتو کې د ټولو خلکو غوښتنې شاملې وي او د ټولو خلکو استازیتوب وشي بریا به د افغانستان د خلکو وي. د جمهور رئيس ځانګړي استازي یو ځل بیا د خلکو او مدني ټولنې د سولې غوښتنې پر واحد او رسا غږ ټینګار وکړ او ویې ویل چې د مدني ټولنې بنسټونه باید د خلکو غوښتنو ته عدالت‌غوښتنه وکړي. نوموړي همدا راز د سولې لپاره د مدني ټولنې د مشورې او همغږۍ بورډ د جوړېدو هرکلی وکړ او ژمنه یې وکړه چې د سولې په چارو کې د دولت وزارت به د سولې په برخه کې د مدني ټولنې د بنسټونو د فعالیتونو د آسانتیا په برخه کې همکاري کوي. رحیمي په دې په ټنیګار سره چې د مدني ټولنې د بنسټونو په واحد غږ کې باید د کلیو او بانډو د خلکو غږ هم شامل وي وویل چې د سولې د بریا ضمانت یوازې د افغانستان خلک دي. د یادولو وړ ده چې د سولې لپاره د مدني ټولنې د مشورې او همغږۍ بورډ د مدني ټولنې د بنسټونو په وړاندیز په یوه مشورتي ناسته کې چې د مدني ټولنې ۷۰ چتري بنسټونو ونډه لرله جوړ شوی دی.
کابل/ د چنګاښ ۲۴مه/ باختر د افغانستان د اسلامي جمهوریت جمهوررئیس محمداشرف غني نن ماسپښين د امریکا د پوځ د مرکزي قومندانۍ له قومندان جنرال مک کینزي سره په ارګ کې، وکتل. د جمهوري رياست ويندوي دفتر معلوماتو له مخې؛ په دې کتنه کې دواړو لوریو د افغانستان د سولې پروسې، امنیتي وضعیت، د افغان امنیتي او دفاعي ځواکونو د ملاتړ او د ګډ امنیتي مشارکت د لا پیاوړتیا په اړه بحث او خبرې وکړې. جنرال مک کینزي وویل: د دې لپاره راغلی یم چې تاسو او د افغانستان خلکو ته ډاډ درکړم چې د افغانستان د سولې، پرمختګ او د امنیت د ټینګښت لپاره د امریکا متحدو ایالتونو ملاتړ او همکاري پرخپل ځای ده او موږ به ستاسو ترڅنګ واوسو، چې افغانستان بیا د ترهګرۍ لپاره په خوندي ځای بدل نه شي. جمهوررئیس غني جنرال مک کینزي ته د ښه راغلاست ترڅنګ د ګډ امنیتي مشارکت د پیاوړتیا له امله د هغه مننه وکړه او وې ویل، سوله د افغانستان د خلکو له اساسي غوښتنو او د حکومت له مهمو لومړیتوبونو څخه ده او طالبان باید له جنګ او تاوتریخوالي لاس واخلي. ——

