22 February 2019

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

جلال اباد باختر د سلواغې ۳۰ مه
د ننګرهار ولایت د خوږیاڼیو ولسوالۍ په ټټنګ سیمه  کې نهه تنه ډار اچوونکي وژل شوي او یو پټنځی یې هم له منځه وړل شوى دی.
ځايي چارواکي وايي چې دغه ډار اچوونکي تېره شپه د ملي امنیت د ځانګړو ځواکونو له لوري د ترسره شویو عملیاتو په ترڅ کې وژل شوي دي.
د ننګرهار د والي ویاند عطاء الله خوږیاڼي  د باختر اژانس سیمه ېیز  خبریال ته وویل چې، په ترسره شویو عملیاتو کې ملکي وګړو او افغان ځواکونو ته زیان نه دی اوښتی.پای/وصال

 

ګردیز باختر د سلواغې ۳۰ مه
د پکتیا ولایت د پوهنې ریاست مسوولین وايي چې ولسونو سږ کال د ښوونځیو د رغولو لپاره  د ۶۰ مېلیونو افغانیو په ارزښت ۷۲ جریبه ځمکه ځانګړې کړې.
د دغه ولایت د پوهنې رئیس استاد کوچي ځاځي د باختر اژانس سیمه ېیز خبریال ته وویل چې یاده ځمکه په مرکز ګردیز او بېلابېلو ولسوالیوکې د ولس له لوري د ښوونځیود رغولو لپاره ځانګړې شوې.پای/وصال

اسعد اباد باختر د سلواغې ۳۰ مه
د کونړ ولایت چارواکي وايي چې داخلي تولیداتو او محصولاتو ته د بازار نه موندنې، له امله په هېواد کې د بې روزګاره کسانو شمېر ورځ تر بلې د زیاتېدو په حال  کې دی.
دا په داسې حال کې ده چې تېره ورځ د کونړ ولایت په مرکز  اسعد اباد کې د دغه ولایت د تولیداتو او محصولاتو لپاره یو ورځنی نندارتون هم جوړشوی وو.
په دې نندارتون کې د کونړ والي عبدالستار میرزاکوال د باختر اژانس له سیمه ېیز خبریال سره په خبرو کې منلې چې د دغه ولایت تولیداتو او محصولاتو ته بازار موندنه نه ده شوې.
میرزاکوال وايي چې، دغه کار د دې لامل شوې چې په هېواد کې ورځ تر بلې د بې روزګاره کسانو شمېر زیات شي.
دى وايي: لکه څنګه چې د هرات زعفران، د قندهار انار ،د وردګو او نورو ځایونو مالټې او انګور شهرت لرې او ښه بازار لري، په کونړ کې هم  چهار مغز ،مالټې، نارنج او لیمو شتون لري، خو بازار موندنه ورته نه ده شوې.
دى له جمهور رئیس څخه هیله وکړه چې د دوی تولیداتو او محصولاتو ته هم  په کور دننه اوپه نړیواله کچه  مارکیټونه پیدا کړي .که څه هم د کونړ اوسیدونکي د یاد نندارتون په جوړولو خوښ دي ،خو ګیله یې داده چې تراوسه يې محصولاتو او تولیداتو ته يې کومه ځانګړې پاملرنه نه ده شوې .
په ورته وخت کې  بیا د کونړ د کرنې او مالدارۍ رئیس انجینر انعام الله ساپی وايي چې له  یاد نندارتون څخه يې هدف دا دی، څو مرکزي حکومت ته وښيي چې کونړ هم ښه تولیدات او محصولات لري، خو د بازار موندنې په برخه کې ورته هیڅ پاملرنه نه ده شوې.پای/وصال

کابل\باختر\ دسلواغې د مياشتې٣٠
په نړيوالو بازارونوکې نن يو انس سره زرپه ۱۳۲٥ډالرو وړاندې کېږي.
د پښتنې بانک د سرو زرو د مارکيټ يوه پلورونکي قاهرخان نن ددغه خبرپه تاييدولو سره باختر آژانس ته وويل چې نن د کابل په بازارونوکې يو ګرام الجزايري سره زر په ٣٢٥٠  افغانيو، مصري په٣١٥٠ افغانيو، کويټي په٢٥٥٠ افغانيو،سنګاپوري په٢٥٥٠ افغانيو،  بحريني په٢٥٠٠ افغانيو، عربي په٢٤٥٠ افغانيو، ايراني په٢٢٥٠ افغانيو او يو ګرام روسي په ٢٠٥٠افغانيو پلورل کېږي.      
پاى / سعيده

