23 October 2019

RSS Facebook

سوداگریز


تازه خبرونه

مطبوعاتي اعلامیه

کابل/دتلې۳۰مه/باختر د کاناډا د لومړي وزیر په توګه د جسټن تروډو...

په کونړکې د انسان تښتوونکو له منګولو څخه د پنځه کلن ماشوم ژغورل

کابل/دتلې۳۰مه/باختر د کونړ د امنیې قوماندانۍ مسوولین وايي چې د دغه...

Youtube Player

khantry design

سوداگریز

سوداگریز

کابل/دتلې٣٠مه/باختر
د ملي امنیت سلاکار ډاکټر حمدالله محب وايي چې اطلاعاتو ته لاسرسی له قانوني اړخه د هر افغان حق دی او موږ ټول مکلف یوو، چې ددې حق د خوندي ساتلو لپاره کار وکړو.
د ملي امنیت شورا دفتر باختر آژانس ته خبر ورکړ:
د ملي امنیت سلاکار اطلاعاتو ته د لاسرسي کمېسیون له رييس او غړو سره په خبروکې ټینګار وکړ چې افغان حکومت د ولس ټولو وګړنیزو حقونو ته ژمن دی او کمېسیون باید په جرات او جدیت سره کار وکړي.
د کمېسیون رييس او غړو وروسته له دې چې د خپل کار او قانوني صلاحیتونو په اړه معلومات ورکړل وویل چې لاهم ځینې ستونزې شته چې معلوماتو ته د خلکو لاسرسی ستونزمنوي.
دوی وویل چې ځینې ادارې او بنسټونه په دې برخه کې همکاري نه کوي او کله نا کله ستونزې رامنځته کېږي.
د ملي امنیت سلاکار ژمنه وکړه چې د ملي امنیت شورا دفتر په دې اړه هر ډول قانوني همکارۍ ته تیار دی او له نورو ادارو سره به هم د اړتیا په صورت کې همغږي وکړي چې په دې اړه د ممکنه ناغېړیو مخه ونیسي.
پاى- ذ

 

کابل/دتلې٣٠مه/باختر
د ملي امنیت سلاکار ډاکټر حمدالله محب په کابل کې د بریتانیا له سفیرې الیسون بلېک سره وکتل.
د ملي امنیت شورا دفتر باختر آژانس ته خبر ورکړ:
په دې کتنه کې دواړو لورو د روان حالت او افغانستان او بریتانیا پر اړیکو خبرې وکړې.
په کابل کې د بریتانیا سفیرې د انتخاباتو د بریالي ترسره کېدو او د هغو د امنیت د ټینګښت له امله مبارکي وویله او افغان ملي امنیتي ځواکونه یې وستایل چې یوه ملي پروسه یې خوندي کړه.
د ملي امنیت سلاکار وویل چې طالبانو غوښتل دا بهیر له خنډ سره مخ کړي او د لسګونو بریدونو په کولو یې تمه وه چې ناکامه یې کړي، خو د افغان ځواکونو د بشپړې تیارۍ او جدي اقداماتو له امله خپل هدف ته ونه رسېدل.
په کتنه کې د افغان سولې او بین الافغاني مذاکراتو او په راتلونکي کې د دواړو هېوادونو ترمنځ د اړیکو د دوام او ښه والي په اړه هم بحثونه وشول.
دواړو لورو ټینګار وکړ چې سوله یوه جدي اړتیا ده او باید د جګړې د عواملو د پېژندلو او په نښه کولو له لارې روانه شخړه پایته ورسېږي.پاى- ذ

