07 July 2020

RSS Facebook

سوداگریز


تازه خبرونه

د کابل په فرزې او شکردرې ولسوالۍ کې د دوو چاودنو مخه ونیول شوه

کابل / دچنګاښ۱۷ / باختر د کابل د۱۱۱چټک غبرګون د...

 په کابل کې ديوې چاودنې مخه ونيول شوه

په کابل کې ديوې چاودنې مخه ونيول شوه

کابل / د چنګاښ ١٧مه/ باختر د کابل پوليسو څو...

Youtube Player

khantry design

سوداگریز

سوداگریز

کابل / د چنګاښ ۱۶ مه / باختر
یو ډار اچوونکی د کابل په میربچه کوټ ولسوالۍ کې له پولیسو سره په نښته کې ووژل شو.
د میر بچه کوټ ولسوالۍ د پولیسو یوې سرچینې باختر آژانس ته وويل چې دوه ډار اچوونکي تېره شپه د کابل په میربچه کوټ ولسوالۍ پورې اړوند پُل صوفیانو ساحه کې د امینتي ځواکونو پر يوې پوستې برید وکړ چې د پولیسو له مقاومت سره مخ شول او له ساحې څخه وتښتېدل.
سرچينې زياته کړه چې پولیسو د شکردرې ولسوالۍ په مربوطاتو کې د ابوبکر په نامه یو ډار اچوونکی وواژه او د حکمت الله په نامه یو بل ډار اچوونکی يې ونیو او له درېيو ګولیو سره يې دوه (آر.پي.جي) توغندي ترلاسه کړل.
ختم/ع


 

کابل / د چنګاښ ۱۶ مه / باختر
د نیمروز پولیسو دوه کسان پرون په دغه ولایت کې د غلا په شک ونیول.
د نیمروز د امنیې قوماندانۍ د مطبوعاتو مسوول ابراهیم امیني د باختر آژانس خبریال ته وویل چې د دغې قوماندانۍ منسوبينو دغه کسان چې ویل کېږي غله دي؛ د دغه ولایت د مرکز زرنج ښار په مربوطاتو کې ونیول.
هغه زیاته کړه چې نیول شوي کسان د موټرو، موټرسایکلونو، د کورونو د مالونو، ګاڼو او د موبایلو په غلا او د نورو جرمونو په ترسره کولو تورن دي.
پاى / سعیده


 