کابل / د چنګاښ ۲۴ مه / باختر
د مشرانو جرګې د ريیس فضل هادي مسلم یار په مشرۍ، د دې جرګې د اداري پلاوي ناستې چې په کې د کابل ښاروال او د لویې څارنوالۍ مرستیال هم ګډون لاره، په کابل ښار کې د خپلسرو او غیرقانوني ودانیو د جوړېدو پر مخنیوي ټینګار وکړ.
د مشرانو جرګې مطبوعاتي دفتر باختر آژانس ته خبر ورکړ؛ په ناسته کې چې د مشرانو جرګې دوېم نایب محمد اکبر ستانکزي، نایب منشي ډاکټر محمد فیصل سمیع، د مواصلاتو او مخابراتو کمېسیون  ريیس او ځینو غړو حاضر وو؛ د جرګې او کابل ښاروالۍ ترمنځ د همکارۍ او همغږۍ پر پياوړتیا په ټینګار سربېره، وویل شول چې د لوړپوړیزو ودانیو د جوړېدو د کابل مېشتو د پرله پسې شکایتونو پر بنسټ د سنامجلس د مواصلاتو او مخابراتو کمېسیون د نمونې په ډول له درېيمې، پنځمې او اوومې ناحیو څخه څارنه او ترلاسه کړل چې په وروستیو کې خپلسري او غیرقانوني ودانۍ په بې ساري توګه جوړې او ډېرې ټولنیزې ستونزې یې رامنځته کړې چې باید د دا ډول خپلسریو مخه ونیول شي او مغرضو اشخاصو ته اجازه ورنه کړ شي چې په ښاري بې نظمیو او غیر قانوني اقداماتو لاس پورې کړي.
دغه راز په کابل ښار کې د کثافاتو زیاتوالی بله ستونزه وګنل شوه او یاد مورد ته په ښې رسیدګۍ او د کابل ښاروالۍ د مشرتابه له خوا د پدوله ښارګوټي د برخلیک په معلومولو ټینګار وشو او هم د اړونده حکومتي ادارو ترمنځ لازمه همغږي د هغو افرادو د مهارولو لپاره چې د ودانیو غیرقانوني رغولو کې ښکېل دي، جدي اړتیا وبلل شوه.
ورپسې د کابل ښاروال محمد داوود سلطانزوی د قلعه زمان خان سړک،عرفاني سړک او د کابل- لوګر د دویم سړک پروژو په برخه کې د پرمختګونو یادونه وکړه او ويې ویل: سره له دې چې نه شو کولای په دې اداره کې د فساد شتون رد کړو، خو د یادې پدیدې سره د مبارزې لپاره اراده شته او په همدې موخه به ډېر ژر ځینې څېرې له خپلو دندو ګوښه شي.
سلطانزوی زیاته کړه: د ښاروالۍ پر وړاندې توطیې روانې دي او د یو شمېر سیاسیونو شخصي غوښتنې هم پر خپل ځای دي او اړتیا ده چې د لویې څارنوالۍ، کورنیو چارو وزارت او ښاروالۍ ترمنځ یوه هوکړه رامنځته شي او پر بنسټ یې د غیر قانوني لوړ پوړیزو ودانیو د جوړېد مخنیوی وشي، له دې پرته به اوسني وضعیت دوام و مومي.
نوموړي د دې ترڅنګ چې دې برخه کې د مشرانو جرګې د همکارۍ غوښتونکی شو، ژمنه وکړه چې د خپلو راتلونکو اجرااتو په اړه به رپوټ له جرګې سره شریکوي.
همدا راز د څېړنو په چارو کې د لویې څارنوالۍ مرستیال په خپلو خبرو کې په کابل کې د ادارو ترمنځ د لازمې همغږۍ نشتوالى لویه ستونزه وبلله او ډاډ یې ورکړ چې لویه څارنوالي له ټولو برخو سره همکاریو ته ژمنه ده او هم یې وړاندیز وکړ چې په جزا کُد کې دې تعدیل راشي او د غیر قانوني لوړپوړیزو ودانیو د جوړېدو په اړه دې په کې تادیبی موارد په پام کې ونیول شي.
د مسوولانو د توضیحاتو له اورېدو وروسته، د مشرانو جرګې رييس په خپلو خبرو کې وویل چې د سنا مجلس د قانون د پلي کېدو ملاتړی دی او د غیرقانوني کړنو د مخنیوي په لاره کې د حکومتي بنسټونو ترڅنګ ولاړ او نږدې همکار دی او هره قانوني مسوده چې تصویب یا تعدیل ته اړتیا ولري؛ په لنډه موده کې به یې پړاوونه بشپړ کړي.
پاى / وهاج

کابل / د چنګاښ ۲۴ مه / باختر
د اطلاعاتو او فرهنګ وزارت د سرپرست محمد طاهر زهير په مشرۍ نن د واټونو د نومولو کمېسيون ناسته جوړه شوه.
د باختر آژانس خبريال د خبر له مخې؛ د ناستې په پيل کې د اطلاعاتو او فرهنګ وزارت سرپرست وويل چې د واټونو نومول د کمېسيون له کړنلارې سره سم ترسره شي او د واټونو په نومولو کې د هېواد جګپوړي، علمي او فرهنګي شخصيتونو ته زياته پاملرنه وشي.
وروسته د ناستې غړيو په مرکز او ولايتونو کې د واټونونو د نومولو پر ٧ مواردو خبرې وکړې او په هر مورد کې يې تصميم ونيو.
پاى \ ذ\ وهاج

کابل / د چنګاښ ۲۴ مه / باختر
د بلخ ولايتي شورا او مدني بنسټونو نن د يوې غونډې په ترڅ کې په سمنګانو کې پرونى تروريستي بريد وغانده.
د باختر آژانس سيمه ييز خبريال د خبر له مخې؛ په هغې غونډه کې چې په مزارشريف ښارکې جوړه شوې وه؛ وينا والو هغه تروريستي بريد چې د څه دپاسه ١٠ تنو د وژل کېدو او څه ناڅه ١٠٠ پوځي او ملکي وګړو د ټپي کېدو سبب شو؛ په کله وغانده او له دولت څخه يې وغوښتل چې د خلکو د وژنې د بندولو په خاطر له طالبانو سره د سولې پروګرام ګړندى کړي.
دوى له طالبانو څخه وغوښتل چې د قطر په ژمنو عمل وکړي، له جګړې او وينې توئيدو څخه دې لاس واخلي، د سولې له بهير سره يوځاى شي او د هېواد په سمسورتيا او آبادى کې خپل فعاله ونډه واخلي.
په دغه تروريستي بريد کې ١٠ تنه شهيدان او څه ناڅه ١٠٠ تنه نور ټپيان شول.
دغه راز دغه بريد په ايبکو ښار کې دولتي او خصوصي ودانيو ته زيات مالي زيانونه اړولي دي.
پاى \ ذ