کابل/دتلې٣٠مه/باختر
د ملي امنیت سلاکار ډاکټر حمدالله محب وايي چې افغان ولس د هر هغه چا مننه او درناوی کوي چې دوستي یې ورسره کړې او ښه چلند یې کړی دی.
هغه په دې برخه کې د سویس هېواد یادونه وکړه چې له اوږدو کلونو راهیسې په بېلابېلو برخو کې د افغانستان ملاتړی پاتې شوی او بېلابېلې همکارۍ یې کړې دي.
د ملي امنیت شورا دفتر باختر آژانس ته خبر ورکړ:
د ملي امنیت سلاکار د افغانستان او پاکستان لپاره د سویس له سفیر توماس کولي سره په کتنه کې ټینګار وکړ: زموږ هېواد د دې ډول همکاریو په سبب او په تېرو ۱۸ کلونو کې د افغانانو د نه ستړې کېدونکو هڅو له امله ډېر بدلون موندلی او پرمختګ یې کړی دی.
د سویس سفیر د خپل هېواد د همکاریو د دوام په یادونې سره وویل چې له شکه پرته افغانستان لاهم د امنیت، بشري مرستو او جګړې په برخه کې په داسې یوه حالت کې دی چې باید لا ډېر کار او پاملرنه ورته وشي.
هغه ټینګار وکړ چې دې برخې ته د نړیوالو په تېره بیا د ګاونډیو هېوادونو پام جلبول ډېر مهم دي.
د ملي امنیت سلاکار وویل چې افغان حکومت تر بل هر وخت ډېر له نورو ملکونو سره په تماس کې دی، دلته د هغوی استازولۍ شته او افغانستان هم په لسګونه هېوادونوکې سفارتونه لري.
ده د ګاونډیانو په اړه وویل چې افغانان د ښه ګاونډیتوب غوښتونکي دي، خو ځینې ګاونډیان بیا دوه ګونې لوبه کوي او خبرې او عمل یې سره توپیر لري.
د ملي امنیت سلاکار د افغانستان سوله، وده او پرمختګ د ټولو په خیر وباله او ټینګار یې وکړ چې باید هېڅ هېواد هم له منفي لارو دلته د خپلو سیاستونو او ناوړه لوبو د عملي کولو تکل ونه کړي.
پاى- ذ

کابل / دتلې ٢٩مه / باختر :
دنيمروز داطلاعاتواوفرهنګ رياست پرون څه دپاسه سل لرغونې اثار ددغه ولايت دمرکز له پلورنځيو څخه راټول کړل .
دغه اثار په غير قانوني ډول پلورل کېدل .
دنيمروز داطلاعاتواوفرهنګ رييس غلام نبي  حسن باختراژانس ته وويل چې ددغه ولايت دملي امنيت رياست امنيه قوماندانۍ او څارنوالۍ  په همکارى يوشمېر تاريخي او لرغونې اثار  چې په غير قانوني ډول دزرنج ښار په انتيک پلورنو  کې پيرودل کېدل او پلورل کېدل راټول کړل .
هغه زياته کړه چې دغه اثار  په ډير لنډ ممکن وخت کې دنيمروزداطلاعاتو اوفرهنګ په رياست کې ثبت اوراجستر  کېږي .
په زرنج ښار کې يوشمېر دغو انتيک پلورونکو له خپلودوکانونو څخه دتاريخي او لرغونو اثارو له راټولولو سره مخالفت وکړ اوويې ويل چې راټول کړى شوي اثار لرغوني نه دي او دانتيک وسايلو يوه برخه ګنل  کېږي .
  يوشمېر نور دوکانداران هم وايي چې دغه اثار ددوى څوکلنه پانګه ده او دولت بايد ددوى له دوکانونو څخه ددغو اثارو په راټولولو اقدام نه واى کړي  .
دنيمروز داطلاعاتو اوفرهنګ رييس وايي چې اساسي قانون او دلرغونو اثارو دساتنې قانون موږ ته اجازه راکړې ده چې په غير قانوني ډول . دتاريخي اثارو دپيرودنې او پلورنې  مخه ونيسو .
دغه اثارو زموږ ملي پانګه اوهويت دى او بايد په دولت کې ثبت اوراجستر شي هيڅوک نه شي کولاى هغه دقاچاقو په ډول وپېري .
  ختم_ عطاالله _ اکرم

 

کابل / دتلې ٢٩مه / باختر :
په جوزجان کې  دڅلورو ټولګټو پروژو دپلې کولو کار نن پيل شو .
دباختراژانس دسيمه ييز خبريال دخبرله مخې ، دغه پروژې داقچې ولسوالۍ ددرې سرکې په نور اباد  ښارګوټي کې موقعيت لري چې دژورو څاګانو کېندل ، داوبو رسولو دشبکو جوړول ، ددرېو کيلومترو په اوږدوالي په اصلي اوفرعي  سړکونو کريړ اچول او دماشومانودلوبې ديوه پارک جوړول شامل دي چې له ښيکڼو  څخه يې کابو پنځه سوه کورنۍ ګټه اخلي .
ددغو پروژو لګښت دپناه غوښتونکو  په چارو کې دملګروملتو دسازمان دکميشنري په مالي مرسته ورکول کېږي .
  ختم- ف _  اکرم

کابل / دتلې ٢٩مه / باختر :
په جوزجان کې دوګړني پاڅون  يو قوماندان له خپل  زوى سره نن سهار شهيد کړى شو
دجوزجان دامنيې قوماندانۍ وياند باختراژانس ته وويل چې ددښمن يونفوذي  سړي دفيض اباد ولسوالۍ په حيدر اباد کلي کې دوګړني پاڅون  په يوه قوماندان تورسن او دهغه په زوى ډزې وکړې او دواړه يې شهيدان کړل .
يوې اړوندې سرچينې وويل چې بريدګر دشپې له تورتم څخه  په ګټې اخستنې سره له خپلې وسلې سره تښتيدلى دى او پوليس دهغه په لټه کې دي .
  ختم_ عطاالله _ اکرم