کابل / د چنګاښ ۱۶ مه / باختر
محمد اشرف غني د افغانستان د اسلامي جمهوریت د منتخب جمهوررییس په توګه د ۱۳۹۸ د کب پر ۱۹ مه لوړه وکړه او د لوړې په مراسمو کې یې ژر د نوې کابینې د جوړېدو خبر ورکړ؛ خو نوې کابینه لا نه ده جوړه شوې. دې ستونزې د خلکو اندېښنې او شکونه پورته کړي دي.
د باختر آژانس مفسر د خلکو شکونو او اندېښنو ته کتنه کړې ده او لیکي:
د خلکو هیله او تمه دا وه چې د جمهوررییس له ژمنې سره سم به نوې کابینه ژر جوړه شي او د تایید لپاره به ولسي جرګې ته معرفي شي، خو له بده مرغه دا  کار تر ننه نه دی شوی، په داسې حال کې چې د جمهوررییس د لوړې له مراسمو دا دی درې ورځې کم درې میاشتې تېرېږي.
خلک حق لري پوښتنه وکړي چې ولې نوې کابینه لا نه ده بشپړه شوې؟ ولې د دولت رهبرۍ ونه شوای کولای نوې کابینه په خپل وخت جوړه او معرفي کړي؟ دا ډول پوښتنې له خلکو سره زښتې ډېرې دي.
منو چې له بده مرغه د تېرکال انتخابات بیا له یو ډول بحران سره مخ شول او یوې انتخاباتي ډلې د انتخاباتو د پایلو پر خلاف غبرګون وښود او خبره خو آن دې ته ورسېده چې په یوه ورځ دوو مشرانو د جمهوررییس په توګه لوړه وکړه.
دغه بحران د کابینې د جوړولو په ګډون نور ګڼ مسایل له خنډ او ځنډ سره مخ کړل. دا بحران حل شو او له ښه مرغه د دغه بحران په حل کې د ۲۰۱۴ کال په څېر د بهرنیانو لاسوهنې ته اړتیا پېښه نه شوه او افغانانو د افغاني جرګو او مرکو له لارې دغه بحران ته د حل لاره وموندله. اوس دا بحران حل شوی دی او د کابینې د ټولو غړیو د ژر معرفۍ لپاره نور هغه بحران پلمه کېدای نه شي.
جمهوررییس د څو وزارتونو لپاره نوماندان او سرپرستان معرفي کړي دي، خو د ټولې کابینې نوملړ لا بشپړ شوی نه دی. داسې ویل کېږي چې د ډاکټرعبدالله په ټاکنیز ټیم کې د کاندیدانو د معرفۍ په اړه ستونزې د دې لامل شوي چې هغوی ونه شوای کولای په کابینه کې ورته د بېلې کړای شوې ونډې لپاره کاندیدان معرفي کړي. که په دې برخه کې غوڅ چلند ونه شي او دا جنجالونه همداسې دوام ومومي، نو ګرانه ده چې د کاندیدانو پر سر توافق ترلاسه شي.
د افغانستان په اساسي قانون کې د وزیر کېدو لپاره معیارونه ښه روښانه او څرګند دي. د همغو معیارونو په رڼا کې دې جمهوررییس د وزیرانو د معرفۍ لپاره یو رڼه تګلاره جوړه کړي او هغه دې له بل ټیم سره شریکه کړي.
افغانستان د تاریخ له ډېر حساس پړاوه تېرېږي. له یوې خوا د کرونا بحران ګڼې ستونزې راټوکولې دي، له بلې خوا جګړو زور اخیستی دی او ورسره جوخت د سولې خبرې هم په مخ کې دي. موږ داسې کابینې ته اړتیا لرو چې د اوسني پړاو د دغو سترو دندو حل ته اوږه ورکړای شي او هېواد له اوسني کړکېچه وباسي.
سمه ده چې د هر وزیر پُست، سیاسي دی، خو د دې مانا دا نه ده چې د وزیرانو په ټاکلو کې دې په بشپړ ډول سیاسي چلند وشي، دلته ځانګړي مهارت ته اړتیا ده او  سیاست باید له تخصص، تجربې او لوړو ملي ګټو ته د ژمنتیا له اصل سره یوځای کړای شي. که نګه سیاسي چلند وشي، نو بیا به یې پایلې ښې نه وي.
هیله مو دا ده چې د دولت رهبري ژر تر ژره کابینه بشپړه کړي او د تایید لپاره یې ولسي جرګې ته واستوي او دې سیاسي ستونزې ته پای ورکړي.
پاى/ ن.ش

- کابل / د چنګاښ ۱۶ مه / باختر
په کاپیسا کې د څو سړکونو د پخولو کار پرون پیل شو.
د باختر آژانس د سیمه ییز خبریال د خبر له مخې؛ دغه سړکونه د کاپیسا په مرکز او د کوهستانونو په  لومړۍ او دویمې برخې ولسوالیو کې د ١٧ کیلومترو په اوږدوالي د کلیو د بیا رغاونې او پرمختیا وزارت له بودجې څخه د کلیو د بیارغاونې پروګرام په همکارۍ پخېږي.
ویل کېږي د دغې پروژې کار به په شپږو میاشتو کې بشپړ شي او ٥٠٠ کسانو ته د کار زمینه هم برابره شوې ده.
ختم/ ع

کابل / د چنګاښ ۱۶ مه / باختر

د کونړ ولایت په شیګل ولسوالۍ کې د ۳۵ کیلو متره سړک او د پایپ سکیم لسو شبکو جوړولو چارې پرانېستل شوې چې شاوخوا شل زره کورنۍ به ترې ګټه پورته کړي او د سړکونو بیارغونې کارونه شپږ میاشتې وخت نیسي.