کابل / د چنګاښ ۲۴ مه / باختر
د کندز د کرنې، اوبولګولو او مالدارۍ مسوولين وايي چې د دغه ولایت د غنمو حاصلات د تېر کال په نسبت کم شوي دي.
د کندز د کرنې، اوبولګولو او مالدارۍ رییس عبدالهادي قرلق د باختر آژانس له سیمه ییزخبریال بریالي همنوا سره په ځانګړې مرکه کې وویل چې تېرکال په دغه ولایت کې څه ناڅه ۵۰۰ مټریک ټنه غنم ترلاسه شوي وو، خو په روان کال کې له ٢٠٠ هکټاره للمي او آبي ځمکو څخه څه ناڅه ۴۵۰ زره مټریک ټنه غنم راټول شوي دي.
هغه په دغه ولایت کې د تېر کال په نسبت د غنمو د کموالي دلیل بې وخته اورښتونه وبلل.
ختم/ع

 

کابل / د چنګاښ ۲۴ مه / باختر
په دایکنډي کې نن پر ۱۸۹ کورنیو د نغدي مرستې د وېش بهیر پیل شو.
د دایکنډي د کار او ټولنیزو چارو رییس رضا محمدي د باختر آژانس سیمه ییزخبریال ته وویل چې دغه ریاست (د افغانستان د بیارغاونې او ټولنیزو خدمتونو موسسې) په همکارۍ په نیلي ښار او د دغه ولایت په نورو ولسواليوکې پر ۱۸۹ کارګرو ماشومانو او بې سر پرستو کورنیو ١٥ زره افغانۍ نغدې پېسې ویشي.
محمدي زیاته کړه چې دغه مرسته پر هغو کورنيو وېشل کېږي چې ماشومان یې ناروغ دي او یا له زده کړې څخه پاتې او په سختو کارونو بوخت دي.
ختم/ع

کابل / د چنګاښ ۲۴ مه / باختر
د هلمند د کرنې، اوبولګولو او مالدارۍ ریاست د دغه ولایت بڼوالو ته په عملي او نظري ډول د انګورو له ناروغیو او آفتونو سره د مبارزې لارې چارې ور زده کوي.
باختر آژانس ته د کرنې، اوبولګولو او مالدارۍ وزارت د معلوماتو له مخې؛ د هلمند د کرنې رییس زلمی الکو وایي: په دغه روزنیز پروګرام کې، بڼوالو ته د سپېرغوږې (خاکسترک)، قرغنه، شیري او نورو ناروغیو او دغه راز له حشراتو سره د مبارزې په اړه هر اړخیزې زده کړې ورکول کېږي.
الکو وویل چې په دغه پروګرام کې دغه راز د وقايوي او ترکيبي درملو، يوريا سپري، ژمني غوړيو، لايم سلفر او د نورو ترکیبي او وقايوي درملو د جوړولو او د استعمال وختونه بڼوالو ته ښودل کېږي.
د هلمند د کرنې رییس د دغه روزنیز پرورګرام د ترسره کولو موخه، د انګورو بڼونو د ناروغیو او آفتونو مخنیوی او د کیفیت او کمیت له پلوه د دغو بڼونو د حاصلاتو زياتوالى وباله.
پاى / وهاج

 

کابل / د چنګاښ ۲۴ مه / باختر
په نیمروزکې د اردو په لیکو کې د جلب او جذب بهیر د کرونا ویروس د خپرېدو په دلیل له څو میاشتې وروسته بيا پیل شوی دی.
په نیمروز کې د ملي اردو د جلب او جذب قوماندان عبدالکریم احمدي د باختر آژانس سیمه ییزخبریال ته وویل چې د جلب او جذب بهیر له پیله، تراوسه د نیمروز څه ناڅه ٥٠ اوسېدونکي د ملي اردو په لیکو کې د يوځاى کېدو په خاطر دغه مرکز ته راغلي دي.
له بلې خوا یوشمېر ځوانان چې د اردو د جلب او جذب مرکز ته راغلي دي؛ وايي چې د اردو لیکو ته د پیوستون او د هېواد له خاورې څخه د د فاع لېوالتيا هغوى ته انګېزه ورکړه چې د اردو له لیکو سره یوځای شي.
له دې سره جوخت په ټول هېواد کې د کرونا ویروس په خپرېدو سره، د هېواد د امنیتي ځواکونو په لیکو کې د ځوانانو د جلب او جذب بهیر هم درېدلی و.
ختم/ع

Page 1 of 8875