25 February 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

اجتماعی

کابل/ د کب ٣مه/ باختر
کندز نن په آرامۍ کې دى او ټول خلک خوښ بريښي.
د باختر آژانس د سيمه ييز خبريال د خبر له مخې؛ د کندز د ارشاد، جج او اوقافو رييس مولوي عبدالرشاد رشاد د تاوتريخوالي په کمښت کې د دولت او طالبانو له اقدام څخه خوښي څرګنده کړه او زياته يې کړه: دا يو نېک اقدام دى او لوى خداى (ج) په قرآن عظيم الشان کې فرمايي: ( والصلح خير) ژباړه: په سوله کې خير دى. د افغانستان خلکو په تېرو ٤٠ کلونوکې د جګړې له پلوه زياتې ستونزې ګاللې دي؛ هيله لرو چې په اصطلاح د تاوتريخوالي دغه کمښت په يوه ملي او پراخ اوربند بدل شي او د بين الافغاني خبرو لپاره زمينه مساعده شي.
له بلې خوا هم په کندزکې يو بل ديني عالم مولوي محمد عاقل سيرت وويل: اوربند او يا په اصطلاح د تاوتريخوالي کمښت يو مثبت عمل دى او له دې کار څخه به ان شاالله لوى خداى (ج) خوښ شي، خو بايد دا لنډمهال نه وي؛ بلکې دوام پيدا کړي او په پاى کې سوله رامنځته شي.
هغه وويل: لوري دې په خپلوکې کښينې او د يوې دايمي سولې په اړه چې د دواړو لورو غوښتنې پکې طرحه شي؛ خبرې وکړې.
په همدې حال کې دوو تنو کندزيانو احمد جاوېد او ننګيالي د باختر آژانس له خبريال سره په مرکه کې وويل چې د تاوتريخوالي د کمښت اوونۍ نيک فال نيسي اوهيله لري چې د تاوتريخوالي کمښت په هېواد کې د دايمي سولې سبب شي.
د يو بل خبر له مخې:
د "ضمير مادر کندز ښوونځي" د وړکتون لسګونو ماشومانو د تاوتريخوالي د کمښت اوونۍ په مناسبت د دغه مرکز په انګړکې په راټولېدو سره، په هېواد کې د سولې د ټيکښت غوښتنه وکړه.
دغو ماشومانو وويل چې له دې زيات بايد جګړه دوام ونه کړي او دوى قرباني نه شي.
دوى د افغانستان بيرغونه لېږدول او دغه شعارونه يې ورکول:
" د تاوتريخوالي د کمښت اوونۍ ملاتړ کوو" ، " موږ يتيم ماشومان افغانستان آبادوو" او "وژنه بس ده."
ختم- ف - اکرم

 

کابل/ د کب ٣مه/ باختر
په غورکې له جګړې څخه پر لسګونو بې ځایه شویو کورنیو نغدې پیسې ووېشل شوې.
دغه کورنۍ په خپلو سیموکې د ډار اچوونکود ډلو د شتون له امله، له دایکنډي او بادغیس او د غور له ځینو سیمو څخه د فېروزکوه ښار ته څېرمه بې ځايه شوې وې او خوراکي توکي، درمل او جامې ته اړتیا لري.
د غور د رسنیو دفتر د یوې خبرپاڼې په خپرولو سره ويلي دي چې مرستندویو بنسټونو په دې دوره کې له جګړې څخه پر ۴۷ بې ځایه شویو کورنیو نغدې پیسې ووېشلې.
خبرپاڼه زیاتوي چې هرې کورنۍ ١٨ زره افغانۍ نغدې پيسې ترلاسه کړې.
ختم/ع

 

کابل/ د کب ٣مه/ باختر
د اوبو رسولو د یوې شبکې په جوړولو او د لسګونو څاګانو په کیندلو سره د ننګرهار د زرګونو اوسېدونکو لپاره د څښاک اوبه برابرې شوې.
د اوبو رسولو دغه شبکه او څاګانې د سره رود، شینوارو او هسکې مینې ولسوالیو په لرو پرتو سیموکې جوړې شوې دي؛ هغه ځای چې تراوسه د کلیو اوسېدونکو د څښاک اوبو ته لاسرسى نه درلود او د ناپاکو اوبو په استفادې سره کلونه کلونه په بېلابیلو ناروغیو اخته کېدل.
د ننګرهار د کلیو د بیارغاونې او پراختیا رییس امان الله میاخېل باختر آژانس ته وویل چې د اوبو رسولو د یوې شبکې او د ۲۵ څاګانو په جوړېدو سره، په سره رود، شینوارو او هسکې مینې ولسواليوکې څه ناڅه ۴۰۰۰ اوسېدونکو ته د څښاک اوبه برابرې شوې.
هغه وویل چې د دغې شبکې او د اوبو د څاګانو په جوړولو کې ۴ میلیونه افغانۍ لګښت راغلى دى.
پای/شکریه

کابل/ د کب ٣مه/ باختر
د کليو د بيارغاونې او پراختيا وزارت نن په فراه کې د غلو د بانکونو له لارې پر ٢٠ بې وزلو کورنيو خوراکي توکي ووېشل.
د کليو د بيارغاونې او پراختيا وزارت وياند فريدون آژند د باختر آژانس خبريال ته وويل چې د وېشل شويو خوراکي توکو مجموعي ارزښت ١٣٦ زره افغانۍ دي او پکې اوړه، وريجې، غوړي او نخود شامل دي چې د فراه په مرکزکې پر بې وزلو کورنيو  ووېشل شول.
ختم-  سعيده - اکرم

Page 5 of 1995