د افغانستان لپاره د سویډن کمېټې مطبوعاتي دفتر باختر آژانس ته  وویل چې د افغانستان لپاره د سویډن کمېټې په مالي لګښت ۱۷ کلیو ته د اوبو رسولو د لسو شبکو د جوړېدو چارې پرانېستل شوې او ورسره هم مهاله د خوراک نړیوال سازمان له لوري د ۴۸۰ ميټریک ټنه خوراکي توکو مرسته چې د سویډن کمېټې د کلیو او پراختیا پروګرام په همغږۍ تر لاسه شوې پیل شوې ده.

 دا د شیګل ولسوالۍ له مرکز سره د ۲۲ کلیو نښلولو ۳۵ کیلو مټره سړک جوړولو پروژه ده چې شپږ میاشتې وخت به ونیسي او د اړوندو کلیو ۶۹۹ کارګران چې د سړکونو په رغونه کې کار کوي، د پروژې تر پایه به هره میاشت د کار په بدل کې خوراکي توکي تر لاسه کوي.

په همدې موخه جوړیو شویو مراسمو کې د افغانستان لپاره د سویډن کمېټې د جلال اباد سیمه ییز دفتر مشر عبدالاحد سمون، د کونړ ولایت مرستیال والي، ولایتي شورا غړو، سیمه ییزو مسوولینو او قومي مخورو ګډون کړی و چې د پروژو د عملي کېدو په برخه کې یې د ولسونو له همکاریو مننه وکړه او د دغو همکاریو د لا ډېرېدا  غوښتنه یې وکړه.

د کونړ مرستیال والي ګل محمد بیدار وویل: د افغانستان لپاره د سویډن کمېټې فعالیتونه او خدمتونه د قدر وړ او حیاتي دي. د دولت او د شیګل د خلکو په استازیتوب زموږ غږ د سویډن تر خلکو ورسوئ چې له تاسې ډېر خوښ دي.

په ورته وخت کې د شیګل ولسوالۍ قومي مشر نور رحمان کشمېرخان د شیګل ولسوالۍ د ولسونو په استازیتوب له سویډن کمېټې مننه وکړه او زیاته یې کړه چې په سختو حالاتو کې یې د شیګل د خلکو لپاره د پاکو اوبو رسونې او پایپ سکیم په برخه کې نه هېریدونکي خدمتونه کړي او ډاډ یې ورکړ چې د نویو پروژو تطبیق کې به هم ورسره اوږه په اوږه ولاړ وي.

له دې سره د افغانستان لپاره د سویډن کمېټې د جلال  اباد سیمه ییز اداري دفتر مشر انجینر عبدالاحد سمون وویل چې د شیګل خلک لا هم د ژوند لومړنیو اساسي حقونو ته لاسرسی نه لري او د دوی لومړیتوب هم همدا دی چې د خلکو پر وړاندې پرتې ستونزې راکمې کړي.

سمون زیاته کړه چې د سویډن کمېټې لومړیتوب او تمرکز په لرې پرتو سیمو دی چې په دې لړ کې یې د تېرو ۱۱ کلونو راهیسي چې په  شیګل ولسوالۍ کې کار کوي، د پاکو اوبو رسونې او پایپ سکیم ګڼې پروژې ګټې اخیستنې ته سپارلي چې د سیمې خلکو ستونزې یې راکمې کړي.

د ویلو ده چې د نویو پروژو د کارونو په مهال به د کرونا ویروس د مخینوي لپاره وقایوي تدابیر هم عملي کیږي چې په دې موخه د سویډن کمېټې له لوري د سیمو خلکو ته چې په ځانګړي ډول د سړکونو رغونه کې کار کوي، د عامه پوهاوي پروګرامونه هم عملي کړي.