کابل باختر دسلواغې  ديرشمه :
دهرات والي  په ګمرکونو او عايداتي ادارو کې له فساد سره   په جدي مبارزې ټينګار وکړ .
  دهرات والي عبدالقيوم رحيمي دهغې غونډې په بهير کې  چې پرون د ګمرک  په رياست کې جوړه شوه دهرات په ګمرک کې يې داسکنر  ددستګاو  فعالول  جدي وباله او دهرات دګمرک رياست ته يې لارښوونه وکړه  چې داسکنرونو دفعالولو موضوع دې په جدي توګه دمسوولانو له خوا په مرکز کې  وڅيړي .
په دې غونډه کې دهرات  دګمرک  رييس هم ددغې ادارې په بېلابېلو  برخو کې دفساد دکميدو له امله يادونه وکړه او زياته يې کړه  چې په جدي توګه هڅه کوي  چې دهرات په ګمرک  کې فساد له منځه لاړ شي .
ده داسلام قلعه دګمرک  داسکنر  ددستګاه دفعالولو  د موضوع له څيړنې هم ډاډ ورکړ
په دې غونډۀ کې   چې يوشمير  دولتي مسوولينو برخه لرله  دخصوصي سکتور  او دترانسپورتي  مسوولانو دستونزو په باب خبرې  وشوې او دهغو ترانزيتي کاروانونو  ته دزياتو  اسانتياوو په برابرولو چې دلارجوردو په لاره تګ راتګ  کوي ټينګاروشو .
  ختم_ شکريه – اکرم
                                  

کابل باختر دسلواغې  ديرشمه :
په ننګرهار ولايت کې دوچکالي  له امله په سلګونو زيانمنو شويو کورنيو سره مرسته وشوه .
   دغه کورنى چې زياتره يې کروندګر دي په دې وروستيو  کلونو کې دوچکالي له امله ډير زيات  اقتصادي تاوان ليدلى دى اودخپلو کورونو په پريښودو مجبور شوي دي .
دننګرهار ولايت درسنيو دفتر ديوې خبرپاڼې په خپرولو سره وايي  چې په دې پړاو کې ٣٦٠ کورنى زيانمنې شوي دي  چې د وچکالي له امله دوى ته  غنم وويشل شول 
ويل کېږي چې په هرې کورنى   ١٥٠ کيلوګرامه غنم  ويشل شوي دي .
  ختم_ شکريه_ اکرم

 

کابل باختر دسلواغې  ديرشمه :
په کندز ولايت کې پرون څلور تنه دجنايي جرمونو په تور ونيول شول .
  دکندز دامنيې قوماندانۍ وياند انعام الدين رحماني دباختراژانس خبريال ته وويل چې ددغې قوماندانۍ ددويمې امنيتي حوزې منسوبانو څلور تنه ديوه کور دمالونو دغلا او ديو سړي دټپي کيدو په تور دکندز ښار په مربوطاتو کې ونيول
رحماني زياته کړه چې دکندز پوليسو  دتيرې يوې اوونۍ په بهير کې  په لسګونو  تنه په دغه ولايت کې دجنايي جرمونو په تور نيولي دي .
  ختم_س عيده _ اکرم


 

کابل باختر دسلواغې  ديرشمه :
اته تنه وسله وال طالبان پرون په غزني ولايت کې ووژل شول
د ٢٠٣  تندر قول اردو وياند  دګروال فضل خدا ابراهيم خيل  باختراژانس ته وويل چې دغه وسله وال طالبان دغزني ولايت داندړو ولسوالۍ په مربوطاتو کې دپوځيانو دعملياتو په دوام کې ووژل شول .
ابراهيم خيل زياته کړه چې په دغو عملياتو کې دوه تنه نور  وسله وال طالبان ټپيان او هغه ماينونه چې دوسله والو طالبانو له خوا دملکي وګړو دتګ راتګ په لاره کې دغزني ولايت په مربوطاتو کې ځاى پرځاى کړي و کشف او شنډ کړل .
  ختم_ عطاالله _ اکرم

 

کابل باختر دسلواغې  ديرشمه :
دغوڅ ملاتړ دځواکونو يوه بې پيلوټه  الوتکه پرون دفراه  ولايت دپشت رود ولسوالۍ د کجګين په سيمه کې راوغورځيده .
دفراه ولايت دپشت رود  ولسوال ددغه خبر په تاييدولو سره دباختراژانس خبريال ته وويل  چې دغه الوتکه  دتخنيکي  ستونزو له امله  راغورځيدلې ده
دغوڅ ملاتړ دځواکونو مسوولانو هم ددغې الوتکې  دراغورځيدو سبب تخنيکي ستونزه  بللى دى .
  ختم_ سعيده _ اکرم

 

کابل باختر دسلواغې  ديرشمه :
دکونړ ولايت دسندري  ستراتيژيکي سيمه دپوځي عملياتو په بهير کې د ډار اچوونکو له شتون څخه پاکه شوه .
دغه عمليات دوه ورځې مخکې دملي اردو او دملي پوليسو دسلګونو تنو ځواکونو په ګډون پيل شوي و .
دهېواد په ختيځ کې دملي اردو يو جګپوړي قوماندان دباختراژانس خبريال ته وويل چې په دغو عملياتو کې دکونړ ولايت دمانوګى  ولسوالۍ دسندري  ستراتيژيکي اولوړه سيمه  د ډار اچوونکو  له شتون څخه پاکه شوه .
ده وويل اوس په دې ساحه کې پوځيان ځاى پرځاى شوي  دي او دخلکو امنيت تامينوي .
ويل کېږي  ډار اچوونکي دسندري  ساحې ته دځواکونو  له رسيدو مخکې له جګړې پرته تښتيدلي و .
  ختم_ شکريه _ اکرم

Page 10 of 7402