12 July 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

 کابل / د چنګاښ ۲۱ مه / باختر
د روزګان په دهراوت ولسوالۍ کې تېر ماښام پر ماشومانو یوې پخوانۍ سرګلولې چاودنه کړې ده.
د دهراوت ولسوال محمد نعیم حیدري وايي چې په چاودنه کې یو ماشوم وژل شوی او یو بل ټپي شوی دی.
په ورته وخت کې د دهراوت روغتیاپالانو د ټپي شوي ماشوم وضعیت د اندېښنې وړ بللی دی.
پای/وصال

-کابل / دچنګاښ ٢١مه / باختر :
د افغانستان او پاکستان ترمنځ  د ډنډ پټان او د انګورو اډې لارې  د تجارتي کاروانونو پرمخ پرانستل شوې .
د دغو لارو په پرانستلو سره  اوس  له پاکستان سره د افغانستان ټولې لارې  د تجارتي کاروانونو پرمخ پرانستي دي .
دغه لارې  څه ناڅه درې مياشتې مخکې  د کرونا ويروس د خپرېدو له امله  د پاکستان له خوا  د تجارتي کاروانونو پرمخ تړل شوې وې .
د پکتيا د سوداګرى  او صنايعو د خونو رييس عبدالنصير عالميار باختراژانس ته وويل:  چې د ډنډ پټان  د لارې  له پرانستلو وروسته  پاکستان او له دې لارې نورو هېوادونوته د افغانستان د تجارتي مالونو  دصادراتو بهير  پيل شوى دى .
له بله پلوه د پکتيکا د رسنيو دفتر هم  د يوې خبرپاڼې په خپرولو سره د تجارتي کاروانونوپرمخ  د انګورو اډې  دلارې د پرانستلو  خبرورکړ.
د خبرپاڼې د معلوماتوله مخې؛  د دغو لارو  په پرانستلو سره  د افغانستان او پاکستان ترمنځ  د صادراتو او وارداتو بهير  بيا پيل  شو.
د افغانستان اوپاکستان  سوداګرواو دسوداګرۍ د خونو مسوولينو د دغو دوو لارو  د پرانستلو په مراسموکې ګډون  کړي و .
هغوى دغه راز  په يوه غوڼډه کې يولارښود جوړکړ چې  د افغانستان اوپاکستان ترمنځ د راکړې ورکړې بهير  بيا  له ستونزو سره مخامخ نه شي .
دا په داسې حال کې دى  چې له پاکستان سره د افغانستان د لارو  د تړلتيا په دليل د افغانستان  د تازه ميوو  د خرابېدو اندېښنې زياتې شوې وې .
  د کرنې او اقتصاد کارپوهان  له پاکستان سره  د لارو له پرانستلو سره جوخت  د افغانستان  د تازه ميوو د حاصلاتو په وخت کې افغان بزګرانو او سوداګرو ته  مهم او مثبت ګام بولي.
پاکستان  تل  له افغانستان سره  د لارو په تړلو  اقدام کړى دى چې د افغان مقاماتو  او سوداګرو د څرګندونوله مخې ؛ دغه اقدام سياسي  بلل شوى دى.
له پاکستان سره د لارو  په تړل کېدو سره تل افغان سوداګرو ته زيات مالي زيانونه  رامنځته کړي دي او له بله پلوه د دې سبب شوى دى چې پاکستان ته   دمسافرو او په تېره بيا د ناروغانو دتګ راتګ په بهير کې خنډ رامنځته شي
افغانستان  په وچې پورې  تړلې هېواد دى، او پاکستان او نړۍ ته د خپلو صادراتي مالونو لپاره  يواځنۍ نږدې لاره پاکستان دى .
  ختم_ج _اکرم

