25 February 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

سیاسی

کابل / د سلواغې١٨مه/ باختر 
د افغانستان د اسلامي جمهوریت جمهورريیس محمد اشرف غني پرون ماښام د آمر عبدالستار د شهادت پېښې د ارزونې پلاوي د موندنو راپور واورېد.   
دجمهور رييس د وياند دفتر باختر آژانس ته خبر ورکړ؛ په دې ناسته کې چې په همدې موخه په ګلخانې ماڼۍ کې جوړه شوه او د دولت جوړوونکي ټاکنیز ټیم لومړي مرستیال امرالله صالح او د ملي امنیت سلاکار حمدالله محب هم حضور درلود، په پیل کې د ملي امنیت شورا د سلاکار دفتر مرستیال او د یاد پلاوي ريیس جنرال سالم شاه ابراهیمي او د پلاوي غړیو عبدالرازق هاشمي او حبیب الرحمان افغان د خپلو موندنو راپور له جمهورريیس سره شریک کړ.
دوی له جمهورريیس څخه د مننې ترڅنګ چې ژر یې د پلاوي د ګومارلو حکم صادر کړ؛ وویل: هڅه مو وکړه چې یاده پېښه او بېلابېل اړخونه یې په هراړخیزه توګه د هېواد د نافذه قوانینو او د عملیاتو د اجرا کوونکو بنسټونو د قانوني صلاحیتونو په رڼا کې او همدا راز مطرح شوې ادعاوې په قضیه کې له دخیلو اکثریت ارګانونو سره د خبرو اترو او استعلامونو او له مشرانو، شاهدانو او زیانمنو شویو سره د مرکو له لارې وارزول شي.
جمهورريیس غني د موظف پلاوي د راپور له اورېدو وروسته د دوی د جدي او منسجم کار او د نظر د توافق مننه وکړه ويې ویل:  ستاسې وړاندیزونه او نظریات جدي دي او غور به پرې وشي.
جمهورريیس د تعقیبي څېړنو په خاطر لازمې لارښوونې وکړې او ويې ویل، د موظف پلاوي موندنې دې د لا زیات وضاحت په موخه د کورنیو چارو وزارت په ګډون له اړوندو امنیتي ارګانونو سره شریکې او ژر دې د یاد پلاوي پوښتنو ته مناسب او واضح ځوابونه برابر شي.
همدا راز جمهورريیس څرګنده کړه چې د موظف پلاوي راپور دې د عدالت د تامین په خاطر له عدلي او قضایي ارګانونو سره شریک شي.
د یادولو وړ ده چې یاد پلاوی به ژر د یوه مطبوعاتي کنفرانس له لارې د خپلو موندنو ډېر جزئیات له خلکو سره شریک کړي.            
پاى \ ذ

کابل/ دسلواغې ١٧مه/ باختر
د افغانستان د اسلامي جمهوریت جمهورريیس محمد اشرف غني پرون ماښام د جمهوري ریاست له دویم معاون قانونپوه سرور دانش او د دویم معاونیت دفتر له غړو سره وکتل.
د جمهوررييس د وياند دفتر باختر آژانس ته خبر ورکړ: په دې کتنه کې چې په ارګ کې ترسره شوه، لومړی د جمهوري ریاست دویم معاون قانونپوه سرور دانش د دولت ـ ملت جوړونې بهیر، ښې حکومتوالۍ، د خصوصي سکتور ملاتړ، عادلانه مشارکت او په نظام کې د ښځو مقام تقویت، د جمهوري ریاست د دویم معاونیت کمېټو کړنو او د اندیشه بنسټ د فرهنګي فعالیتونو په اړه، معلومات ورکړل.
وروسته د جمهوري ریاست د دویم معاونیت دفتر ريیس محمد سرور جوادي، محمد هدایت او ډاکتر باقري د جمهوري ریاست دویم معاونیت د اداري، علمي، سیاسي، ټولنیزو او فرهنګي فعالیتونو، شهید عبدالعلي مزاري او د عادلانه مشارکت او ملي دولت په اړه د هغه د آرمانونو او په بېلابېلو برخو کې د جمهوررييس او د افغانستان حکومت د لاسته راوړنو په اړه خبرې وکړې.
جمهورريیس د هغوی د خبرو تر اورېدو وروسته، په تېرو پنځو کلونوکې د افغانستان حکومت د لاسته راوړنو په ځانګړي ډول په بېلابېلو برخو کې د سیمې او نړۍ له هېوادونو سره د مناسباتو د پراختیا او پياوړتيا په اړه خبرې وکړې.
هغه همداراز د دولتدارۍ فرهنګ د بدلون، متوازن انکشاف، د اوبو مدیریت په برخه کې د حکومت د برنامو، پر طبیعي شتمنیو د پانګونې، د ارزښت زنځیر ته پاملرنې، د افغانستان سیمه ییز اهمیت، ځان بسیاینې، په نظام کې د ښځو د مقام ملاتړ، د تبعیض له منځه وړو په موخه د ګډ فرهنګ ایجاد، باور جوړونې، سیمه ییزې حکومتوالۍ ته پاملرنې او د سولې په اړه د ملي لیدلوري د تقویت په برخه کې د هڅو په اړه په تفصیل خبرې وکړې.#
پاى / ذ

