کابل باختردثور دمياشتي٢٧ نيټه :

دملي دفاع وزير سترجنرال عبدالرحيم وردګ نن  له خپل الماني سيال سره په برلين کې وکتل.

 له المان څخه دباختراژانس داستول شوي خبريال نجيب الله بيان دخبرله مخې : دملي اردو زياته پراختيا  ، له نړيوالو ځواکونو څخه افغان ځواکونو ته دامنيتي مسووليتونو دليږدونې دبهيردريم پړاو  اودافغانستان دامنيتي ځواکونو سمبالول اودظرفيت  لوړول ددغو خبرو په محور کې و.

دالمان ددفاع وزير  په دې کتنه کې  له ٢٠١٤ ميلادي کال وروسته يوځل بيا دافغانستان له وسله والو ځواکونوسره دالمان دهمکاريو اومرستو  ددوام غوښتنه وکړه او ويي ويل چې جرمني غواړي  ټولې هغه پروژې چې دافغانستان په شمال کې يې پيل کړي دي بشپړې کړي اوراتلوونکي همکاري پراخې کړي .

کابل باختردثور دمياشتي٢٧ نيټه :

دافغانستان داسلامي جمهوريت  جمهوررييس حامدکرزي نن په برلين کې په خپل استوګنځي کې  دجرمني  دبهرنيو چارو  له وزيرګيدو وسترويله سره  وکتل .

دالمان دبهرنيو چارو وزير دشيکاګو دکنفرانس په  درشل کې ددواړو هيوادونو ترمنځ  داوږدمهالو همکاريو دسندلاسليک ارزښتناک وباله او ددغه موافقه ليک دلاسليک په مراسمو کې يې د جمهوررييس دگډون په خاطر دجرمني دخلکو په استازيتوب مننه وکړه .

 په دې کتنه کې دهيواد  جمهوررييس   اودجرمني دبهرنيو چارو وزير دموجودو چلنجونو او دشيکاګو او توکيو دغونډو دجوړولو اوله وسله والو مخالفينوسره دخبرو دبهير په باب خبرې وکړې .

دغه راز  په دې کتنه کې  دافغانستان داسلامي  جمهوريت جمهوررييس حامدکرزي په تيرو کلونو کې دالمان دخلکو اوحکومت  دسخاوتمندانه مرستو له امله  قدر داني وکړه  او ويې ويل  چې جرمني په سخاوتمندانه ډول دافغانستان له خلکوسره مرسته کړې ده  . جرمني  دافغانستان دخلکو لپاره  دڅو کنفرانسونو کوربه و  او اوس يې  هم په سخاوتمندانه ډول په کال کې ديوسلو پنحوس مليونه يورو  دمرستې اعلام وکړ.

په دې کتنه کې   دعلاقي وړ نورو مسلو په باب هم خبرې وشوې .

کابل باختردثور دمياشتي٢٧ نيټه :

دافغانستان داسلامي جمهوريت  دجمهوري رياست  اوسرپرست مارشال محمد قسيم فهيم نن له غرمي مخکي  دهيواد دلويديځي سيمې دولايتي شوراګانو له رييسانو ، مرستيالانو اومنشيانو سره دصدارت په ماڼۍ کې وکتل،.

باختراژانس ته د جمهوري رياست دمطبوعاتي دفتر دمعلوماتوله مخې :

په دې کتنه کې دجمهوري رياست  سرپرست او دولايتي شوراګانې ددموکراسي په بنسټ ولاړ نظام  کې يو مهم ټولنيز اومدني مرکز وباله او زياته يې کړه چې دغه مرکز په ټول هيواد کې دټولنې اوخلکو درهبري کولو اوګټو اودبيارغونې دبهير په چټکتيا کې مهم اوبنسټيز رول لوبوي .

دجمهوري رياست  سرپرست  دولايتي شوراګانې  په هيواد کې خوځنده مرکزونه وبلل  او څرگنده يې کړه چې هيله لرم په خلکو اوټولنه کې دولايتي شوراګانو دغه مهم رول ته په پاملرنې سره دهغوى فعاليتونه هم دتيرو وختو په پرتله زيات شي .

په دې کتنه کې دهرات دولايتي شورا رييس  ډاکتر محمدظاهر فيض زاده  دنورو په استازيتوب په دغو ولايتونو کې ځينې اوسني ستونزې  دهيواد د جمهوري رياست له سرپرست  سره طرحه کړې .

