15 October 2019

RSS Facebook

سوداگریز


تازه خبرونه

په اوسني پړاو کې د والیانو ستر مسوولیت

کابل/ د تلې ۲۲ مه / باختر ټول دا واقعیت مني...

په ننګرهارکې د نږدې دوو میلیونو افغانیو په لګښت استنادي دېوالونه جوړېږي

کابل/دتلې ۲۲ مه/باختر د ننګرهار د چپرهار ولسوالۍ په بانډې سيمه...

د طالبانو يو پټنځاى په لوګرکې له منځه يوړل شو

کابل/ د تلې٢٢مه / باختر د پوليسو د ځانګړو قطعاتو...

Youtube Player

khantry design

سوداگریز

سوداگریز

کابل/ د تلې ۲۲ مه / باختر
ټول دا واقعیت مني چې افغانستان له ډېر حساس پړاوه تېرېږي او په هره برخه کې سترې ملې دندې پرتې دي چې باید په بشپړ ډول ترسره شي. د دغو دندو او په ټوله کې په اوسني خورا حساس پړاو کې د والیانو مسوولیت ډېر دروند دی.
د باختر آژانس سیاسي مفسر د والیانو مسوولیت ته کتنه کړې ده او لیکلي یې دي:
جمهورريیس په دغو وروستیو ورځوکې د افغانستان د بېلابېلو ولایتونو له والیانو سره کتنې پیل کړې دي. د دغو کتنو موخه په اړوندو ولایتونو کې د ښې حکومتوالۍ په موخه د چارو ارزول او د لومړیتوبونو په ګوته کول دي.
دا ډېر ښه، پرځای او پروخت نوښت دی. هر والي په اړوند ولایت کې د جمهوررییس استازی دی، د مرکزي حکومت استازی دی او د ملي اقتدار ممثل دی او پر دغو ټولو سربېره د مرکزي حکومت هنداره بلل کېږي، یانې د هر ولایت خلک د خپل والي له مخې پر مرکزي حکومت قضاوت کوي. که والي ښه سړی وي، ملي ګټو او  نظام ته ژمن وي، د فساد او تعصب په ناروغیو اخته نه وي، ښه مدیریت ولري او د بیارغاونې په چارو کې بریالی وي، نو خلک وايي چې د مرکزي حکومت او په ځانګړي ډول د جمهوررییس دې کور ودان وي چې دغه راز یو بریالی والي یې ورټاکلی دی.
برعکس که والي دغه ځانګړنې ونه لري، نو بیا خلک له مرکزي حکومته او دغه راز جمهوررییس څخه ګیله کوي چې یو ناکام سړی یې والي ور ټاکلی دی.
منو چې د والیانو ټاکل تر یو بریده د ناسمو سازشونو تر اغېزې لاندې دي او دا سازشونه هم د هېواد اوسنیو ستونزو ته په کتو تر ډېره جبري بڼه لري. ښایي دا جبر تر یو ټاکلي پړاوه دوام ومومي، یانې تر هغو چې د افغانستان نظام پر خپلو پښو ودرېږي، عدلي او قضایي جوړښتونو مو لا غښتلي او د دې جوګه شي چې قانون پر ټولو یو ډول تطبیق کړي او تر ټولو مهمه دا چې جګړه پای ومومي، ښایي د والیانو په ټاکلو کې دغه جبر خپل نقش ولري.
څنګه کېدای شي چې په دغه راز حالت کې د والیانو په توګه د تنبلو، بې نوښته او په ځانګړي ډول د مفسدو کسانو د ټاکلو مخه ونیول شي؟ د دغه کار د مخنیوي لپاره ترټولو غوره لاره دا ده چې د والیانو د ارزونې لپاره یو اغېزمن میکانیزم جوړ شي، د ارزونې ځانګړي شاخصونه وټاکل شي ( له فساد سره په مبارزه کې بریالیتوب، د سولې لپاره کوښښ، د امنیت ټینګول، ښه حکومتوالي، له ولسونو سره اړیکې، د بیارغاونې چارو پرمخ بیول او نور).
همدارنګه د والیانو د ټاکلو لپاره هم باید ځانګړي او مشخص معیارونه وټاکل شي. ټول کاندیدان باید د دغو معیارونه په تله کې وتلل شي، که یې دا معیارونه پوره کړل؛ بیا دې ورته د ارزونې معیارونه او وخت تشریح شي، که یې تابیا وه؛ نو د تقرر لپاره دې اقدام وشي او که تابیا یې نه راتله؛ نو بل څوک دې وټاکل شي.
هڅه باید دا وي چې د والیانو ټاکل له تصادفی حالته را ووځي او د یو ځانګړي میکانیزم له مخې تر سره شي.
همدارنګه مرکزي ادارې په تېره بیا د سیمه ییزو ارګانونو اداره دې د هر ولایت پوځي، سیاسي، ټولنیز او فرهنګي حالت په دقیقه او هر اړخیزه توګه وڅېړي او بیا دې د دغه ډول څېړنې پر بنسټ د هر ولایت لپاره لومړیتوبونه وټاکي او والیانو ته دې دنده وسپاري چې دا لومړیتوبونه عملي کړي او د هغوی ارزونه دې هم د دغو لومړیتوبونو د عملي کولو په رڼا کې ترسره شي.
پاى/ن.ش
‏4:43:57 م

