25 February 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

سیاسی

کابل/ د سلواغې ٢٧مه/ باختر
د افغانستان د اسلامي جمهوریت جمهورريیس محمد اشرف غني تېر ماښام په المان کې د مونیخ  امنیتي کنفرانس په څنډه کې د افغانستان د سولې لپاره د امریکا د بهرنیو چارو وزارت له ځانګړي استازي ډاکټر زلمي خلیلزاد سره وکتل.
د جمهوررييس د وياند دفتر باختر آژانس ته ورکړ؛ په دې کتنه کې دواړو لوریو د افغانستان د سولې په اړه د امریکا د متحدو ایالتونو د بهرنیو چارو او دفاع وزیرانو سره د جمهورريیس غني د تېرې ورځې په کتنه کې د مطرح شویو موضوعاتو پر تعقیب ټینګار وکړ.#
پاى / ج


 

کابل/ د سلواغې ٢٧مه/ باختر
د افغانستان د اسلامي جمهوریت جمهورريیس محمد اشرف غني تېر ماښام په المان کې د مونیخ امنیتي کنفرانس په څنډه کې د امریکا د متحدو ایالتونو د سنا جرګې له ريیسې مېرمن ناسي پلوسي او د دغه مجلس له یو شمېر غړو سره وکتل.
د جمهوررييس د وياند دفتر باختر آژانس ته ورکړ؛ په دې کتنه کې  د امنیتي مسایلو، سولې پروسې او په دې اړه د جمهورريیس د لیدلوري، له تروریستي ډلو سره د افغانستان د مبارزې او نشه یي توکو په اړه خبرې وشوې او تروریزم د سیمې او افغانستان د متحدینو لپاره د ګډ دښمن په توګه یاد شو.
جمهورريیس غني د پایداره او ټول شموله سولې او د تېرو دوه لسیزو لاسته راوړنو د خونديتوب لپاره د افغان حکومت لیدلوری او تعهد تشریح کړ.
جمهورريیس د حکومت د اقتصادي برنامو او په افغانستان کې د امریکايي ځواکونو د کمولو او له هغې وروسته په سیمه او افغانستان کې د وضعیت د تغییر د څرنګوالي په اړه ځواب ووایه او ويې ویل: نن افغان امنیتي او دفاعي ځواکونه ۹۴ سلنه عملیات ترسره کوي او زموږ ځواکونه دا وړتیا لري چې د خپل وطن او خلکو دفاع وکړي.
جمهورريیس غني د سولې پروسې په اړه وویل: فرصتونه او ګواښونه باید په دقیقه توګه وارزول شي او افغان حکومت دغه اراده، تدبیر او وړتیا لري چې پایداره سولې ته د رسېدو په خاطر فرصتونه په درست ډول تحلیل کړي.
په دې کتنه کې د افغانستان او امریکا دمنافعو پر پیاوړتیا هم خبرې وشوې او جمهورريیس غني وویل: موږ تر اوسه هم له منځ مهاله او اوږد مهاله ګډو ګواښونو سره مخ یوو او باید له دغو ګواښونو سره په مشترکه توګه مبارزه وشي.
جمهورريیس غني او د امریکا د کانګرس پلاوي د نشه یي توکو د قاچاق په اړه هم خبرې وکړې.
په دې اړه د هېواد جمهورريیس وویل: طالبان تر اوسه هم د نشه یي توکو په قاچاق کې دخیل دي.
هغه د خپلو خبرو په پای کې وویل: موږ تر اوسه هم له تروریزم سره د مبارزې په برخه کې د پاکستان له لوري د پام وړ او عملي اقداماتو شاهد نه یوو او د طالبانو پټنځایونه لا هم یوه معضله ده چې باید ورته پاملرنه وشي.#
پاى / ذ