-کابل / دچنګاښ ٢١مه / باختر :
١٦ وسله وال طالبان په قندهار کې  د نويو جګړو په بهير کې  ووژل شول اويوشمېر نور يې ټپيان شول .
دغه جګړې  د وروستيو ٢٤ ساعتو په بهير کې د معروف  او ارغنداب  په ولسواليو کې  رامنځته شوي دي .
د هېواد  په جنوب کې د ميوند قول اردو د لومړى لوا  د رسنيو دفتر د يوې خبرپاڼې په خپرولو سره وايي : چې په دې جګړو کې ١٦ وسله وال طالبان ووژل شول  او څو نور يې ټپيان شول .
د خبرپاڼې د معلوماتو له مخې؛ دغه جګړې  په څو پوځي پوستو  د وسله والو طالبانو له برېدونو وروسته رامنځته شوي دي.
د طالبانو له برېدونو وروسته د هېواد هوايي ځواکونه د پوځيانو مرستې ته  ورودانګل  او په يرغلګرويې  برېدونه وکړل .
  وسله والو طالبانو تراوسه پورې په دې باب څه نه دي ويلي .
په يوبل خبرکې ويل شوي دي چې پوليسو  د قندهار  له ګڼ مېشتو لارو څخه  د شلو ماينونو په کشفولو سره  د يولړ چاودنو مخه ونيوله .
وسله وال طالبان د دغو ماينونو د ښخولو عاملين بلل شوي دي.
  ختم_ ج _اکرم

کابل / دچنګاښ ٢١مه / باختر :
د پکتيا دکرکټ  اکاډمي  د بيا رغاونې کار  دبشپړېدو په حال کې دى .او دغه روزنيز مرکز به  ډير ژر  پرانستل شي .
د دغې اکاډمۍ  د تمرين  د ځانګړو  جاليو، سالونونه جوړ شوي دي او د لوبغاړي  د شنه چمن  د کرلو په باب کار دوام لري .
د پکتيا دکرکټ اکاډمي په ګرديز ښار کې د کرکټ په لوبغالي کې  موقعيت لري. 
دافغانستان کرکټ بورد د يوې خبرپاڼې په خپرولو سره ويلي دي،  چې د پکتيا  دکرکټ اکاډمي به ډير ژر پرانستل شي .
   ختم _ج _ اکرم

کابل / دچنګاښ ٢١مه / باختر :
په هېواد کې  په کرونا ويروس  د اخته  پېښو  د ثبت په باب  د افغان جاپان د روغتون رپوټ ښيي  چې  دغه ويروس  مخ په کمېدو دى .
د باختراژانس دخبرله مخې،  د افغان جاپان د روغتون رييس  احمد ظاهر سلطاني نن  د باختراژانس له خبريال سره په  تيلفوني اړيکه کې وويل:  له نيکه مرغه په افغانستان کې د کرونا ويروس  نزولي تګلوري لري .
د هغه د څرګندونوله مخې ؛  اوس  په ورځ کې  سل تنه  د دغه ويروس  د تشخيصولو په خاطر افغان –جاپان روغتون  ته  مراجعه کوي  چې  ٤٠ مشکوک کسان بستر کېږي  د معايناتو له بشپړولو وروسته  څه ناڅه لس اويا هم  له هغه څخه لږ کسان  په کرونا ويروس  اخته دي .
هغه زياته کړه : چې اوس  خلک  د کرونا د تشخيصولو په خاطر شخصي روغتونونو ته هم ورځي .
بايد وويل شي ،چې پخوا  دغه شمېر  د اندېښنې وړ و،  ځکه  په ورځ کې  له  ٣٠٠ څخه تر  ٤٠٠ پورې  د تشخيص په خاطر دغه روغتون ته راتلل.
ختم _ ج _ اکرم

-کابل / دچنګاښ ٢١مه / باختر :
داطلاعاتواوفرهنګ وزارت  د فرهنګ او هنر معين  پوهاند محمد رسول باوري په مشرۍ  نن  د موزيم  د نوى ودانۍ  نقشې  د تعديلاتو په باب مشورتي غونډه جوړه شوه .
د باختراژانس د خبرله مخې؛ په دې غونډه کې د مربوطو برخو  په رييسانو برسيره  د  ښار جوړولو او اراضى د وزارت   انجنيرانو هم ګډون کړي و.
د غونډې برخه والو د فرهنګ او هنر معينيت  د نظريو او پيشنهادونوپه باب  چې د  ويديو له لارې  اسپانوي مهندس ته  وړاندې شول، خبرې اترې وشوې. اسپانوي مهندس   د نوى ودانۍ نقشې دبدلون لپاره د فرهنګ اوهنر معينيت  له  دوو يا دريو نظريو او پيشنهادونو پرته له څېړنې وروسته منلې دى .
بايد وويل شي، ټاکل شوې ده  د موزيم نوى ودانۍ  د پخوانى  موزيم  د ودانۍ تر څنګ جوړ شي ، مقدماتي کارونه يې په بشپړېدو دى .
ختم _ ج _ اکرم