 

کابل / دتلې ٢٩مه / باختر :
دبهرنيو چارو و زارت داداري  او منابعو معينې  ميرمن ناهيد  ايثارپه کابل کې  دمصر جمهوريت له سفير  عاني صلاح سره وکتل .
باختراژانس  ته دبهرنيو چارو وزارت دمطبوعاتي دفتر دمعلوماتو له مخې، ايثار دافغانستان له اسلامي جمهوريت سره دمصر جمهوريت همکارى  وستايلې او په حکومت  کې دښځو درول ، دپوهنې د حالت ، دبيان او درسنيو  دازادي په باب  يې مفصل معلومات وړاندې کړل  او ددغو ارزښتونو په ساتنې باندې يې ټينګاروکړ .
دواړو لورو  په بېلابېلو  برخو کې ددوه اړخيزو اړيکو دپراختيا په باب خبرې وکړې .
  ختم_ ف _ اکرم

کابل / دتلې ٢٩مه / باختر :
اجراييه رييس ډاکتر عبدالله عبدالله تېر ماښام دامريکا دمتحده ايالاتو دسنامجلس درييسې ميرمن نانسي پلوسي  په مشرۍ ددغه هېواد دکانګرس له هيئت سره  په سپيدار ماڼۍ کې وکتل .
باختراژانس ته د اجراييه رياست دمطبوعاتي دفتر د معلوماتو له مخې ، په دې کتنه کې داجراييه رييس له افغانستان سره دامريکا دمتحده ايالاتودکانګرس له هراړخيزاو پراخ ملاتړ  څخه قدرداني وکړه .
ډاکتر عبدالله عبدالله  دغه راز له ډار اچونې سره په مبارزه او دسولې په تامينولو کې دامريکا دمتحده ايالاتو  دسخاوتمندانه مرستو او قربانيو  له امله مننه وکړه او ددواړو هېوادونو ترمنځ يې  دګډو اودستراتيژيکي  همکاريو ددوام غوښتنه وکړه .
دهېواد اجراييه رييس وويل چې دافغانستان خلکو دجمهوري رياست انتخابات په برياليتوب سره ترسره کړل اودطالبانو له ګواښونو سره سره دولسواکۍ دارزښتونو ددفاع لپاره دراى ورکولو صندوقونو ته لاړل او دخپل نظر وړ نوماند ته يې راى ورکړې .
  ډاکتر عبدالله زياته کړه اوس دافغانستان خلک د انتخاباتو دخپلواک کمېسيون له لوري دپايلو اعلام ته سترګې پرلاره دي اوله رونټيا پرته په بل څه قانع نه دي .
اجراييه رييس  سولې ته درسېدو لپاره دهڅو په باره کې وويل چې سوله دافغانستان دخلکو له لومړيتوبونو څخه ده او دى، ددغوهڅو ملاتړ کوي .
ډاکتر عبدالله عبدالله دغه راز ټينګاروکړ چې رښتينې   سولې او دجګړې بنديدو ته درسېدو لپاره هرراز قربانى ته چمتو دى .
اجراييه رييس وويل چې دافغانستان خلک ددې تر څنګ چې دسولې غوښتونکي دي دوروستيو کلونو دلاس ته راوړنو او دخپلو حقوقو ساتنه کوي .
ميرمن نانسي پلوسي  داجراييه رييس له کوربه توب  څخه په مننې سره وويل افغانستان او دامريکا متحده ايالات ستراتيژيکي  دوستان او متحدين دي او ددواړو هېوادونو ترمنځ دوستي او همکاري  دوام مومي .
  ميرمن پلوسي  وويل : هغوى نه غواړي چې افغانستان يوځل بيا دډار اچوونکو په پټنځي  بدل شي له همدې امله غواړي چې حالت له نږدې  تر نظر لاندې ولري
چې  له ډار اچونې سره دمقابلې  لپاره ددواړو هېوادونو فعاليتونه په همغږى سره دوام ومومي .
ميرمن پلوسي په برياليتوب سره په افغانستان کې دجمهوري رياست  د انتخاباتو دترسره کېدو هرکلي وکړ او دموکراسى ته داعتبار ورکولو او دانتخاباتو په پايله کې درامنځته شوي حکومت دمشروعيت لپاره يې دبهير   په رونټيا  باندې ټينګاروکړ .
ميرمن پلوسي  دخپلو خبرو په يوه برخه کې اجراييه رييس ته په خطاب کې وويل له تاسو سره له هغه وخت څخه چې دافغانستان دبهرنيو چارو وزير وې بلدتيا لرم .  موږ غواړو چې په افغانستان کې دافغانانو په رهبرى او مالکيت سوله تحقق ومومي ، امنيت ټينګ شي  دافغانستان اقتصاد ښه والى ومومي او دافغانستان خلک په امنيت اوسوکالۍ کې ژوند وکړي .
  ختم_ عطاالله- اکرم