کابل/ د سلواغې ٢٧مه/ باختر
د افغانستان د اسلامي جمهوریت جمهورريیس محمد اشرف غني پرون ماسپښين په المان کې د مونیخ ۵۶ امنیتي کنفرانس په څنډه کې د امریکا متحدو ایالاتو د سنا جرګې له یو شمېر استازو سره وکتل.
د جمهوررييس د وياند دفتر باختر آژانس ته ورکړ؛ په دې کتنه کې چې د امریکا د متحدو ایالتونو د سناجرګې د نظامي خدمتونو، چاپېریال ساتنې، فواید عامې، بانکدارۍ او ښارجوړولو او بودجې کمېټو ريیسانو هم حاضر وو، پر بېلابېلو مسایلو په ځانګړي ډول افغان سولې، د افغانستان او د امریکا د متحدو ایالتونو ترمنځ د ستراتېژیکو اړیکو د پراختیا او پیاوړتیا او له افغانستان سره د دغه هېواد د ملاتړ د دوام په اړه بحث او خبرې وشوې.
دوی د سولې پروسې، د امریکایي ځواکونو دکمولو او پر وضعیت د هغه د اغېزو په اړه خپلې پوښتنې هم مطرح کړې.
جمهورريیس غني د تاوتریخوالي او جنګ ختمولو، د تروریستانو د امن ځایونو، اوربند او پایداره سولې ته د رسېدو په برخه کې چې د افغانانو غوښتنه ده، معلومات ورکړل.
جمهورريیس یو ځل بیا تروریزم افغانستان، د امریکا د متحدو ایالتونو او سیمې ته اصلي ګواښ وباله او د داعش پر ضد یې د افغانستان د مبارزې د یادولو پر مهال، د تروریزم پر ضد د ګډې مبارزې پر دوام ټینګار وکړ.
جمهورريیس غني څرګنده کړه: سوله د افغان دولت او ملت لومړیتوب دی.
هغه په ټینګار وویل: افغانان، د افغانستان او امریکا ترمنځ د اړیکو د پراختیا غوښتونکي دي او موږ د یوه شریک په توګه غواړو خپلې ستراتېژیکې اړیکې مخته یوسو او نه غواړو د اوږو بار واوسو.
جمهورريیس غني د دې په بیان چې له امریکا سره د مشارکت لپاره زموږ د خلکو غوښتنه صادقانه ده؛ وویل: افغانان تل د دغه ډول اړیکو غوښتونکي دي.
جمهورريیس د انکشافي برنامو په اړه هم په خپلو خبروکې وویل: حکومت د افغانستان د ځان بسیاینې لپاره پر برنامو کارکوي او په دې برخه کې د خلکو ملاتړ له ځانه سره لرو او غواړو په خپلو پښو ودرېږو.
د هېواد جمهوررييس د افغان دولت پر مالکیت او رهبرۍ پر سولې پروسې د ټینګار پر مهال د دغه بهیر ګواښونو او فرصتونو ته په اشارې وویل: موږ باید په دقیق ډول د دغې پروسې ګواښونه وپېژنو چې له کومې سترې ننګونې سره مخ نشو. د هر نوښت چې موږ سولې ته نږدې کوي، هرکلی کوو.
جمهوررييس غني وویل: د افغانستان اجنډا سیمه ییزې همکارۍ او د مرکزي آسیا له هېوادونو سره د ترانزیټ او سوداګرۍ پراختیا ده.
په دې کتنه کې امرالله صالح هم د طالبانو له لوري د افغانستان ملي امنیت ته د موجوده متوجه ګواښونو په اړه خپله ارزونه تشریح کړه او د طالبانو د ظرفیت او دا چې دوی څنګه او په کومو امکاناتو او بهرنۍ رهبرۍ دغه جګړه د افغانانو پر ضد مخته وړي، تفصیلي توضیحات وړاندې کړل.#
پاى / ذ

 

کابل/ د سلواغې ٢٧مه/ باختر
د افغانستان د اسلامي جمهوریت جمهورريیس محمد اشرف غني پرون غرمه په المان کې د مونیخ ۵۶ امنیتي کنفرانس په څنډه کې د هالنډ له لومړي وزیر مارک روته سره وکتل.
د جمهوررييس د وياند دفتر باختر آژانس ته ورکړ؛ په دې کتنه کې دواړو لوریو د دوه اړخیزو اړیکو، سولې پروسې او غوڅ ملاتړ ماموریت په چوکاټ کې د هالنډ پر رول خبرې وکړې.
همدارنګه دواړو لوریو د تاوتریخوالي پر ختمولو ټینګار وکړ او ويې ویل: طالبان باید د سولې لپاره د افغانانو غوښتنه ومني او دغه پروسه باید د افغان دولت پر مالکیت او رهبرۍ ترسره شي.
جمهورريیس غني او د هالنډ لومړي وزیر افغان امنیتي او دفاعي ځواکونو ته د روزنې، مشورې ورکولو او مرستو په برخه کې د هالنډي ځواکونو پر رول هم خبرې وکړې.
د هېواد جمهورريیس د کرنې او کانونو په برخو کې د هالنډ ښو تجربوته په اشارې، په دغه برخه کې د یاد هېواد د همکارۍ غوښتنه وکړه.
د کتنې په پای کې د هالنډ لومړي وزیر مارک روته په افغانستان کې د غوڅ ملاتړ ماموریت په چوکاټ کې د خپل هېواد د ملاتړ د دوام ډاډ ورکړ.#
پاى / ج

 

Page 7 of 2232