-کابل / دچنګاښ ٢١مه / باختر :
دوه سړي   پرون د کاپيسا  په صياد ولسوالۍ کې  په اوبو کې ډوب شول او ووژل شول .
د کاپيسا د  پوليسو د قوماندانۍ وياند عبدالشايق  شورش کوهستاني وويل: د باميانو دغه دوه  اوسيدونکي چې په کابل کې اوسيدل او د تفريح په خاطر  د دغه ولايت، صياد ولسوالۍ ته راغلي و، د ورځې په يوې بجې  د توت د ونې  په ماتېدو سره په اوبو کې ولويدل او دواړه ډوب شول .
هغه وويل:  پوليسو  د دوى  مړي له اوبو وايستل او کورنيو ته يې وسپارل .
ختم _ شکريه _اکرم

-کابل / دچنګاښ ٢١مه / باختر :
دبدخشان په خاش ولسوالۍ کې پرون په چاودنه کې د پوليسو  د يوه سيمه ييز قوماندان په  ګډون  ٤ تنه ټپيان شول .
  د باختراژانس د سيمه ييزخبريال احسان الله عدن براتي د خبرله مخې؛دغه چاودنه  د هغه ماين زېږنده وه  چې د بدخشان د خاش ولسوالۍ  په درخان کلي کې  د جامع جومات   په دروازه کې  وشوه .
د بدخشان د والي وياند نيک محمد نظري وويل: چې دغه چاودنه  هغه وخت  وشوه چې لمونځ کوونکي د جمعې لمانځه له اداکولو وروسته له جومات څخه  وتل .
د بدخشان  د والي د وياند د څرګندونوله مخې؛  په دې چاودنه کې د يوسيمه ييز قوماندان خال محمد په ګډون  څلور لمونځ کوونکي ټپيان شول او د دغې پېښې  ټپيان روغتون ته ولېږدول  شول
دغه ماين د خال محمد قوماندان د وژلو لپاره ځاى  پرځاى شوى و .
طالبانو  په دې باب څه نه دي ويلي .
ختم _شکريه _اکرم

-کابل / دچنګاښ ٢١مه / باختر :
درې وسله وال طالبان په پکتيا کې له پوځيانو سره په نويو نښتو کې  ووژل شول او دوه نور يې ټپيان شول .
دغه نښته تېره شپه د څمکنيود ولسوالۍ  په شاوخوا کې  هغه وخت وشوه چې  يوه ډله طالبان  د  پوځيانو په کاروان بريد وکړ .
د پکتيا يو امنيتي  خبرځاى باختراژانس ته وويل چې په دې نښته کې  درې وسله وال طالبان ووژل شول او دوه نور يې  ټپيان شول .
طالبانو تراوسه پورې  په دې باب  څه نه دي ويلي .
  ختم _ شکريه _ اکرم

Saturday, 11 July 2020 10:13

خبرتيا

 -کابل / دچنګاښ ٢١مه / باختر :
د کابل د ترافيکو لوى مديريت خبرتيا
يو ديرش کلن سړى  چې هويت يې نه دى تثبيت شوى ، پسته يي جامي او پلنګي جمپر يې په ځان کې دى   د چنګا ښ د مياشت په شلمه نېټه دخيرخانې مينې  د دانش  تم ځاى په ساحه کې د ترافيکي پېښې له امله مړ شوى دى  او مړه يې  دساتنې لپاره  عدلي طب  دخدمتونو رياست ته لېږدول شوى دى .
خپلوان يې کولاى شي  مړى د عدلي طب له رياست څخه ترلاسه کړي .
د زياتو معلوماتو ترلاسه کولو په مقصد په دهمزنګ کې د کابل ترافيکو  لوى مديريت  د پېښو د څېړنې  امريت ته ورشي  اويا ٠٢٠٢٥٠٣٧١١شمېرې سره  اړيکه ونيسي .
  ختم _ ج _ اکرم

Page 3 of 8867