ده دافغانستان داسلامي جمهوريت دپروګرامونو دملاتړپه ترڅ کې د جمهوري رياست  سرپرست څخه وغوښتل چې دهيواد په ټولو ولايتونو کې ددولت اونړيوالې ټولنې له خوا ولايتي شوراګانو ته پاملرنه وشي او دوزيرانو شورا دقوانينو دکميټې له خوا دولايتي شوراګانو دقانون دتعقيبولو بهيرګړندي شي .

دجمهوري رياست لومړي مرستيال اوسرپرست دکتنې برخه والو سره  ژمنه وکړه  چې په هيواد کې دټولو ولايتي شوراګانو دستونزو دحل کولو په لاره کې به لازم اقدامات ترلاس لاندې ونيسي .

کابل باختردثور دمياشتي٢٧ نيټه :

دافغانستان داسلامي جمهوريت جمهوررييس حامدکرزي او دالمان صدراعظمې ميرمن انکلا مرکل په سيمه ييز وخت نن له غرمي وروسته ددواړو هيوادونو ترمنځ داوږدمهالو همکاريو موافقه ليک لاسليک کړ.

له المان څخه دباختراژانس داستول شوي خبريال نجيب الله بيان دخبرله مخې، ددغه سيندله لاسليک  وروسته دافغانستان جمهوررييس  دالمان له صدراعظمې سره په يو خبري کنفرانس کې ګډون وکړ او ددغه سند پربنسټ يې دافغانستان او المان ترمنځ ددوه اړخيزو همکاريو په باب توضيحات وړاندي کړل .

ميرمن مرکل ددغه سند لاسليک  دافغانستان دملي پوليسو  دځواکونو دروزلو اوسمبالولو په لاره کې اغيزمن وباله او څرګنده يې کړه چې المان په تيرو وختونو کې هم له افغانستان سره يولړهمکاري کړي دي .

ميرمن مرکل وويل  چې دغه سند دافغانستان له خلکوسره  دمرستې لپاره  ډاډمنه  ژمنه ده چې دافغانستان خلک وکولاي شي ښه راتلوونکي ولري .

دې دغه راز وويل : ددغه سند له مخې  المان  له  ٢٠١٤ کال څخه   د ٢٠٢٤ کال ترپاى پورې  دافغانستان دملي پوليسو دځواکونو دروزنې  او دظرفيت دلوړولو  په برخه کې  په کال کې  يوسلو پنځوس مليونه يورو مرسته کوي .

دالمان دصدراعظمې دڅرګندونوله مخې، هيواد به يې په نورو برخو کې هم له افغانستان سره مرسته وکړي .

په دې خبري کنفرانس کې دافغانستان داسلامي جمهوريت  جمهوررييس حامدکرزي ددغه سندلاسليک   دافغانستان او المان ترمنځ  دپياوړو همکاريو ددوام  اوددواړ هيوا دونو ترمنځ داړيکو دپراختيالپاره يو ستر ګام وباله او ويې ويل  چې افغانستان په تيرو وختونو يعني  په  ١٩٢٠ کال کې هم له المان سره ورته تړون لاسليک کړى دى .

 دافغانستان داسلامي جمهوريت  جمهوررييس دغه راز ددغه موافقه ليک لاسليک ددواړو هيوادونو ترمنځ تاريخي اړيکو کې يو نوي فصل وباله  او دامنيتي مسووليتونو دليږدونې له بهيرسره يې اړيکې ونيولې او ويې ويل چې  دامنيتي مسووليتونو دليږدونې دريم پړاو پيل شوى دى او موږ هيله لرو چې تر ٢٠١٣ کال پورې دغه بهير په بشپړه توګه پاى ته ورسيږي اوتر بل يو کال پورې   زموږ امنيتي ځواکونه دې ته  چمتو شي چې په مستقل ډول  دخپل هيواد دخپلواکي اوواکمني  دفاع وکړي او بهرني ځواکونه له افغانستان څخه ووځي .

مخکې له دې دافغانستان   اودهند  ، امريکا ،ايتاليا اودبريتانيا  له هيوادونوسره هم  داوږدمهالو همکاريو تړونونه  اوموافقه ليکونه لاسليک شوي دي .

ددغو تړونونواو موافقه ليکونو لاسليک له شک پرته ددې  حقيقت څرگندوي دى چې افغانستان دنړيوالې ټولنې دپاملرنې  په مرکز کې ځاى لري  او نړيواله ټولنه  هيله نه لري  چې  دافغانستان خلک بيا تيرو  ترخو ورځو ته ستانه شي