 


 

کابل/دتلې ۲۲ مه/باختر

د ننګرهار د چپرهار ولسوالۍ په بانډې سيمه کې د يو ميليون او ٦٠٠ زره افغانيو په مالي لګښت د دوو استنادي دېوالونو د جوړلو چارې پيل شوې.

د چپرهار ولسوال محمد صدیق دولتزي د باختر آژانس سیمه ييز خبریال ته وویل چې د دغو دېوالونو په رغېدو سره به سلګونه جریبه ځمکې د سیلاوونو له خطرڅخه وژغورل شي.

پای/وصال

 

کابل/ د تلې٢٢مه / باختر 
د پوليسو د ځانګړو قطعاتو ځواکونو په هغو عملياتوکې چې د لوګر د څرخ ولسوالۍ په مربوطاتو کې ترسره شول؛ د وسله والو طالبانو يو ستر پټنځاى له منځه يوړ.
د لوګر د امنيې قوماندانۍ وياند شاهپور احمدزي د باختر آژانس خبريال ته وويل             چې په عملياتوکې د دغه پټنځي په له منځه وړلو سربېره څو جنګي وسايل د پوليسو لاسته ورغلي دي.

کابل/ د تلې٢٢مه / باختر:   
د پروان په مرکز پورې اړوند په تلانچي سيمه کې پرون د يوه سړک د قيرکولو کار پيل شو.
د پروان د کليو د بيارغاونې او پرمختيا رييس جان محمد حکمتجو باختر آژانس ته وويل: دغه سړک د څه دپاسه دوه کيلومترو په اوږدوالي چې د عبدي باى کلى د پروان د مرکز له تلانچي سيمې سره نښلوي د اوولسو ميليونو افغانيو په لګښت په يو کال کې قيرکېږي.
پاى \ ذ

کابل/ د تلې٢٢مه / باختر
د تخار په ينګي قلعه ولسوالۍ کې د وسله والو طالبانو يو سيمه ييز قوماندان تېره شپه د پوځيانو په عملياتوکې ووژل شو.
د تخار پوليسو وياند باختر آژانس ته وويل چې ملا داوود له ٧ ملګرو سره يې په ينګي قلعه ولسوالۍ کې د امنيتي او دفاعي ځواکونو په چاڼيزو عملياتوکې ووژل شو او  پنځه نور وسله وال طالبان ټپيان شول.
خبرځاى زياته کړه: په عملياتوکې دينګي قلعه ولسوالۍ پنځه کلي دوسله والو طالبانو له شتون څخه پاک شول او د يو طالب مړى له يوکلاشينکوف او يو لاسي بم سره د جګړې په ډګرکې پاتې و.
په ينګي قلعه ولسوالۍ کې چاڼيز عمليات د طالبانو له شتون څخه د دغې ولسوالۍ تر بشپړ پاکولو پورې دوام کوي.
پاى \ج\ذ

دوه ښځې نن په غورکې د ماين په چاودنه کې ووژلې شوې .

د غور د والي وياند عبدالحى خطيبي دباختر آژانس خبريال ته وويل: دغه ښځې د فېروزکوه ښار په مربوطاتوکې هغه وخت ووژلې شوې چې په واټ کې پر ښخ کړاى شوي ماين وختلې.