کابل / دتلې ٢٩مه / باختر :
قاضي القضات او دسترې محکمې  رييس قانونپوه سيديوسف حليم نن دعدالت پروژې له رييس  ايريک سره وکتل .
باختراژانس ته دسترې محکمې دخپرونو رياست دمعلوماتو له مخې، په دې کتنه کې لومړى دعدالت پروژې  رييس دمدني،سوداګريزو  محاکماتوداصولو،  دمحکمودادارې سيستم ، دځمکې داختلافونو دحل اوفصل او دکورنۍ  دقانون ، دزده کړيزو سفرونو دبرابرولو ،دکاري ديتابيسونو او دانلاين ديتابيسونه په رامنځته کولو کې  دهمکارى او دقوانينو  دبيا  کتنې کمېټې له جوړولو سره دمالي ملاتړ په برخو کې داداري او قضايي منسوبانو لپاره دزده کړيزو پروګرامونو دجوړولو  په ساحو کې دترسره شويو همکاريو په باب  معلومات ورکړل . او دراتلونکو پروګرامونو جزئيات يې هم بيان کړل چې دهمکاريودزياتي  پراختيا څرګندوى دى .
په مقابل کې دسترې محکمې رييس له همکاريو څخه دمننې په څرګندولو سره دقضايه قوې داساسي لومړيتوبونو په باب چې دعمل په پروګرام کې تصريح شوي دي ترکيز  وکړ اوزياته يې کړه چې همکارې موسسې او بنسټونه دې بايد خپل پروګرام دقضايه قوې له اړتياو او غوښتنو سره سم او په همغږى  او اړيکه کې عيار کړي چې دپلانونو اوپروګرامونو په تطبيق  کې ښه اغيزه ولري  او له ادارې سره دښو قضايي خدمتونو په وړاندې  کولو کې مرسته وکړي چې دپروژې لورې ژمنه څرګنده کړه
دواړو لورو په دې کتنه کې دعلاقې وړ نورو مسئلو په باب هم خبرې وکړې .
ختم_ ف _ اکرم

کابل / دتلې ٢٩مه / باختر :
دطالبانو په وروستيو بريدونوکې دروزګان دګېزاب ولسوالۍ زياتې ساحې ددولت له ادارې څخه وتلې دي .
په دغو نښتو کې دکوماندو اته پوځيان ، پنځه پوليسان او دملي اردو دوه سرتيري  وژل شوي او شپاړلس تنه نورپوځيان طالبانو نيولي دي .
دګېزاب سيمه ييز مسوولين خبر دارى ورکوي که چېرې  دولت کومکي ځواکونه وانه ستوي او هوايي پوځ  لاس په کار نه شي دغه ولسوالۍ به په بشپړه  توګه دطالبانو لاس ته ورشي .
دګېزاب  په ځينوسيمو  دطالبانو بريدونو دتيرې  يوې مياشتې په بهير کې دوام درلود  چې په پاى کې زياتې برخې يې ددولت له ادارې څخه ووتلې .
دروزګان دګېزاب ولسوالۍ يوې امنيتي سرچينې باختراژانس ته وويل چې داردو ، پوليسو اودګوماندو پنځلس پوځيان  له يرغلګرو سره په نويو نښتو کې وژل شوي اوشپاړلس  نور پوځيان وسله والو طالبانو نيولي دي او دهغوى برخليک لاتراوسه پورې معلوم نه دى .
درارسېدلو خبرونوله مخې، په لسګونو پوځيان په ګېزاب کې په خپلو څلورو قرارګاو  او پوستو کې دوسله والو طالبانو په کلابندى کې دي
دکېزاب  امنيه قوماندان او ولسوال له رسنيو سره په خبرو کې دکومکي ځواکونو داستولوغوښتنه کړې ده.
هغوى ويلي دي که چېرې  کومکي پوځيان ګېزاب ته ونه رسېږي او هوايي پوځ لاس په کار نه شي دغه ولسوالۍ به په بشپړه توګه دطالبانو لاس ته ورشي او دپوځيانو دسردزيان  شمېر به لوړ شي .
  ختم_ عطاالله _ اکرم

Page 4 of 8184