 

کابل/ دسلواغې ١٧مه/ باختر
د جمهورريیس ځانګړي استازي او د سولې په چاروکې د دولت وزیر عبدالسلام رحیمي د افغانستان لپاره د ملګرو ملتو له ځانګړي استازي تدامیچي یاماماتو او ورسره پلاوي سره په کتنه کې وویل: حکومت د سولې له مذاکراتو وړاندې د تاوتریخوالي درېدو هڅو ته دوام ورکوي.
باختر آژانس ته د سولې په چاروکې د دولت وزارت د معلوماتو له مخې: په دې کتنه کې د سولې په چارو کې د دولت وزیر د افغانستان د سولې په بهیر کې د یوناما له همکاریو د مننې ترڅنګ د افغانستان د سولې بهیر په پرمختګ کې د دغه بنسټ پر اغېزناک رول ټینګار وکړ.
نوموړي د سولې بهیر د پرمختګونو په اړه د معلوماتو په ورکړې سره د سولې په بهیر کې د یوناما د ملاتړ د دوام غوښتونکی شو.
عبدالسلام رحیمي زیاته کړه: د افغانستان خلک د تاوتریخوالي په درېدو ټینګار کوي او حکومت د مذاکراتو له پیل وړاندې د خلکو د دغې غوښتنې د عملي کېدو لپاره هڅې کوي.
په کتنه کې یاماماتو د افغانستان د سولې له بهیر څخه د یوناما د ملاتړ ډاډ ورکړ او د سولې په چارو کې د دولت له وزارت سره یې د دغه بنسټ د لا ‌ډېرو مرستو اعلام وکړ.
د افغانستان لپاره د ملګرو ملتو ځانګړي استازي ايران ته د خپل وروستي سفر یادونه وکړه او د افغانستان د سولې بهیر په اسانولو کې یې د پاکستان رول مهم وباله. نوموړي د سولې په بهیر کې پر سیمه‌ ییزه اجماع او د دغو هېوادونو پر رول ټينګار وکړ.
پاى / ذ

کابل/ د سلواغې ١٦مه/ باختر
د افغانستان د اسلامي جمهوريت د ملي امنیت سلاکار ډاکټر حمدالله محب پرون له غرمې وروسته په کابل کې د بریتانیا سفارت له شارژدافیر سره وکتل او د هېواد پر روان وضعیت او د سولې پر پروسې يي ورسره خبرې وکړې.
باختر آژانس ته د ملي اميت شورا دفتر د معلوماتو له مخې: په کتنه کې د ملي امنیت سلاکار وویل چې د سولې په تړاو د افغان حکومت کړنلاره روښانه ده او ټولو افغانانو ته د سولې د بین الافغاني مذاکرتو لپاره اوربند لومړیتوب دی.
محب زیاته کړه: اوربند د طالبانو لپاره هم ښه فرصت دی چې د سولې په پروسه کې افغانانو ته خپل صداقت او جدیت وښیي.
دواړو لورو پر دې ټینګار وکړ چې سوله د افغانانو اړتیا ده او باید د افغانستان په جنګ کې ښکیلې لوري د سولې په راوستو کې هڅه وکړي.
پاى / ذ

 

Page 9 of 2232