 

 

کابل / د چنګاښ ۱۶ مه / باختر
د غزني د مرکز په سمن کلي کې د افغان ځواکونو او وسله والو طالبانو ترمنځ نښته کې ۴ وسله وال طالبان ووژل شول.
له ۲۰۳ تندر قول اردو څخه باختر آژانس ته په استول شوې خبرپاڼه کې ویل شوي دي چې د غزني په سمن کلي کې تېره شپه د افغان ځواکونو او وسله والو طالبانو ترمنځ نښته شوې ده.
سرچینه زیاتوي چې په نښته کې ۴ وسله وال طالبان وژل شوي او ۲ نور یې ټپيان شوي دي.
ویل کېږي په نښته کې افغان ځواکونو ته زیان نه دی اوښتی.
پای/وصال

کابل / د چنګاښ ۱۶ مه / باختر
د ننګرهار په مرکز جلال آباد ښار کې د ولسي تړون پروګرام په اډانه کې د ۱۶ میلیونو افغانیو په لګښت د څو پروژو چارې پیل شوې.
د ننګرهار د رسنیو له مرکز څخه په خپره شوې خبرپاڼه کې ویل شوي دي چې په دغو پروژو کې د برېښنا، سړک، پلچکونو، ویالو او د ښوونځيو لپاره د ودانیو جوړول شامل دي.
پای/وصال

کابل / د چنګاښ ۱۶ مه / باختر
د ننګرهار د دُربابا ولسوالۍ په خوسا چینکۍ سیمه کې ۳۳ تومانچې، ۶۶ شاژرونه او د تومانچې ۱۱۲۰ مرمۍ ترلاسه شوې دي.
د ننګرهار د رسنیو له مرکز څخه په خپره شوې خبرپاڼه کې ویل شوي دي چې د ترلاسه شویو تومانچو په تړاو یو تن نیول شوی دی.
پای/وصال

 

کابل / د چنګاښ ۱۶ مه / باختر
امنیتي مسوولین وايي چې د ننګرهار د بهسودو ولسوالۍ په میرانو کلي کې یې ۱۵۰ جریبه ځمکه د عاصبانو له منګولو خلاصه کړه.
د ننګرهار د رسنیو له مرکز څخه باختر آژانس ته په استول شوې خبرپاڼه کې ویل شوي دي چې د غاصبانو د نیولو هڅې روانې دي.
په همدې حال کې د بهسودو ولسوالۍ مسوولین له خلکو څخه غواړي چې د دولتي ځمکو له غصبولو ډډه وکړي.
دوی زیاتوي: هر هغه څوک چې دولتي ځمکې غصبوي؛ قانوني چلند به ورسره وشي.
پای/وصال

کابل / د چنګاښ ۱۶ مه / باختر
د جمهوررییس محمد اشرف غني د حکم پر بنسټ، د کونړ په مرکز او ولسوالیو کې د ۱۷۲میلیونو افغانیو په لګښت څو جوماتونه جوړېږي.
د کونړ د حج اوقافو رییس مولوي نورالمعبود احساس وایي چې دغه جوماتونه د جمهوررييس په حکم جوړيږي چې د پنځو چارې پیل شوې دي او د نور چارې به هم ډېر ژر پیل شي.
په همدې حال کې د سیمې خلک د دغو جوماتونو پر جوړېدو خوښي څرګندوي او د نورو رغنیزو پروژو د پیل غوښتنه کوي.
د کونړ والي عبدالستار میرزکوال وایې: هر جومات د ۱۰،۷ میلیونه افغانیو په لګښت جوړېږي.
د یادونې وړ ده چې د حج او اوقافو وزارت او خیریه ټولنو هم په کونړ کې څو جوماتونه جوړ کړي دي.
پای/وصال

Page 5 of 8854