د يو بل خبرله مخې:

د پوليسو يو سرتېرى پرون د تيورې ولسوالۍ په اندي سيمه کې د ماين په چاودنه کې شهيد او يو بل سرتېرى ټپي شو

Monday, 14 October 2019 19:52

د پوهنې وزارت اعلاميه

کابل/ د تلې٢٢مه / باختر 
د عبدالغفور نديم لېسې د مدير د شهادت په اړوند د پوهنې وزارت اعلاميه
د پوهنې وزارت هغه ډار اچوونکي بريد چې د عبدالغفور نديم لېسې د مدير سيد ضياالدين ضيا د شهادت سبب شو؛ په کلکه وغانده.
د باختر آژانس د خبر له مخې، د پوهنې وزارت په دې اړوند د يوې اعلاميې په خپرولو سره ويلي دي: د پوهنې له کارکوونکو سره دښمني له زده کړې، علم او معرفت سره دښمني ده. ناپېژاندو وسله والو کسانو د دغه شان ناوړه جنايت په ترسره کولو سره هېڅکله نه شي کولاى په هېوادکې د پوهنې ځلاند څراغ مړ کړي.
د پوهنې وزارت مشرتابه د خپلې ژورې خواخوږۍ او ډاډګيرنې مراتب د پوهنې کارکوونکو او د شهيد کورنۍ ته څرګندوي.
ناپېژاندو وسله والو کسانو نن سهار د عبدالغفور نديم لېسې مدير سيد ضيا الدين ضيا د دغې لېسې په وړاندې په ډزو سره شهيد کړ.
پاى \ج\ ذ

 

کابل/دتلې ۲۲مه/باختر
د هېواد د ښې طنز ليکونکې ملالۍ متين فضليار د " آفرين صد آفرين آی ولا" ظنزي   ټولګه له چاپه ووته.
د باختر آژانس د خبر له مخې: دغه طنزي ټولګه د کارتون په رساميو سره د ١٠٠٠ ټوکو په تېراژ په ٢٩ مخونوکې چاپ شوې ده.
په دې ټولګه کې دغه طنزي سرليګونه شامل دي: "چندکک های انتخاباتی"،
"يک فکر برتر اختاپوتي"، "چندکک های مرچکی"، "جندکک های عياشی"، "چندکک  های فرامرزي"، "چندکک های خانوادگی و اجتماعی"، " آفرين صد آفرين متظاهر"،  "چندکک های گژدمکی پرای صاحبان خجالت"، "سياست از ديد انداز کشورهای ذيدخل و خرچ د ررابطه به افغانستان" و "خط آخر" .
ختم- شکريه - اکرم

کابل/دتلې ۲۲مه/باختر
د پروان په مرکز پورې اړوند په جمشېد خېلوکې د يو جومات د جوړولو کار پرون پيل شو.
د باختر آژانس د خبرله مخې: د پروان والي فضل الدين عيار د دغه جومات د بنسټ ډبرې د ايښودلو په وخت کې د ثبات پر ټينګښت او د يوبل پر منلو ټينګار وکړ.
عيار زياته کړه چې دغه جومات په دوو پوړونوکې د ښار جوړولو وزارت له بودجې څخه د ١١ ميليونو افغانيو په لګښت په ٢٨٠ مربع متره ځمکې په ساحه کې په پاخه اواساسي ډول جوړېږي چې د ١٠٠ تنو لمونځ کوونکو ظرفيت به ولري او په يوکال کې جوړېږي.
د دغه جومات د کار د پرانيستلو په مراسموکې په ملي شورا کې د خلکو استازې  ذکيې سنګين او په ولايتي شورا کې د خلکو يوشمېر استازو هم ګدون لاره .
ختم- ج -اکرم

 

کابل/دتلې ۲۲مه/باختر
د ملي دفاع وزارت د هېواد په ځينو سيموکې د ٤٦ طالبانو د وژل کېدو خبر ورکړ.
د ملي دفاع وزارت مطبوعاتي دفتر نن په يوه خبرپاڼه کې چې باختر آژانس ته يې استولې ده؛ ليکلي دي: د هېواد امنيتي او دفاعي ځواکونو په تېرو ٢٤ ساعتوکې د ننګرهار، بلخ، غزني،  بدخشان،  ميدان وردګو او هلمند په مربوطاتوکې د تروريستانو د له منځه وړلو په موخه يرغليز عمليات او هوايي بريدونه ترسره کړل چې په پايله کې ٤٦ وسله وال طالبان ووژل شول، ١٥ ټپيان او دوه نور يې ونيول شول.
ختم- ج-اکرم

 

Page 1 of 8156